ESITULUILO 13 - Embimbiliya - Bíblia Sagrada em Umbundu

¹ Oco nda mola okuti kokalunga kua tunda ocinyama ci kuete ekui liolombinga lovitue epanduvali. Kolombinga kua kala ekui liakolowa, kuenje kovitue kua kala olonduko vioku tondala Suku.

² Ocinyama nda mola ca setahala ongue, lolomãi viaco via setahala olomãi vio urso, omela ya setahala omela yohosi. Ocinyoha ca ciha unene waco localo caco lomoko ya lua.

³ Kutue umosi kua totiwa ombole, huti ño ca fa ongambu, puãi ca veluka. Kuenje ilu lieve liosi lia komoha ocinyama caco.

⁴ Omanu va fendela ocinyoha momo ca eca omoko yaco kocinyama. Va fendelavo ocinyama vati, Wa lisoka locinyama caco helie? Lu o tẽla oku yaka laco helie?

⁵ Kuenje omẽla ya eciwa kocinyama okuti ci popia olonambelo latonãi, kuenje ca ihiwa omoko akui akuãla kolosãi kolosãi vivali.

⁶ Oco ca asama oku tondala Suku, loku popia atonãi onduko yaye, lotavernakulu yaye, lava va tunga kilu.

⁷ Kuenda vali, ca ihiwa omoko yoku katukila olosandu ovita loku vi yula. Ca ihiwavo omoko yoku viala apata osi lomanu vosi kuenda vakualimi osi lolofeka viosi.

⁸ Vosi va tunga kilu lieve va ci fendela, okuti vosi ava olonduko viavo ka via sonehiwile velivulu liomuenyo lia Kameme ipaiwa, oku sonehiwa osimbu oluali ka lua sevetiwile.

⁹ Nda umue o kasi lovatui a yevelele.

¹⁰ U wa tukuiwila umandekua, enda kumandekua. Lu o ponda ponda losipata o pondiwa losipata. Pokati kolohali ndovio opo pa molehela epandi lekolelo liolosandu.

¹¹ Nda mola ocinyama cikuavo ci kasi loku tunda posi. Ca kala lolombinga vivali ndokameme, kuenje ca popia ndocinyoha cinene.

¹² Ocinyama caco cavali ci kuete omoko yosi yocinyama catete kovaso aco. Ci tiamisa ilu lieve la vosi va tungamo koku fendela ocinyama catete, cina ca kaile lombole ya kaya.

¹³ Ci lingaingavo olondimbukiso vinene okuti, ndaño oku upisa ondalu kilu loku yi lokisila posi kovaso omanu, ci ci tẽla.

¹⁴ Kuenje, mekonda liolondimbukiso vina via cihiwa oku linga kovaso ocinyama catete, ci kembisa ava va tunga kilu lieve. Ci va pañinya okuti ocinyama catete cina ca kaile lepute liosipata puãi haimo ca kala lomuenyo, va ci tungila ociñumañuma.

¹⁵ Ocinyama cavali ca ihiwa omoko yoku fuimila omuenyo vociñumañuma cocinyama catete, cokuti ociñumañuma cocinyama catete ci popia, haico ci pondisa vosi ka va tava oku fendela ociñumañuma cocinyama catete.

¹⁶ Kuenje vosi, ava vatito lava vanene, olohuasi lolosuke, omãla vamãle lovapika, ocinyama cavali ci kapisa ondimbukiso kovaka avo olondio pamue kovipolo,

¹⁷ okuti lomue o tẽla oku landa pamue oku landisa cimue te u o kuete ondimbukiso yokuti onduko yocinyama pamue o nũmero yonduko yaye.

¹⁸ Eci oku lomboloka ci sukila olondunge. U o kasi lolondunge a tende o nũmero yocinyama, momo o número yaco o nũmero yomunu. O nũmero yaco oyo ovita epandu lakui epandu lepandu.