ESINUMUĨLO 8 - Embimbiliya - Bíblia Sagrada em Umbundu

¹ Ocikundi cosi nda ku kundika etaili ci tẽlisa lesunga, okuti o kala lomuenyo, kuenje wiñila loku kuata ofeka Yehova a likuminya oku yeca kolosekulu viove.

² Ivaluka ndomo Yehova Suku yove a ku songuila vekalasoko anyamo aco akuĩ akuãla oku ku ketisa, kuenda oku ku nyika. Wa ci lingila okuti o kulĩha eci ca kala vutima wove, nda hẽ wa panga oku pokola kovihandeleko viaye nda ndati.

³ Wa ku ketisa, wa tava okuti o yeva onjala, wa ku tekula la mana, ocina cimue ove kua kulĩhĩle, ndaño olosekulu viove. Wa ci lingila oco ove o limbuke okuti hakomboloko lika omunu a muĩla omuenyo, puãi cosi ci tunda tunda vomẽla wa Yehova oco omunu a mola laco omuenyo.

⁴ Uwalo wove ka wa ku pulile ketimba, lolomãi viove ka via kaile lovingolongolo kanyamo aco akuĩ akuãla.

⁵ Oco limbuka vutima wove okuti ndeci omunu a longa omõlaye, haico Yehova, Suku yove, a ku longa.

⁶ Oco, pokola kovihandeleko via Yehova, Suku yove, oku endela volonjila viaye loku u sumbila.

⁷ Momo, Yehova, Suku yove, o ku iñisa vofeka yiwa, vofeka yi kuete olondui viovava lolono kuenda atumu a tumõha vovimbota lokolomunda,

⁸ vofeka yotiliku losevata, layuva lakuyu kuenda romeira; vofeka yoliveira lowiki;

⁹ vofeka omu o lialia ombolo, oku lambuka lakamue, lacimue ci ku kambelamo; ofeka yaco ofeka yovawe utale, volomunda viayo o felamo omuambo.

¹⁰ O liola, o kuta, kuenje o sivayaila Yehova, Suku yove, ofeka yiwa a ku yĩha.

¹¹ Lunguka sanga wivala Yehova, Suku yove, poku liweka oku pokola kovihandeleko viaye loviholo viaye, lovisila viaye, evi ñasi loku ku handeleka etaili.

¹² Kuenje pana okuti o kuete ale cokulia kuenje o kuta kuta, wa tungale olonjo viwa kuenje weñilamo,

¹³ leci okuti oviunda viove violongombe levi violomeme lolohombo via licita, lopalata yove lulu wove via linga via lua, okuti cosi cove ci vokayaiwa ño-o,

¹⁴ oco lunguka sanga utima wove u lenda, kuenje wivala Yehova, Suku yove, u wa ku upa vofeka ye Egito, vonjo yupika.

¹⁵ Yehova, Suku yove, wa ku songuila vekalasoko lina linene li lingisa usumba hailio li kuete olonyõha via tema lanyenya, hailio lia kamba ovava. Yehova, Suku yove, haeye wa ku papuila ovava vesenje;

¹⁶ loku ku tekula vekalasoko la mana, okulia kumue olosekulu viene ka via kulĩhĩle. Wa ci lingila oku ku ketisa, loku ku nyika, okuti kefulilo o ku sumũluĩsa, oco lunguka sanga o wivala.

¹⁷ Lunguka sanga o lituna lutima huti, Ongusu yange muẽle lokupama kuokuokuo kuange muẽle, ovio via muĩsa ukuasi ulo.

¹⁸ Ivaluka puãi Yehova, Suku yove, momo eye o ku muĩsa ongusu yoku mõla ukuasi. O ci lingila oku lemũlũla ocisila caye a lisila lolosekulu viove, ndeci ci kasi etaili.

¹⁹ Kuenje etaili muẽle, hu sapuila locili cange cosi okuti, nda wivala Yehova, Suku yove, kuenje o tiamẽla kolosuku viñi oku vi vumba loku vi fendela, o nyõleha muẽle.

²⁰ Ndeci ca nyõlẽha olofeka haico ove o nyõlẽha, momo kua tavele oku yeva ondaka ya Yehova, Suku yove.