ESINUMUĨLO 4 - Embimbiliya - Bíblia Sagrada em Umbundu

¹ Cilo a Isareli, yevelela kovisila lovihõlo ndu longisi loku vi lingainga, momo nda oco vu linga vu kala lomuenyo, wiñili vofeka Yehova Suku yolosekulu viene o wĩhi kuenje yi linga yene.

² Ko ka yukinyi kondaka ndu handeleki, ndaño oku tepululako, okuti vu lava ovihandeleko via Yehova Suku yene evi ndu handeleki.

³ Ovaso ene a mõlale eci ca linga Yehova ko Baale Peore; momo Suku yene wa nyõla omanu vene vosi va fendelela Baale ko Peore.

⁴ Puãi ene wa kakateli Yehova, Suku yene, vosi wu kasi lomuenyo etaili.

⁵ Tala, ndeci Yehova Suku yange a sapuila haico ndo longisi ovisila lovihõlo okuti wu vi linga vofeka wendeli oku ka yi kuata.

⁶ Vi patekeli loku vi linga, momo poku vi linga opo vu lekisa olondunge viene kuenda ukulĩhĩso wene komanu vaco. Eci va yeva ovisila evi viosi, va linga vati, Ocili, epata linene eli, omanu vaco vakualondunge haivo vakuokulĩhĩso.

⁷ Momo ofeka yipi yinene yi kasi losuku ocipepi lavo ndeci Yehova Suku yetu a kasi ocipepi letu olonjanja viosi tu u vilikiya?

⁸ Kuenda ofeka yipi yinene yi kuete ovisila lovihõlo viesunga ndovihandeleko evi viosi nda eca kokuene etaili?

⁹ Cinene ceci, lunguki, tati ciwa ovitima viene sanga wivali ovina ovaso ene a mõla, kuenje vi tunda vovitima viene oloneke viosi viomuenyo wene. Vi sapuili omãla vene kuenda omãla vomãla vene,

¹⁰ sanga wivali eteke wa talami kovaso a Yehova Suku yene ko Horeve, eci Yehova a popia lame hati, Ngongolola omanu, okuti ndi va yevisa olondaka viange, ha va lilongisa oku sumbila oloneke viosi viomuenyo wavo kilu lieve, kuenda oku longisa omãla vavo.

¹¹ Kuenje wa amẽli ocipepi, wa talami kepato liomunda, osimbu omunda ya taima londalu yoliokolioko toke kilu, kuenje kilu kua tekãva lalende lowelema wowi.

¹² Yehova wa kala vondalu kuenje wa popia lene, lene wa yevi ocileñi colondaka puãi ka wa muĩli cimue, ondaka lika wa yevi.

¹³ Wo sapuili ocisila caye, kuenje wo handeleki hati, Ci lingaingi. Ocisila caye o sapuili oco ovihandeleko ekui. Wa vi sonẽha kovawe avali.

¹⁴ Kotembo yaco Yehova wa ñundika oku u longisi ovisila lovihõlo, okuti vu vi lingainga vofeka wendi oku ka yi kuata.

¹⁵ Oco lilavi ciwa. Omo ka wa muili cimue eteke Yehova a kala vondalu vo Horeve kuenje wa vangula lene oco lunguki;

¹⁶ sanga wu livĩhĩsa loku lisongela ociteka cesetahãlo limue pamue liulume pamue liukãi,

¹⁷ pamue liocinyama cimue ci kasi kilu lieve, pamue lionjila yimue yi pãlala vilu,

¹⁸ pamue liocipuka cimue ci likoka posi, pamue esetahãlo liolusi lumue lu kasi vovava vemẽhi liongongo.

¹⁹ Lungukivo sanga vu petuila ovaso ene kilu, kuenje eci vu mõla ekumbi losãi lolombungululu okuti, ovisoko viosi viokilu evi Yehova Suku yene a sovuila omanu vosi va kasi vemẽhi lilu, vu tambiwa lavio, kuenje vu vi fendela loku vi vumba.

²⁰ Puãi Yehova wo nõli ene, kuenda wo wupi vofolono yutale okuti ve Egito, ho lingi omanu vaye muẽle ndeci vu kasi etaili.

²¹ Kuenda vali, omo ahuku ene alua oco wa funguila ame, kuenje wa lisinga okuti si yoka Yordão, ndaño oku iñila vofeka yiwa yina Yehova Suku yene a wĩhi ha yi lingi yene.

²² Momo cange oku fila vofeka yilo, si yoka Yordão; ene puãi vu yoka, wiñili loku tunga vofeka yaco yiwa.

²³ Lilavi ciwa sanga wivali ocisila Yehova Suku yene a lisila lene, kuenje vu lisongela ociteka cesetahãlo limue Yehova Suku yene a vu lemẽla.

²⁴ Momo Yehova Suku yene eye ondalu yi lialia elisi, haeye Suku yesepa.

