ESINUMUĨLO 34 - Embimbiliya - Bíblia Sagrada em Umbundu

¹ Oco Mose wa tunda kenyãla lia Moavi kuenje wa lamanela komunda Nevo, toke konumbuko ya Pisiga ya imba ovaso ko Yeriko. Kuenje Yehova wo lekisa ofeka yosi, tunde ko Gileada toke ko Dani,

² okuti ofeka yosi ya Nafitali, leyi ye Efarimi la Manase, lofeka yosi ya Yuda, toke kokalunga kutakelo.

³ Wo lekisa ofeka yoko Sul, leyi yo kenyala liomuva ya Yeriko imbo lioviti viondende, toke ko Coara.

⁴ Yehova wa popia laye hati, Oyo ofeka nda likuminya la Avirahama la Isake kuenda Yakoba, siti, Ndi yeca kombuto yove. Nda tava okuti o yi mõla lovaso, puãi ku iñilamo.

⁵ Oco Mose, ukuenje wa Yehova, wa fila vofeka ya Moavi, ndeci ca popia Yehova.

⁶ Kuenje wo kenda vocimbota covofeka ya Moavi, ca imba ovaso ko Bete Peore. Puãi toke etaili lomue wa kulĩha apa pa kasi eyambo liaye.

⁷ Mose wa kala locita kakuĩ avali kanyamo eci a fa, puãi ovaso aye ka a vuvalele, ndaño ongusu yaye ka ya tepulukile.

⁸ Va Isareli vo lila akuĩ atatu koloneke, vanyãla a Moavi, kuenje oloneke vioku lila Mose loku u liyuila via tẽla.

⁹ Kuenje Yehosua, omõla a Nune, we yuka le Espiritu liolondunge, momo Mose wo wimbilile ale ovaka aye. Oco va Isareli va pokola kondaka yaye kuenje va linga ndeci Yehova a sapuila Mose.

¹⁰ Tunde kotembo yaco, vo Isareli ka mua la mõlẽha vali uprofeto wa soka la Mose, okuti umue Yehova a vangula laye omẽla lomẽla.

¹¹ Ka mua la mõlẽha vali ukuavo wa tumiwa ndeye la Yehova oku lingila olondimbukiso lovikomo vofeka ye Egito, loku vi lingila Fareo lakuenje vaye vosi lofeka yaye yosi.

¹² Vo Isareli ka mua la kala vali ukuavo wa lisoka la Mose, ci kale kolohõlo viaye vialua, ci kale kovilinga vinene a linga, ci kale kovikomo a komohĩsa lavio va Isareli vosi.