ESITULUILO 10 - Embimbiliya - Bíblia Sagrada em Umbundu

¹ Oco nda mola ungelo ukuavo wa pama wa tunda kilu, wa wala elende, lo kutue waye kua kala olukongolo. Ocipala caye ca soka ndekumbi, lovolu aye a soka ndolongunji viondalu.

² Peka liaye pa kala okaciña ka nyanyumuha. Wa liata kokalunga lomãi yaye yondio kuenda lomãi yepĩli wa liata kongongo.

³ Wa vilikiya lolukandi lua lisoka ndohosi yi koma. Eci a vilikiya, oco ovilemĩlo epanduvali via lemĩla.

⁴ Leci via lemĩla ovilemĩlo epanduvali nda si oku soneha, puãi nda yeva ondaka ya tunda kilu, yiti, Sitikako ovina via popia ovilemĩlo epanduvali. Ku ka vi sonehe.

⁵ Oco ungelo ndo mola wa liata kokalunga lo kongongo, wa tulika eka liaye liondio kilu,

⁶ kuenje wa lisinga lu o kasi lomuenyo wolotembo ka vi pui, haeye wa lulika ilu levi vi kasimo, losi levi vi kasi kilu liayo, lokalunga levi vi kasimo, hati, Ka ku kala vali oku amisapo,

⁷ puãi kotembo yondaka yungelo wepanduvali, eci a sika, oco ku lumbuluiwa elumbu lia Suku, ndeci a longaisa akuenje vaye ovaprofeto.

⁸ Oco ondaka nda yeva, yina ya tunda kilu, ya popia vali lame, yiti, Kuende, ka tambule ociña ca nyanyumuha peka liungelo wa liata kokalunga lo kongongo.

⁹ Oco nda pitila kungelo, nda popia laye siti, Va nyihe okaciña. Eye wa popia lame hati, Ka tambula, ka lia. Ka lula vimo liove, vomẽla puãi ka sosa ndowiki.

¹⁰ Oco, nda tambula okaciña peka liungelo, kuenje nda ka lia. Vomẽla mua sosa ndowiki, puãi, eci nda ka lia, vimo liange mua lula.

¹¹ Kuenje va sapuila vati, Pa ku kambela vali oku imba owanji weci ciya komanu va lua, lo kolofeka via lua, kuenda ku vakualimi aiñi aiñi lo kolosoma via lua.