ESINUMUĨLO 5 - Embimbiliya - Bíblia Sagrada em Umbundu

¹ Mose wongolola va Isareli vosi kuenje wa popia lavo hati, Ene a va Isareli, yeveleli ovisila kuenda ovihõlo ndu sapuili etaili. Vi yeveleli okuti vu vi patekela loku vi lingainga.

² Eci tua kala ko Horeve Yehova Suku yetu wa lisila letu ocisila.

³ Ocisila caco Yehova ka ci lisilile lolosekulu vietu, te letu muẽle vosi tu kasi kulo lomuenyo etaili.

⁴ Yehova wa kala komunda kuenje wa popia lene ndomunu lomunu, ondaka yaye ya tunda vondalu.

⁵ Kotembo yaco ame nda talama pokati ka Yehova lene oku u sapuili ondaka ya Yehova; momo wa yokokeleli ondalu, kuenje ka wa londeli komunda. Yehova wa popia hati,

⁶ Ame ndi Yehova Suku yove, nda ku upa vofeka ye Egito vonjo yupika.

⁷ Ku ka kale lolosuku viñi, te ame.

⁸ Ku ka lisongele ociñumañuma, pamue esetahãlo lieci ci kasi kilu, pamue lieci ci kasi posi, pamue lieci ci kasi vovava vemẽhi liongongo.

⁹ Ku ka vi fendele pamue oku vi vumba, momo ame Yehova Suku yove ndi Suku yesepa, oku fetuluinya akandu a vaisia ndi a fetuluinya komãla vavo toke kocitumbulukila catatu leci cakuãla cava va suvuka;

¹⁰ puãi sola locisola ka ci pongoloka olohũlũkai viava va sole haivo va lingainga ovihandeleko viange.

¹¹ Ku ka tukule onduko ya Yehova Suku yove lesanda, momo Yehova ka yowisa u o tukula onduko yaye lesanda.

¹² Ivaluka eteke liesambata oku li kolisa, ndeci Yehova Suku yove a ku handeleka.

¹³ Oloneke epandu o talavaya oku linga upange wove wosi;

¹⁴ puãi eteke liepanduvali olio esambata lia Yehova Suku yove. Veteke liaco ku ka lingemo upange, ove muẽle, pamue upika wove ulume pamue upika wove ukãi, pamue ongombe yove, pamue ocimbulu cove, pamue cimue covinyama viove, pamue ukombe o kasi vonjo yove; okuti upika wove wulume lupika wove wukãi va puyuka ndove.

¹⁵ Ivalukavo ndomo wa kaile upika vofeka ye Egito, kuenje Yehova Suku yove wa ku upamo leka lia pama lokuokuo kuolõha; oco Yehova Suku yove a ku handelekela oku lava eteke liesambata.

¹⁶ Sumba so la nyõho, ndeci Yehova Suku yove a ku sapuila; oco oloneke viove vi lua, love o kala ciwa vofeka yi ku ĩha Yehova Suku yove.

¹⁷ Ku ka ipaye.

¹⁸ Ku ka pekelise.

¹⁹ Ku ka ive.

²⁰ Ku ka imbile ukuẽle uvangi wuhembi.

²¹ Ku ka livele ukãi wukuẽle; ku ka livele onjo yukuẽle, pamue epia liaye, pamue upika waye ulume, pamue upika waye ukãi, pamue ongombe yaye, pamue ocimbulu caye, cosi cukuẽle ku ka ci livele.

²² Olondaka evi Yehova wa vi popia lene vosi eci a kala komunda. Ondaka yaye ya kala yinene kuenje ya tunda vondalu lovelende kuenda vowelema. Ka vokinyileko cimue. Eye wa vi sonẽha kovawe avali kuenje wa vi nyĩha.

²³ Eci wa yevi ondaka ya tunda vowelema osimbu omunda ya taima ondalu, oco ene wasongui vosi vapata ene, kuenda ene wakulu weyi ocipepi lame;

²⁴ wa lingi hoti, Ota, Yehova Suku yetu wa tu talisa ulamba waye lunene waye, letu tua yeva ondaka yaye ya tunda vondalu. Etaili tua mõla Suku wa vangula lomunu, kuenje omunu haimo a kasilili lomuenyo.

²⁵ Oco hẽ kaliye tu fila nye? Momo ondalu eyi yinene yi tu lia; nda tu yeva vali ondaka ya Yehova Suku yetu, tu fa.

²⁶ Momo komanu vosi hẽ helie wa la yeva ndetu ondaka ya Suku yomuenyo yi tunda vondalu, puãi wa kala vali lomuenyo?

²⁷ Ove kuende, ka yevelele cosi Yehova Suku yetu a popia, noke wiya, o tu sapuila cosi Yehova Suku yetu a popia love; letu tu ci yeva kuenje tu ci linga.

²⁸ Kuenje Yehova wa yeva olondaka viene, eci wa popi lame; oco Yehova wa popia lame hati, Ame nda yeva olondaka viomanu valo, evi va popia love; va popia muẽle ciwa cosi va vangula.

²⁹ Nda va kuata utima woku sumbila loku lava ovihandeleko viange viosi oloneke viosi, nda ciwa, nda ovo lomãla vavo va kala ciwa olotembo viosi!

³⁰ Oco ka va sapuile huti, Tiukili kolombalaka viene.

³¹ Ove puãi talama kulo lame, hu sapuila ocikundi covisila lovihõlo o va longisa okuti va vi linga vofeka ndi va ĩha okuti yi linga yavo.

³² Oco ci kapeli vutima oku linga ndeci Yehova Suku yene o handeleki. Ko ka pambukili kondio pamue kepĩli.

³³ Endeli vonjila yosi Yehova Suku yene o sapuili oco vu mõle omuenyo, kuenje vu kala ciwa loku luisa oloneke viene vofeka vu ka kuata.