ESITULUILO 11 - Embimbiliya - Bíblia Sagrada em Umbundu

¹ Oco va nyiha oluneva lua setahala ombueti, vati, Katuka. Ka seteke onembele ya Suku, lutala waco, lava va fendelamo.

² Puãi ocitali ci kasi kosamua yonembele ci kale ño, ku ka ci seteke, momo ca eciwa kolofeka, kuenje vi kosa kosa imbo li kola akui akuãla kolosãi kolosãi vivali.

³ Ngeca kolombangi viange vivali unene woku popia ovitumasuku ca soka ohũlũkãi kovita vivali kakui epandu koloneke. Osimbu va popia va wala wala ovikelei.

⁴ Olombangi viaco ovio oviti vivali violiveira lolovela vivali, vina vi tãi kovaso a Muẽle ukuailu lieve.

⁵ Nda kuli umue wa yongola oku vi linga lãvi, kolomẽla viavio ku tunda ondalu yi lia ovanyali vavio. Nda kuli umue wa yongola oku va linga lãvi oco o laika oku pondiwa.

⁶ Vi kuete ongusu yoku sitika ilu, ndokuti ombela ka yi loki poloneke violondaka viowanji wavo. Vi kuetevo omoko lovava okuti vi tẽla oku a pongoluisa ha a lingi osonde. Vi tẽlavo oku vetisa kilu lieve afengi osi olonjanja viosi via panga.

⁷ Eci vi malusula owanji wavio, oco ocinyama ci tunda vonjembo ci vi katuila ovita, ci vi yula loku vi ponda.

⁸ Ovivimbi viavio vi kala poluwa luimbo linene, olio va li tukula lespiritu vati, Sodomo kuenda Egito, haiko kua valelua Ñala yavo.

⁹ Oloneke vitatu komeyu omanu va tunda kovaimbo lo kapata, lava vakualimi aiñi aiñi, kuenda vakualofeka viñi viñi, veya, va vanja vanja kovivimbi viaco, oku soleka ovivimbi veyambo ka va tava.

¹⁰ Ava va tunga kilu lieve va yola epembe ovaprofeto vaco vavali, va sanjukila okufa kuavo, va liyolelisako loku liavela olombanjaile, omo ovaprofeto vaco va sakalaisaile ava va tunga kilu lieve.

¹¹ Puãi, kovaso yoloneke viaco vitatu komeyu, ofela yomuenyo ya tunda ku Suku ya va iñila, kuenje va talama vilu, kuenje ava va va mola va kuata usumba wa lua.

¹² Ovo va yeva ondaka ya lua ya tunda kilu, ya popia lavo yiti, Londeli kulo. Kuenje va londa kilu lelende, lovanyali vavo va va mola.

¹³ Powola yaco pa pita ocilemawe cinene, kuenje onepa yekui yimbo ya kupuka. Kocilemawe caco kua fa olohũlũkãi epanduvali komanu. Vakuavo va kuata usumba, kuenje va imba ulamba ku Suku yokilu.

¹⁴ Ohali yavali ya pita. Ohali yatatu yiya ndopo.

¹⁵ Oco ungelo wepanduvali wa sika olumbeta, kuenje kilu kua yevala olondaka vinene, viti, Uviali woluali wa linga uviali wa Suku yetu kuenda wa Kristu waye. Eye o viala oloneke vi enda ño-o hũ, ka vi pui.

¹⁶ Akulu vaco akui avali la vakuãla, vana va tumala kovialo viavo kovaso a Suku, va lituvikapo, kuenje va fendela Suku.

¹⁷ Va linga vati, A Ñala Suku, ove Tõlo, ove o kasi, haive wa kala ale. Tu ku imbila olopandu omo wa kuata unene wove wa lua, kuenje wa fetika oku viala.

¹⁸ Olofeka via fungula puãi onyeño yove yeya, kuenda eteke lioku tetuluila ava va fa laliovo lieya. Kueyavo eteke lioku eca onima kakuenje vove ovaprofeto, lo kolosandu lava va sumbila onduko yove, ava vatito lava vanene, kuenda eteke lioku nyõla ava va nyõla ilu lieve.

¹⁹ Oco onembele ya Suku yi kasi kilu ya yikuluka. Vokati konembele mua moleha ocikasia cocisila caye. Kua pita oviliakulo, lonjuvungo, lovilemĩlo, kuenda ocilemawe, lociwe ca lua.