ESITULUILO 17 - Embimbiliya - Bíblia Sagrada em Umbundu

¹ Oco, kovangelo vaco epanduvali va kala latiyela epanduvali, kua tunda umue weya kokuange, wa popia lame hati, Enju, hu lekise episo liocipuepue cinene cina ca tumala kovava a lua,

² haico olosoma viokilu lieve via pekela laco, lava va tunga kilu lieve va kolua kolua lovinyu viupuepue waco.

³ Oco, osimbu ñasi ve Espiritu, wa nuala kekalasoko. Nda mola ukãi wa tumala kocinyama ci kusuka ngẽ, ce yuka olonduko vioku tomba Suku, haico ca kala lovitue epanduvali lekui liolombinga.

⁴ Ukãi wa wala olonanga vi vumbula levi vi kusuka, wa limiangulula lulu lovawe a tĩla lolomota viapanga. Wa kuata peka okopo yulu haiyo ye yuka evi vi linga onyanya, lavĩho upuepue waye.

⁵ Kupolo waye kua sonehiwa onduko yelumbu okuti Bavulono linene, eye ina ya vakahonga levi vi lingisa onyanya kilu lieve.

⁶ Kuenje nda mola ukãi waco okuti wa kolua osonde yolosandu losonde yolombangi via Yesu. Eci ndo mola nda lisalukako loku komoha ca lua.

⁷ Puãi ungelo waco wa popia lame hati, Wa komohela nye? Hu lomboluila elumbu liukãi, leli liocinyama co veleka, haico ci kuete ovitue epanduvali lolombinga ekui.

⁸ Ocinyama cina wa mola, ca kaile, cilo puãi ka ci kasi vali. Ci laika oku tunda vonjembo loku enda k'Enyõleho. Ava va tunga kilu lieve, okuti vava olonduko viavo ka via sonehiwile velivulu liomuenyo tunde kefetikilo lioluali, va komoha eci va mola ocinyama caco, ndomo ca kaile kuenje cilo ka ci kasi, puãi ci tukuluka vali noke.

⁹ Eci oku lomboloka ci sukila olondunge. Ovitue epanduvali ovio olomunda epanduvali kuna kua tumala ukãi waco,

¹⁰ haivio olosoma epanduvali. Pokati kavio, vitãlo via fa, yimosi lopo yi kasi, yikuavo ka yeyile handi, leci yiya yi tumala ño otuneke tumue ño.

¹¹ Ocinyama cina ca kaile kuenje ka ciko, oco osoma yecelãla, puãi yi tiamela kepanduvali liaco, kuenje yenda k'Enyõleho.

¹² Olombinga viaco ekui, vina wa mola, ovio ekui liolosoma ka via tambuile handi usoma, puãi vi tambula omoko yolosoma ola yimosi kumuamue locinyama.

¹³ Evi vi kuete utima umosi vi eca unene wavio lomoko yavio kocinyama.

¹⁴ Vi katuila Kameme ovita, kuenje Kameme o vi yula, momo eye Ñala yoloñala haeye Soma yolosoma, lava va kasi laye ovo va lalekua loku noliwa, haivo vakuepandi vekolelo.

¹⁵ Wa popia lame hati, Ovava wa mola kuna kua tumala ocipuepue o-o omanu lawiñi lolofeka kuenda alimi aiñi aiñi.

¹⁶ Olombinga ekui wa mola ovio kumue locinyama caco vi suvuka ocipuepue. Viu lingisa ekundu, viu wendisa epõlõla. Ositu yaye va yi takila kuenje vo yoka londalu.

¹⁷ Momo Suku wa tiamisa ovitima viavo koku linga ocipango caye. Va ci linga omo va kuata utima umosi, loku eca usoma wavo kocinyama toke olondaka via Suku vi tẽlisua.

¹⁸ Ukãi una wa mola eye imbo linene li viala olosoma vio kilu lieve.