ESINUMUĨLO 9 - Embimbiliya - Bíblia Sagrada em Umbundu

¹ Yevelela, a Isareli! Etaili o yoka Yordão kuenje o yaka lomanu va ku velapo kunene lokongusu, o va tundisa vofeka yavo kuenje o piñalamo. Ovaimbo aco anene anene, ovimbaka viao violiokolioko toke kilu.

² Omanu vaco vanene, va lepa haivo ovindululu, wa va kũlĩha ale. Wa yeva ale ndomo oku va tukula omanu va pula vati, Helie o tamalala lomanu vaco ovindululu, va Anaki?

³ Oco etaili limbuka okuti u o ku pitila kovaso, ndondalu yelisi oku yoka, eye Yehova Suku yove. Eye o va nyõla haeye o va lundula love o ci mõla. Oco ove o va hangisamo okuti va nyolẽha lombili, ndeci Yehova a likuminya love.

⁴ Eci Yehova, Suku yove, a va tundisa kovaso yove, ku ka litane lutima wove huti, Omo esunga liange lialua oco Yehova a nyiñisila vofeka yilo oku yi kuata. Momo, oku popia ocili, Yehova oku va tundisa kovaso yove ceyilila omo ahuku avo o-o alua.

⁵ Esunga liove pamue ocili cutima wove hacoko ca ku muisa oku kuata ofeka yaco. Yehova, Suku yove, o kasi loku hangisa omanu vaco kovaso ove omo ahuku avo o-o alua. Yehova o kasi loku ci lingila oku telisa ocisila a lisila lolosekulu viove Avirahama la Isake kuenda Yakoba.

⁶ Oco limbuka okuti Yehova, Suku yove, ka kasi loku ku iha ofeka yilo yiwa omo esunga liove olio lialua, momo ene wakuavitima via siva.

⁷ Ivaluka kuenje ku ka ivaleko ndomo vekalasoko wa nyañumuisa onyeño ya Yehova Suku yove. Tunde keteke wa tundi kofeka ye Egito toke wa pitili kulo, wa ñualelipo ño Yehova.

⁸ Ndaño ko Horeve wa wenguili onyeño ya Yehova, kuenje Yehova wo temeleli enene yu wa sokele oku u nyõli.

⁹ Eci nda londa komunda oku tambula ovitale viovawe, okuti ovitale vi kuete ocisila cina Yehova a lisila lene, oco nda kala komunda akuĩ akuãla kovotanya lakuĩ akuãla kovoteke. Sia lile okulia ndaño oku nyua ovava.

¹⁰ Oco Yehova wa nyĩha ovitale vivali viovawe via sonẽhĩwa lomuine wa Suku. Kovitale viaco kua sonẽhĩwa olondaka viosi Yehova a popia lene kuna komunda. Olondaka viaco via tunda vokati kondalu keteke liohongele.

¹¹ Kefulilo liakuĩ akuãla kovotanya lakuĩ akuãla kovoteke oco Yehova a nyĩha ovitale vivali viovawe, haivio ovitale viocisila.

¹² Oco Yehova wa popia lame hati, Votoka, tunda lombili kulo; momo omanu vove wopa ve Egito va livĩhĩsa, va pambuka lombili vonjila nda va sapuilile; va liluvikiyila ociñumañuma ca itilua.

¹³ Yehova yu wa popia vali lame, hati, Nda limbuka omanu ava, kuenje tala, omanu vaco vakuavitima via siva.

¹⁴ Ci kale ocikele cange muẽle oku va nyõla loku imũla onduko yavo vemẽhi lilu. Kovaso yaco hu lingisa ove ofeka ya velapo kongusu lokunene okuti ovo va sule.

¹⁵ Oco nda ñualãpo kuenje nda loka komunda. Omunda ya taima londalu. Ovitale vivali viocisila via kala povaka ange avali.

¹⁶ Yu nda vanja kuenje tala, wa lingili ekandu ku Yehova Suku yene; wa liluvikiyili ociñumañuma ca itilua congombe; wa pambukili lombili vonjila Yehova o handeleki.

¹⁷ Oco nda kuata ovitale viaco vivali, nda vi nyuña lovaka ange avali kuenje nda vi teya. Lene muẽle wa ci mõli.

¹⁸ Oco nda lituvika posi kovaso a Yehova ndeci nda lingile ale, kuenje haipo nda kala akui akuãla kovotanya lakuĩ akuãla kovoteke. Sia lile okulia ndaño oku nyua ovava, momo wa wenguli onyeño ya Yehova poku u lingila akandu alua levĩho lialua.

¹⁹ Momo nda kuatela ohele onyeño ya Yehova lokutema kuaye kua piãla. Yehova wo temeli muẽle kuenje wa si oku u nyõli. Haimo Yehova wa njeva vali otembo yaco.

²⁰ Yehova wa temelavo calua Arone, wa sokele oku u nyõla. Otembo yaco haiyo nda likutililavo Arone.

²¹ Noke nda nyañula ekandu liene liongombe wa tungili, nda yi yoka vondalu, nda yi keleketa pe loku yi sula toke ya linga ndoneketela. Oneketela yaco nda yimba vokalui ka tunda komunda.

²² Ndaño ko Tavera, loko Masa, kuenda ko Kiviroti Hatawa, wa nyañumuĩli onyeño ya Yehova.

²³ Leci Yehova o katuili ko Kadesi Barnea, hati, Lamani, kuati ofeka nda yĩhi oco wa sinĩli ocihandeleko ca Yehova Suku yene, ka wo koleleli ndaño oku yevelela kondaka yaye.

²⁴ Tunde keteke liatete ndo kulĩhi, wakuakuñualelipo Yehova.

²⁵ Oco nda lituvika posi kovaso a Yehova kuenje haipo nda kala akuĩ akuãla kovotanya lakuĩ akuãla kovoteke. Nda ci lingila omo Yehova a linga hati, Ndi va nyõla muẽle.

²⁶ Kuenje nda likutilila ku Yehova, siti, A Ñala Yehova, ku ka nyõle omanu vove haivo ocipiñalo cove wa yovola lunene wove, Ku ka nyõle omanu vove wopa ke Egito leka lia pama.

²⁷ Ivaluka akuenje vove, Avirahama la Isake kuenda Yakoba. Ku ka vanje kumbinde womanu valo, ndaño kutatasi wavo, ndaño kekandu liavo;

²⁸ sanga ofeka yina omo wa tupa yi linga yiti, Omo Yehova ka tẽla oku va iñisa vofeka a va likuminya, lomo a va nyãle, oco a va tambela loku va ipãilela vekalasoko.

²⁹ Momo ovo omanu vove haivo ocipiñalo cove. Wa cupa lunene wove wa lua lokuokuo kuove kuolõha.