ESINUMUĨLO 7 - Embimbiliya - Bíblia Sagrada em Umbundu

¹ Eci Yehova, Suku yene, a wiñisi vofeka wendi oku ka yi kuata, leci o tundisisilimo apata a lua okuti, va Hiti la va Girigasi la va Amori la va Kanana la va Perisi la va Hiwi la va Yevusi, haivo apata epanduvali vo velipo kunene lokongusu;

² leci Yehova Suku yene a eca omanu vaco kokuene, kuenje ene vu va yula, oco vu va nyõla vosi pe. Ka ci tava oku lisila lavo ocisila ndaño oku va linga ohenda.

³ Ka ci tava oku likuela lavo okuti omãla vene akãi vu va eca komãla vavo alume, pamue omãla vavo akãi oku va kuelisa omãla vene alume.

⁴ Momo nda oco vu linga va tindula omãla vene koku fendela ame ha va vumbi olosuku viñi. Kuenje nda oco onyeño ya Yehova nda yo wengukili, kuenje eye nda wo nyõli lombili.

⁵ Puãi eci vu linga lavo, ceci, vu nyõla ovotala avo, vu nyanyõla olongunji viavo vi kola, vu timbula oviti viavo vi kola, kuenje vu yoka vondalu oviñumañuma viavo via songiwa.

⁶ Momo ene vupata li kola ku Yehova, Suku yene. Pokati kapata osi a kasi kilu lieve, Yehova, Suku yene, wo nolipo ene okuti vu linga epata liaye muẽle.

⁷ Yehova ko noleli loku u tekeli omo owiñi wene wa lua, okuti wapata akuavo u sule; momo owiñi wene u sule pokati kapata osi.

⁸ Puãi, omo Yehova u soli, kuenje o kasi loku tẽlisa ocisila a lisila lolosekulu viene, oco Yehova o wupili leka lia pama, yo wo yovoli konjo yupika, peka lia Fareo, osoma ye Egito.

⁹ Oco limbuki okuti Yehova Suku yene, eye muẽle Suku, eye Suku o kolelua haeye Suku o lemũlũla toke kohulũkãi yovitumbulukila ocisila a lisila lava vo sola loku lava ovihandeleko viaye, kuenje haeye Suku o va sola locisola ka ci pongoloka.

¹⁰ Ava vo suvuka puãi, efetuluinyo liaye kokuavo oku va nyõla. Ka leñelela u u suvuka, u fetuluinya kuenje muẽle ka ci tatãla.

¹¹ Oco tẽlisi lesunga ocikundi covisila lovihõlo ndo ci kundiki etaili.

¹² Kuenje omo vu yeva oviholo evi oku vi lava loku vi linga oco Yehova Suku o vu lemũlũila ocisila a lisila lolosekulu viene, kuenje o tẽlisa ohuminyo yaye yoku vu sola locisola ka ci pongoloka.

¹³ Eye o ku sola loku ku sumũluĩsa olomema viove lovinyu viove lulela wove, lombuto yolongombe viove, loviunda violomeme viove. Cosi o ci sumũluĩsila vofeka a lisila lolosekulu oku ku yiha.

¹⁴ O sumũlũha ca piãla, apata osi akuavo ci sule. Pokati kene ka pa kala ulume pamue ukãi osiũle, ndaño pokati kovinyama viene.

¹⁵ Yehova o wupi ovoveyi osi, kuenje ko vetisi uvei umue wovoveyi a vĩha oku Egito, ana wa kulĩhi, puãi o a vetisa vosi vo suvuki.

¹⁶ Kuenje ene vu kundula apata osi Yehova Suku yene eca kokuene. Ovaso eve ka a va fila ocisõi, ka vu vumbi olosuku viavo, momo oco nda co lingili onjanjo.

¹⁷ Nda vu litana lutima, hoti, Apata aco a tu piãla oku lua, tu a tundisa ndati?—

¹⁸ oco ko ka va kuateli usumba. Ivaluki ciwa eci Yehova, Suku yene, a linga la Fareo la va Egito vosi.

¹⁹ Ivaluki ndomo wa tali ohali yalua. Ivalukivo eka lia pama lokuokuo kuolõha kuenda olondimbukiso lovikomo vina Yehova, Suku yene, a wupi lavio. Haico Yehova, Suku yene, a linga lapata osi vu kueteli usumba.

²⁰ Kuenda vali Yehova, Suku yene, o tumisa pokati kavo alimbondo, toke ava va supapo, haivo vo salameli, lavovo va kunduiwa.

²¹ Ka vu va kuatela vali ohele momo Yehova, Suku yene, o kasi lene. Suku yene eye Suku ukuonene, haiye o lingisa cimue usumba.

²² Yehova, Suku yene, o tundisa naito naito omanu kolofeka viaco. Ka ci tava oku va kundula lonjanga sanga ovinyama viusenge viu luili.

²³ Puãi Yehova, Suku yene, o va eca kokuene, kuenje o va sakalaisa enene toke va nyolẽha.

²⁴ Eca peka liene olosoma viavo kuenje ene vu fisa olonduko viavo muosi vemẽhi lilu. Lomue o tamalala lene oku vu yula toke wa va nyõli.

²⁵ Oviñumañuma via songiwa violosuku viavo wu vi yoka londalu. Ka ci tava oku livela opalata pamue ulu woviñumañuma viavo, ndaño oku u likapela, sanga u ku lingila onjanjo momo eci ci linga umbondo ku Yehova, Suku yove.

²⁶ Ka ci tava oku nena cimue ca vĩha vonjo yove, sanga lovevo o vĩhĩsua ndocina caco. O ci suvuka lutima wove wosi, loku ci nyehũla muẽle, momo ca vĩha.