ESITULUILO 19 - Embimbiliya - Bíblia Sagrada em Umbundu

¹ Kovaso yovina evi nda yeva cimue ca soka ndonjuvungo yinene yowiñi wa lua kilu. Va vilikiya vati, Aleluya! Epopelo lulamba lunene vi tiamela ku Suku yetu,

² momo olonimbu o tetulula viocili lesunga. Wa pisa ocipuepue cinene ca konyuisa ilu lieve lupuepue waco, haeye wa ci fetuluinyila osonde yovakuenje vaye.

³ Oco onjanja yavali va vilikiya vati, Aleluya! Evonge lialio li londa londa kilu toke koloneke ka vi pui.

⁴ Akulu vaco akui avali la vakuãla loviendalomuenyo viaco vikuãla va wila posi kuenje va fendela Suku wa tumala kocalo, vati. Amene. Aleluya.

⁵ Lo kocalo kua tunda ondaka ya linga yiti, Ene akuenje vaye vosi, lene vosi wo sumbi, lava vatito lava vanene, tumbangiyi Suku yetu.

⁶ Oco nda yeva cimue ca soka ndonjuvungo yowiñi wa lua, pamue ndokuõla kuovava a lua, pamue ndondaka yovilemĩlo via piãla, ya linga yiti, Aleluya! Momo Ñala Suku yetu Tõlo, o kasi loku viala.

⁷ Tu yoleli. Tu sangateli. Tu wimbili ulamba. Momo uvala wa Kameme weya. Ndombua yaye wa liangiliya.

⁸ Kuenje co wihiwa oku wala onanga yovalatanya yi yela tue. Onanga yaco yovalatanya oyo ovilinga via sunguluka violosandu.

⁹ Oco ungelo wa popia lame hati, Soneha. Ava va lalekua kondalelo yofesta yuvala wa Kameme va sumũlũha. Oco a popia lame hati, Evi olondaka viocili via Suku.

¹⁰ Oco nda kupukila posi kolomãi viaye oku u fendela, puãi eye wa popia lame hati, Ku ka ci linge. Ame ndindingupange kumue love lava vasitue love, haivo va kolela uvangi wa imbiwa la Yesu. Fendela Suku. Momo uvangi wa imbaiwa la Yesu owo utima wovaprofeto.

¹¹ Oco nda mola ilu lia yuluka, kuenje, tala, okavalu ka yela! U wa endelako wa tukuiwa Kolelua, kuenda Ukuacili, kuenje o tetulula lesunga, ndaño ovita o katukilavo lesunga.

¹² Ovaso aye a setahala ulienge wondalu, kuenda kutue waye kuli akolowa a lua. O kuete onduko ya sonehiwa, onduko yaco lomue o yi, te eye muẽle.

¹³ Wa wala onanga ya yavekiwile vosonde. Onduko vo tukula layo yeyi, Ndaka ya Suku.

¹⁴ Olohoka viokilu vio kuama, haivio via wala olonanga viovalatanya vi yela tue. Via endela kotuvalu tu yela.

¹⁵ Vomẽla yaye mua tunda osipata ya tua yoku veta layo olofeka. O vi pokuisa lepangati liutale. O kosa kosa ocikoselo covinyu vionyeño ya tokota ya Suku Tõlo.

¹⁶ Eye o kuete onduko ya sonehiwa konanga yaye lo kocikalo caye, yokuti Soma yolosoma haeye Ñala yoloñala.

¹⁷ Oco nda mola ungelo umue wa talama vekumbi, yu wa vilikiya lolukandi olonjila viosi vi palala vilu, hati, Enjui. Liongoluili kondalelo yinene ya Suku

¹⁸ ho li ositu yolosoma, lositu ya vakesongo, lositu yovindululu, lositu yotuvalu lava va endelako, lositu yomanu vosi, eyi yomãla vamãle leyi yapika, eyi yava vatito leyi yava vanene.

¹⁹ Oco nda mola ocinyama lolosoma viokilu lieve, lolohoka viavio, va liongolola, va katukila u wa endela kokavalu kuenda olohoka viaye.

²⁰ Kuenje ocinyama ca kuatiwa kumue luprofeto wesanda, una wa lingila ovilimbu kovaso aco, evi a kembisa lavio ava va kapiwa ondimbukiso yocinyama, haivo va fendela ociñumañuma caco. Kavali kavo va imbiwa lomuenyo vociva condalu ci taima lofuofuo.

²¹ Vakuavo va kunduiwa losipata yu wa endela kokavalu, osipata yina ya tunda vomẽla yaye. Olonjila viosi vie kuta ositu yavo.