ESITULUILO 15 - Embimbiliya - Bíblia Sagrada em Umbundu

¹ Noke nda mola owima ukuavo kilu. Owima waco unene haiwo u komohisa. Ovangelo epanduvali vambata afengi epanduvali, hao a sulako, momo kokuao oko onyeño ya Suku ya tẽlisiwila.

² Oco nda mola cimue ca soka ndokalunga kovitulu ya litenga londalu. Ava va yula ocinyama lociñumañuma caco kuenda o número yonduko yaco, va talama ocipepi lokalunga kovitulu. Vambata povaka olohalupa via Suku,

³ kuenje va imba ocisungo ca Mose, ukuenje wa Suku, locisungo ca Kameme, vati, A Yehova Suku Tõlo, ovilinga viove vinene, kuenda vi komohisa cimue. A Soma yolofeka, olonjila viove via suñama kuenda viocili.

⁴ A Yehova, u ka tava oku ku sumbila loku tumbangiya onduko yove, helie? Momo ove lika o kola. Olofeka viosi viya, vi ku fendela, momo okutetulula kuove kua moleha.

⁵ Kovaso yovina evi nda vanja, kuenje kilu kua yikuluiwa ohondo yi kola yotavernakulu yovisila.

⁶ Vohondo yaco yi kola mua tunda ovangelo epanduvali vana vambata afengi epanduvali. Va wala olonanga vi vela haivio vi nina. Va litika volonulo lovivia viulu.

⁷ Oco cimue koviendalomuenyo viaco vikuãla ca eca kovangelo vaco epanduvali atiyela epanduvali ulu, hao e yuka onyeño ya Suku o kasi lomuenyo oloneke vi enda ño-o hũ.

⁸ Ohondo yi kola ye yuka owisi wa tunda kulamba wa Suku kuenda kunene waye. Kuenje lomue o tẽla oku iñila vohondo yi kola toke afengi ana epanduvali ovangelo epanduvali a pita.