ESITULUILO 12 - Embimbiliya - Bíblia Sagrada em Umbundu

¹ Oco, kilu kua moleha owima unene wukãi wa wala ekumbi, losãi ya kala vemehi liolomãi viaye, kuenda kutue kua kala ekolowa liolombungululu ekui la vivali.

² Eye o misi, wa liyula omo a yeva olongembia vioku cita, kuenje wa livela oku kutuluka.

³ Kilu kua moleha owima ukuavo, wocinyoha cinene haico ci kusuka ngẽ, ca kala lovitue epanduvali kuenda ekui liolombinga. Kovitue viaco kua kala epanduvali liakolowa.

⁴ Ucĩla waco wa komba ombandu yatatu yolombungululu viokilu, kuenje wa vi imba kilu lieve. Ocinyoha ca talama kovaso yukãi wa soka oku cita ndokuti, nda o cita, ci lia omõlaco.

⁵ Ukãi yu wa cita omõla ulume o laika oku pokuisa olofeka viosi lepangati liutale. Omõlaco puãi wa yeluiwa kilu ku Suku lo kocalo caye.

⁶ Ukãi wa tilila kekalasoko oko ku kasi apa Suku o wangiliyila, haipo o tekuiwila ohũlũkãi lovita vivali lakui epandu koloneke.

⁷ Kuenje kilu kueya ovita. Mingeli lovangelo vaye va liyaka locinyõha. Ocinyoha lovangelo vaco va tamalala,

⁸ puãi va yuliwa, lapa va kala vali kilu ka pa molehele.

⁹ Kuenje ocinyoha caco cinene ca takumuiwa, haico onyoha yosiahũlu, yina ya tukuiwa eliapu, haeye Satana, una endaenda oku kemba oluali luosi, haeye wa imbiwa kilu lieve, lovangelo vaye va imbiwa kumosi laye.

¹⁰ Oco, nda yeva ondaka yinene kilu, ya linga yiti, Cilo kua tukuluka epopelo lunene luviali wa Suku yetu lomoko ya Kristu waye. Momo omindiki ya vamanjetu ya tundisiwa, una o va lundaila ño-o ku Suku yetu lutanya luteke.

¹¹ Vo yula losonde ya Kameme kuenda ondaka yuvangi wavo, momo ovimuenyo viavo ka va vi solele, ndaño kueya okufa.

¹² Oco yoleli, ailu lene wa tungimo. Puãi ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.

¹³ Ocinyoha, eci ca limbuka okuti ca imbiwa kilu lieve, oco ca landula ukãi wa cita ulume.

¹⁴ Ukãi puãi wa ihiwa avava avali ongonga yinene yulombo, okuti o palala, o sia onyoha loku tilila kekalasoko oko a ka kala, haiko va ko tekuila otembo lolotembo lomeyu yotembo.

¹⁵ Komela wayo onyoha ya pambela vonyima yukãi ovava ndolui, okuti yu kunyuila volui.

¹⁶ Puãi osi ya kuatisa ukãi, haiyo osi ya asama omẽla, kuenje ya nyua olui lua pamba ocinyoha vomẽla waco.

¹⁷ Oco ocinyoha ca tema lukãi, yu ca enda, ca katuila ovita vakuambuto yaye va supapo, okuti vava va lava ovihandeleko via Suku, kuenje va imbila Yesu uvangi. Kuenje ca talama peseke liokalunga.