ESITULUILO 14 - Embimbiliya - Bíblia Sagrada em Umbundu

¹ Nda vanja vali kuenje nda mola Kameme o tãi komunda Siono. Ocita lakui akuãla la vikuãla kolohũlũkãi viava va kuete onduko yaye londuko ya Isiaye via sonehiwa kovipolo viavo va tãi kumue laye.

² Oco nda yeva ondaka ya tunda kilu, ya setahala ocileñi covava a lua enene, pamue ondaka yocilemĩlo ca lua. Ondaka nda yeva ya soka nda vakualohalupa viavo.

³ Va imbila ocisungo cokaliye kovaso yocalo lo kovaso yoviendalomuenyo viaco vikuãla lakulu vaco. Lomue o tẽla oku lilongisa ocisungo caco te olohũlũkãi ocita lakui akuãla la vikuãla viavandeti va yovuiwa kilu lieve.

⁴ Ovo, ovo ava ka va livĩhisile lakãi, momo ka va la kuela. Ovo haivo vakuakukuama Kameme kuosi a enda enda. Va yowiwa komanu kuenje va linga apako atete a eciwa ku Suku la Kameme.

⁵ Vovimẽla viavo ka mua sangiwile uhembi, momo va pua atondelo.

⁶ Oco nda mola ungelo ukuavo. Wa kala loku palala vokati kilu. Wambata esapulo liwa liotembo ka yi pui oku sapula komanu va tunga kilu lieve, lo kolofeka viosi, lo kapata osi, lo ku vakualimi aiñi aiñi osi, lo komanu vosi.

⁷ Wa popia lolukandi hati, Sumbili Suku. U wihi ulamba, momo owola yaye yoku tetulula yeya. Fendeli u wa lulika ilu losi lokalunga kuenda olono viovava.

⁸ Ungelo ukuavo, wavali, wo kuama, wa linga hati, Imbo lia Bavulono lia fa! Imbo linene lina lia nyuisa olofeka viosi ovinyu vionyeño yukahonga walio, lia fa!

⁹ Ungelo ukuavo, watatu, wa va kuama, wa popia lolukandi hati, Nda umue o fendela ocinyama lociñumañuma caco, loku kapiwa ondimbukiso yaco kupolo, pamue peka,

¹⁰ eye o nyuavo kovinyu ka via savele vionyeño ya Suku, evi vi li vokopo yonyeño yaye. O yambuiwa londalu lelemba liofuofuo kovaso ovangelo va kola kuenda kovaso a Kameme.

¹¹ Owisi wokuyambuiwa kuavo u londa ño-o kilu oloneke ka vi pui. Ava va fendela ocinyama lociñumañuma caco, kuenda wosi wa kapiwa ondimbukiso yonduko yaco, ka va moli vali epuyuko utanya luteke.

¹² Kulo ku kuete epandi liolosandu, okuti vava va lava lava ovihandeleko via Suku lekolelo lia Yesu.

¹³ Oco nda yeva ondaka ya tunda kilu, ya linga yiti, Eci, ci soneha cokuti, tunde opo ava va fila mu Ñala va sumũlũha. Espiritu hati, Ocili va sumũlũha okuti va puyuka kovopange avo, momo ovilinga viavo vi likuama lavo.

¹⁴ Oco nda vanja kuenje nda mola elende li yela. Kelende kua tumala umue wa setahala omõla omunu. Kutue waye kua kala ekolowa liulu, lo peka omila ya tua.

¹⁵ Ungelo ukuavo wa tunda vonembele, wa vilikiya lolukandi u wa tumala kelende, hati, Imba omila yove kilu lieve, ka kelule, momo owola yoku ungula yeya. Olomema viokilu lieve via yela.

¹⁶ Oco, u wa tumala kelende wa imba omila yaye kilu lieve, kuenje ilu lieve lionguiwa.

¹⁷ Ungelo ukuavo wa tunda konembele yi kasi kilu, layevo wa kala lomila ya tua.

¹⁸ Kutala kua tunda vali ungelo ukuavo wa kala lomoko yoku viala ondalu. Eye wa vilikiya lolukandi ku-u wa kala lomila ya tua, hati, Imba omila yove ya tua. Ka tete ovisiakata viayuva o kilu lieve, momo ayuva aco a pia ciwa.

¹⁹ Oco ungelo waco wa imba omila kilu lieve, wa teta ayuva o kilu lieve, wa a kapa vocikoselo cinene conyeño ya Suku.

²⁰ Ocikoselo caco ca kala konele yimbo. Kocikoselo kua tunda osonde ya pitila toke kololelia viotuvalu, kuenje ya sambuka ovita vitatu lakui avali kolokilometru.