²⁵ Eci vu kala lomãla vene kuenda omãla vomãla vene, leci vu kukila vofeka, nda vu livĩhĩsa loku songa ociteka cesetahãlo limue loku lingila cĩvi kovaso a Yehova Suku yene okuti eye o vu temẽla,

²⁶ ndu sapuila muẽle etaili okuti vofeka yokesinya lia Yordão omo wendi oku ka yi kuata ndopo vu nyolehẽlamo. Ka vu kalamo osimbu puãi vu nyolẽha muẽle pe. Ilu losi vi linga olombangi viange.

²⁷ Ava va supa pokati kene Yehova o va sandola pokati kolofeka. Vu kali ño vañamiñami volofeka omo Yehova a vu tuma.

²⁸ Oko vu ka vumba olosuku viuti levi viewe via songiwa lovaka omanu; ka vi lete, ka vi yevi, ndaño oku lia, pamue oku lehũla.

²⁹ Puãi haiko vu vanjiliyila Yehova Suku yene kuenje nda vu u vanjiliya lutima wene wosi lomuenyo wene wosi vu u sanga.

³⁰ Eci vu kasi ale kohali okasimbu kuenje ovina evi viosi vio veti oco vu tiukila ku Yehova, Suku yene, kuenje vu yeva ondaka yaye.

³¹ Momo Yehova, Suku yene, eye Suku yohenda; ka vu tokoka, pamue oku vu nyõla, ndaño oku ivala ocisila a lisila lolosekulu viene.

³² Puli handi koloneke via pita tunde keteke Yehova a sovola omunu kilu lieve eci ene ka wa citiwili handi. Puli nda hẽ kua la pita, pamue kua la yevala, ocikomo ndeci. Ci pulivo kovailu tunde kocivanja eci toke kocivanja cikuavo.

³³ Kuli hẽ omanu va la yeva ndene ondaka ya Suku yi tunda vokati kondalu kuenje va kala lomuenyo?

³⁴ Kuli hẽ osuku yimue ya la seteka oku enda oku ka liupila epata vokati kepata likuavo ndeci Yehova Suku yene a linga? Ene muẽle wa moli lovaso ene ndeci Yehova a enda ke Egito kuenje wo wupilili lohali kuenda ovindekaise lovikomo lovita kuenda eka lia pama lokuokuo kuolõha levi vi yokokisa.

³⁵ Ca lekisua kokuene oco vu kulihe okuti Yehova, eye Suku, ukuavo ka kuli te eye lika.

³⁶ Tunde kilu wo yevisi ondaka yaye oku vu longa. Kilu lieve wo lekisi ondalu yaye yelungulungu, kuenje wa yevi olondaka viaye vokati kondalu.

³⁷ Kuenje omo a sola olosekulu viene loku nola ombuto yavo, lomo eye muẽle a wupi ve Egito lunene waye wa lua;

³⁸ kuenje wa lupuisa kovaso yene apata o velipo kunene kuenda kongusu okuti o wiñisi ene vofeka yavo kuenje yi linga yene, ndeci ci kasi etaili,

³⁹ oco etaili limbuki loku ci patekela vovitima okuti Yehova eye Suku kilu loposi, ka ku li ukuavo.

⁴⁰ Oco lavi ovisila viaye lovihandeleko viaye, evi ndu wihi etaili, okuti ci kala ciwa lene lomãla vene vo kuãi, kuenje oloneke viene vi lua vofeka Yehova Suku yene a wĩhi ha yi lingi yene oloneke vi enda ño hũ.

⁴¹ Eci Mose a mala oku popia oco wa tepa ovaimbo atatu asinya lilo lia Yordão, kutundilo wekumbi;

⁴² okuti oko ku tilila omondi ya ipa ukuavo puãi ka ci pangele, ka ya la kala laye lesuvu. Nda yi tilila vimbo limue pokati kao yi kala lomuenyo.

⁴³ Ovaimbo aco ya: Becere vekalasoko ketapi, olio lia va Ruvene; la Ramote ko Gileada, olio lia va Gadi; la Golane ko Basiane, olio lia va Manase.

⁴⁴ Onepa tu fetika ndeti yi lombolola ovihandeleko Mose a eca ku va Isareli,

⁴⁵ yi lombololavo ovihandeleko lovisila lovihõlo Mose a kundika ku va Isareli eci va tunda ke Egito.

⁴⁶ Wa vi popia eci va Isareli va kala konele ya Yordão yutundilo, eci va kala vocimbota ca imba ovaso ko Bete Peore vofeka ya Sihoni, Soma ya va Amori wa tungile vo Hesibone. Mose la va Isareli va yula Soma yaco eci va tunda ke Egito.

⁴⁷ Va kuata ofeka yaye kuenda ofeka ya Oge, Soma ya Basiane. Olosoma viaco vivali ovio olosoma via va Amori. Ofeka yavo ya kala konele ya Yordão yutundilo.

⁴⁸ Ofeka yavo yi fetikila ko Aroere li kasi konele yomuva ya Arinone kuenje yenda toke komunda Sirione. Onduko yikuavo ya Sirione, Herimone.

⁴⁹ Kofeka yavo kua tiamavo enyala liosi li kasi konele ya Yordão yutundilo toke ko Kalunga Komongua kepato liomunda Pisiga.