ESINUMUĨLO 33 - Embimbiliya - Bíblia Sagrada em Umbundu

¹ Esumũlũho Mose, ukuenje wa Suku, a sumũluĩsa lalio va Isareli osimbu ka file handi lieli,

² hati, Yehova wa tunda ko Sinai, wa kala ko Seire kuenje wa tu tuila. Ocinyi caye ca tu tuila tunde komunda Parane. Pokati kekui liolohulũkãi viava vaye va kola opo a tunda. Weya tupu peka liaye liondio pali ondalu yi taima.

³ Wa sola ocili omanu vaye. Olohoka viaye vi kola via kala povaka aye. Oco via kuama volomãi viove kuenje via songuiwa love,

⁴ eci Mose a tuiha ovihandeleko vi tiama ku va Yakoba vosi.

⁵ Oco Yehova wa linga Soma vi Isareli eci apata osi a va Isareli kumosi lasongui vavo vongoloka pamosi.

⁶ Ruvene a kale lomuenyo, ka ka fe, ndaño alume vaye ka va ka linge vañamiñami lika.

⁷ Wa popia la Yuda, hati, A Yehova, yevelela ondaka ya Yuda, kuenje u nena komanu vaye. U kuatisa lovaka ove. U kuatisa oku yaka lovanyãli vaye.

⁸ Oku tukula Lewi wa popia hati, Tumimi yove yeca ku Lewi, Urimi yove yeca ku U wove o kola, una ove wa nyika ko Masa, haeye wa litamãlãla laye kovava a Meriva,

⁹ haeye wa tukula isiaye lainaye hati, Sia va kũlĩhĩle. Wa pañula vahuvaye, ndaño omãla vaye ka va kapeleko. Momo va patekela ondaka yove, loku lava ocisila cove.

¹⁰ Va longisa ovihõlo viove ku Yakoba, lovihandeleko viove ku Isareli. Va ku timĩhĩla insensu, va kapa ocilumba coku pia elisi kutala wove.

¹¹ A Yehova, sumũluĩsa ukuasi waye. Tava kupange wovaka aye. Nyanyõla oviongo viovanyali vaye vo suvuka, vi nyanyõla okuti lalimue eteke vi sakuiwa vali.

¹² Oku tukula Benjamini wa popia hati, ukuacisola ca Yehova. O tunga laye, o hindingila. Eteke liosi Yehova u ñuala kuenje o tunga kovitai viaye.

¹³ Oku tukula Yosefe wa popia hati, Yehova a sumũluĩse ofeka yaye, a yi sumũluĩse loviali via velapo vi tunda kilu levi via velapo vialondo o posi;

¹⁴ a yi sumũluĩse lolomema via velapo vi kula lutanya, lovaima wungula osaĩ kosãi;

¹⁵ a yi sumuluĩse lovikũla via velapo vi tunda kolomunda viosiãhũlu, kuenda elombolo li lombuiwa koviwulu ka vi pui;

¹⁶ a yi sumũluĩse loviali via velapo viongongo lokuima kuayo, a yi sumũluĩse lesumũlũho liu wa kala vocisapa. Asumũlũho alo a wile kutue wa Yosefe, a wile muẽle konumbutue yu wa velapo pokati ka vamanjaco vosi.

¹⁷ Nuñulu yocunda caye oyo onui yuwale. Olombinga viaye via soka lolombinga viomalanga. O toma lavio olofeka viosi vi kasi palo posi. Tala ekuĩ liolohũlũkãi via Efarimi! Tala olohũlũkãi via Manase!

¹⁸ Oku tukula Sevulono wa popia hati, A Sevulono, sanjukila okutunda kuove. Love, a Isakare, sanjukila olombalaka viove.

¹⁹ Va kovonga omanu oku iya komunda yavo kuenje haiko va lumbila ovilumba via tukuiwa. Momo va lia elau liovokalunga, lovokuasi a vundisua veseke.

²⁰ Oku tukula Gadi wa popia hati, U wa luisa Gadi a sumũluĩsue! Gadi yi yomba ndohosi yomange, yi suyulula okuokuo kuenda onumbutue.

²¹ Onepa ya velapo yofeka wa yi linolela eye muẽle. Momo oko kua tepiwa onepa yu o songola. Weya kasongui vomanu kuenje wa tẽlisa ovihandeleko via Yehova lovisila viaye viesunga, vina a eca ku Isareli.

²² Oku tukula Dani, wa popia hati, Dani okahosi. Ka somboka ko Basiane.

²³ Oku tukula Nafitali wa popia hati, A Nafitali, ove wa lingiwa ale ohenda haive we yuka esumũlũho lia Yehova. Ove o kuata ociva lofeka yoko Sul.

²⁴ Oku tukula Asiere wa popia hati, Pokati komãla vosi Asiere a sumũlũhe ca velapo. Vamanjaye vo sole ca velapo. Ofeka yaye yi kuate ukuasi woviti violiveira.

²⁵ Ovikundiko viove vi kala viutale losipi. Ongusu yove yi soka loloneke viove.

²⁶ Okuesunga Isareli, ka kuli ukuavo wa lisoka la Suku u o katuka luwale waye, kuenje o pita kovailu oku ku kuatisa.

²⁷ Suku yomuenyo wenda hũ eye ocitungilo cove. Ovoko aye a ku angata. Eye wa lupuisa ovanyãli kovaso yove. Wa popia hati, Nyõla!

²⁸ Oco Isareli wa tunga loku koka. Vofeka yolomema lovinyu vio kaliye omo Yakoba a litungila loku koka. Ocili ovailu aye a loluka owume.

²⁹ Wa sumũlũha, a Isareli! Helie wa lisoka love? Ove vupata lia yovuiwa la Yehova, Yehova eye otevele yepopelo liove, haeye osipata ya ku yulisa. Anyãli vove va lieca kokuove. Love o kasa kolonumbuko viavo.