ESINUMUĨLO 6 - Embimbiliya - Bíblia Sagrada em Umbundu

¹ Cilo ndu lomboluili ocikundi cene covisila lovihõlo Yehova Suku yene a sapuila oku u longisi okuti vu vi linga vofeka oko wendi oku ka yi kuata.

² Ndu vi longisi, ene lomãla vene lomãla vomãla vene, okuti vosi vu sumbila Yehova Suku yene poku lingainga ovisila viaye loku pokola kovihandeleko viaye oloneke viosi viovimuenyo viene. Ndu longisi muẽle oku sumbila Yehova Suku yene okuti oloneke viene vi lua.

³ Oco a Isareli, yevelela loku ci kapa vutima. Viosi hu sapuila vi linga, oco o kale ciwa, kuenje epata liove li lua vofeka yi tumõha asenjele lowiki ndeci Yehova, Suku yolosekulu viove, a ku likuminya.

⁴ A Isareli, yevelela. Yehova eye Suku yetu kuenje eye Suku lika waye.

⁵ Oco sola Yehova Suku yove lutima wove wosi, lomuenyo wove wosi, longusu yove yosi.

⁶ Kuenje olondaka evi ñasi loku ku sapuila etaili vi kale vutima wove;

⁷ o longa lavio omãla vove loku vi pitolola, o vi vangula eci o tumãla vonjo yove, leci wenda vonjila, lo poku pekela, lo poku pasuka.

⁸ O vi kutila peka liove ndondimbukiso, kuenje vi linga ndulame kocipala cove.

⁹ O vi sonẽha kovikuli vionjo yove kuenda kolombundi viove.

¹⁰ Eci Yehova Suku yove a ku iñisa vofeka a likuminya lolosekulu viove, Avirahama la Isake kuenda Yakoba, oku ku yiha, —eci a ku iñisa vovaimbo anene awa haveko wa a tunga,

¹¹ leci a ku iñisa volonjo vie yuka ovina viosi viwa, haveko puãi wa vi yukisa, —eci a ku iha ovisimo via felĩwale, haveko wa vi fẽla, leci a ku iha oviumbo viayuva levi violiveira kua kũlihe, —eci o lialia hu kuta,

¹² oco lunguka sanga wivala Yehova, u wa ku upa vofeka ye Egito, vonjo yupika.

¹³ Sumbila Yehova Suku yove; eye o vumba; kuenje oku lisila, lisila londuko yaye.

¹⁴ Ku ka kuame olosuku viñi okuti olosuku viapata a ku ñuala,

¹⁵ momo Suku yove una o kasi love, okuti Yehova, eye Suku yesepa. Oco ku ka kuame olosuku viñi sanga onyeño ya Yehova, Suku yove, yi ku wengukila kuenje o ku nyõla kilu lieve.

¹⁶ Ka ci tava oku nyika Yehova Suku yove ndeci wo nyika ko Masa.

¹⁷ O pokola lepandi kovihandeleko via Yehova Suku yove. O linga ovisila viaye lovihõlo viaye ndeci a ku sapuila.

¹⁸ O linga eci ca sunguluka leci ciwa ku Yehova okuti o kala ciwa, kuenje wiñila oku kuata ofeka yiwa, yina Yehova a likuminya lolosekulu viove oku ku yĩha.

¹⁹ Wiñila tupu wa tundisamo ale anyãli vove vosi, ndeci Yehova a likuminya.

²⁰ Kotembo yokovaso eci omõlove a ku pula, hati, A tate, ovihandeleko lovisila lovihõlo evi Yehova Suku yetu a ku handeleka via lomboloka ndati?—

²¹ ove o kumbulula omõlove, huti, Tua kaile apika va Fareo ve Egito kuenje Yehova wa tu upa ve Egito leka lia pama.

²² Kovaso etu muẽle Yehova wa lekisa ku va Egito kuenda ku Fareo lonjo yaye yosi olondimbukiso lovikomo vinene vioku va fukilisa loku va talisa ohali.

²³ Etu muẽle wa tupa ve Egito ha tu iha ofeka a likuminya lolosekulu vietu oku va iha loku tu iñisamo.

²⁴ Leye Yehova wa tu sapuila oku linga ovisila evi viosi loku sumbila Yehova Suku yetu okuti tu kala ciwa oloneke viosi kuenje eye o tu muisa omuenyo ndeci tu kasi etaili.

²⁵ Kuenje nda tu kala lutate woku telisa ocikundi eci cosi ca tu kundika Yehova Suku yetu, ci tu tendiwila esunga.