ESITULUILO 16 - Embimbiliya - Bíblia Sagrada em Umbundu

¹ Kovaso yaco nda yeva ondaka yinene ya tunda vohondo yi kola, ya popia lovangelo vaco epanduvali, yiti, Kuendi, ka pesili kilu lieve atiyela aco epanduvali onyeño ya Suku.

² Ungelo wa tete wa enda, wa pesila etiyela liaye kilu lieve, kuenje kueya apute ãvi ãvi komanu va kuete ondimbukiso yocinyama, haivo va fendela ociñumañuma caco.

³ Ungelo wavali wa pesila etiyela liaye vokalunga, kuenje okalunga ka pongoloka osonde ndeyi yomunu wa fa, kuenje viosi via kala lomuenyo vokalunga via fa.

⁴ Ungelo watatu wa pesila etiyela liaye volondui lo volono viovava, kuenje via pongoloka osonde.

⁵ Nda yeva ungelo wovava wa popia hati, Okuesunga, ove o kasi, haive wa kala ale. O kola, kuenda olonimbu viove wa teta, viesunga.

⁶ Momo omanu va pesela osonde yolosandu lovaprofeto, love wa nyuisa omanu vaco osonde. Ca va sesamela.

⁷ Nda yevavo utala wa linga uti, Ocili, a Ñala Suku Tõlo, olonimbu viove wa teta, viesunga kuenda viocili.

⁸ Ungelo wakuãla wa pesila etiyela liaye kekumbi, kuenje lia ihiwa omoko yoku kakula omanu londalu.

⁹ Omanu va kakuiwa lowuya walio wa lua, kuenje va tondala onduko ya Suku, u o kasi lomoko yafengi a, puãi ka va likekembelele akandu avo loku wiha ulamba.

¹⁰ Ungelo watãlo wa pesila etiyela liaye kocalo cocinyama, kuenje kueya owelema kuviali waco. Omanu va litakila alimi mekonda liolongembia.

¹¹ Va tondala Suku yokilu mekonda liolongembia viavo lapute avo, haimo ka va sumuilile ovilinga viavo vĩvi.

¹² Ungelo wepandu wa pesila etiyela liaye volui lunene Ferati. Oco ovava aluo a takata okuti ku kala onjila yolosoma vi tunda kutundilo wekumbi.

¹³ Kuenje nda mola okuti komẽla yocinyoha kua tunda espiritu lĩvi, ndaño komẽla yocinyama, kuenda komẽla yuprofeto wesanda. Aspiritu aco ãvi atatu a setahala ovinonga.

¹⁴ Momo aspiritu aco aspiritu olo-demónio kuenje a lingainga olondimbukiso. A ñuala ñuala kupãla toke kolosoma violuali luosi, okuti a vi ongoluila ovita vieteke linene lia Suku Tõlo.

¹⁵ Ota, njiya ndocimunu. U ka pekela puãi o lavulula kuenje o lava olonanga viaye ndokuti ka endi epõlõla loku kutiwa osõi, eye wa sumũlũha.

¹⁶ Kuenje olosoma viongoluilua vofeka ya tukuiwa Harmagedo velimi lia Heveru.

¹⁷ Ungelo wepanduvali wa pesila etiyela liaye vofela. Kocalo ca kala vohondo yi kola kua tunda ondaka yinene yiti, Ca pua.

¹⁸ Kuenje kua pita oviliakulo lonjuvungo lovilemĩlo. Kua pitavo ocilemawe cinene, ndokuti tunde kefetikilo liomanu kilu lieve ka kua la kala ocilemawe cinene ndoco.

¹⁹ Imbo linene lia litepa olonepa vitatu, lovaimbo anene olofeka a kunduiwa. Kuenje Suku wa ivaluka imbo linene Bavulono, wa li nyuisa okopo yosi yonyeño yaye ya tokota.

²⁰ Ovifuka viosi via tila, lolomunda ka via molehele vali.

²¹ Kuenje ociwe cakahandangala ca tunda kilu ca lokila omanu, toke omanu va tondala Suku mekonda lieyambulo liociwe, momo lia lua cimue. Okulema kuociwe lociwe kua soka lakui akuãla kolokilu.