ESITULUILO 18 - Embimbiliya - Bíblia Sagrada em Umbundu

¹ Kovaso yovina evi nda mola ungelo ukuavo wa kala loku tunda kilu, haeye wa kala lunene wa lua, Ulamba waye wa ninisa ilu lieve.

² Eye wa vilikiya lolukandi hati, Imbo linene lia fa! Imbo linene lia Bavulono lia fa! Lia linga imbo liolodemónio, hailio elungi liaspiritu osi ãvi, hailio elungi liolonjila viosi vĩvi via nyehuiwa.

³ Momo olofeka viosi via fa lovinyu vionyeño yupuepue walio. Olosoma viokilu lieve via linga lalio ukahonga. Vakuakufũla kilu lieve va mola ukuasi lokukukulula kualio.

⁴ Oco nda yeva ondaka yikuavo ya tunda kilu, ya linga yiti, Amanu vange, tundi vimbo liaco, sanga wu linala lakandu alio, kuenda sanga afengi alio o kuati.

⁵ Momo akandu alio a lilundika toke kilu, lolohole vialio Suku wa vivaluka.

⁶ Ondoluili kokualio ndeci lia linga. Li tiuwili luvali ovilinga vialio. Vokopo yina lia pongiyila vakuavo, omo vu li pongiyila olonjanja vivali.

⁷ Ndeci muẽle lia litambela, leci lia kukulula, haico vu li iha oku yambuiwa loku lite tela. Omo lia popia lutima liti, Nda tumala nda inakulu. Sicimbumbako. Si moli oku tatela,—

⁸ oco okuyambuiwa kualio kuiya eteke liongongo, okuti okufa, loku tatela, kuenda onjala, kuenje li pia elisi londalu, momo Yehova Suku, u o li tetuluila, wa pama.

⁹ Kuenje olosoma viokilu lieve, vina via linga lalio ukahonga, haivio via kukulola kumuamue lalio, vi li lila loku tata eci vi mola evonge liokupia kualio.

¹⁰ Vi talamela kupãla mekonda liusumba wokuyambuiwa kualio. Vi linga viti, A mai we! A mai we! Imbo linene we! Bavulono imbo lia pama we! Momo episo liove lieya ola yimosi.

¹¹ Ovafũli vokilu lieve va lilavo loku li tatela, momo lomue o landa vali ovikuata vialio,

¹² ovikuata viulu, lopalata, lovawe a tĩla, lolomota viapanga, kuenda ombĩli yovalatanya, lolohusu, lolonanga vioseta, levi vi kusuka, loviti viosi vielemba, kuenda ovikuata viosi viombinga, lovikuata viosi vioviti via tĩla, levi viosipi, levi viutale, levi viovawe a sielena,

¹³ kuenda kanela, lolosimbolua, linsensu, lolonguendu, lekokoto, lovinyu, lulela, kuenda olosema via fina, lotiliku, lolongombe, lolomeme, lotuvalu, lakãlu, kuenda apika, lovimuenyo viomanu.

¹⁴ Elau lia livela utima wove lia ku tunda, lovina viosi vi pepa, levi violonambelo, via ku nyõleha. Ku vi moli vali.

¹⁵ Vakuakufũla ovina evi, okuti vava va muilamo ukuasi, va talamela kupãla mekonda liusumba wokuyambuiwa kualio. Va lila loku litetela,

¹⁶ vati, A mai we! A mai we! Imbo eli linene we! Lia walele ombĩli yovalatanya lolonanga vi kusuka! Lia limianguluile lulu, lovawe a tĩla, kuenda olomota viapanga!

¹⁷ Ukuasi walio wa lua wa nyõleha ola yimosi. Kuenje vakualonaviyu vosi, lava vosi va endela vonaviyu, lakuenje volonaviyu, la vosi vakuanganyu yovokalunga, va talamele kupãla

¹⁸ kuenje va liyula eci va mola evonge liokupia kualio, vati, Imbo lipi lia la soka limbo eli linene?

¹⁹ Va litila eve vovitue osimbu va liyula loku lila loku litetela, vati, A mai we! A mai we! Imbo eli linene we! Vosi va endaela volonaviyu oku fũla va limuisa ukuasi kukuasi walio! Cilo lia nyõleha ola yimosi.

²⁰ Ove ailu, lene alosandu, lene avapostolo kuenda ene avaprofeto, sanjukili eci ca pita lalio. Momo Suku wa li tetuluila oku li pisila eci lio lingi ene.

²¹ Oco ungelo umue wa pama wa yelula ewe limue linene lia soka ndombambo, kuenje wa li imba vokalunga, hati, Haico imbo linene Bavulono li laika oku kunduiwa, kuenje ka li moleha vali.

²² Kuenje olondaka vialimba lolonjimbi kue nda olombendo lolombeta, ka vi yevala vali vokati kove. Layimue omesele yumesele wosi yi moleha vali vokati kove. Ocileñi coku sula ka ci yevala vali vokati kove.

²³ Ocinyi condiyelo ka ci tuila vali vokati kove. Ondaka yohueli leyi yondombua ka vi yevala vali vokati kove. Momo ovafũli vove va kaile vakuonene kilu lieve, kuenda olofeka viosi via kembiwa lumbanda wove.

²⁴ Vokati kalio mua sangiwa osonde yovaprofeto leyi yolosandu, kuenda yomanu vosi va pondiwa kilu lieve.