ESINUMUĨLO 32 - Embimbiliya - Bíblia Sagrada em Umbundu

¹ Kuluili ovatuĩ, ãvailu, oco mopie. Kuenda osi yi yeve olondaka viomẽla wange.

² Ovilongua viange vi loku ndatosi ombela. Londaka yange yi loke ndowume, pamue ndokalupe ka sosuĩla kilu lionjombia, pamue ndombela yi lokila kovikũla.

³ Momo njevalisa onduko ya Yehova! Hindikisi unene wa Suku yetu.

⁴ Eye Handa, lupange waye wa lipua. Momo olonjila viaye viosi viesunguluko. Haeye Suku yocili, ka kuete etime. Ukuesunga, wa suñama cimue.

⁵ Vo lueyela. Ka va lingi vali omala vaye omo atondelo avo alua. Ocitumbulukila caco ocitumbulukila cumbinde, haico covilinga via penga.

⁶ Ene aveke, haene wa pui olondunge, ovio olopandu viene ovio ku Yehova? Heyeko hẽ So wa ku lulika? Heyeko hẽ wa ku sovola, loku ku tungisa?

⁷ Ivaluki kosiãhulu. Sokololi anyamo ovitumbulukila via lua. Pula so, eye o ku lomboluila. Pula akulu vove kuenje va ku ci sapuila.

⁸ Eci Tõlo amũla ovipiñalo kapata, leci a tepisa omanu ha va lingi olofeka, oco wa kapela omanu olongave via soka lowiñi womala va Suku.

⁹ Momo onepa ya Yehova oyo omanu vaye va Yakoba. Va Isareli ovo va linga ocipiñalo caye ca noliwa.

¹⁰ Wa va sanga vekalasoko, vekango li ñoña. Wa va ñuala ocingonja, kuenje wa va tata. Wa va lava ndomoliso liaye.

¹¹ Ndeci ongonga yulombo yi sanyulũla ocanju cayo, loku vakuilila ivuvu viayo, kuenje yi nyanyumuĩla avava ayo loku vi yakela, ha yi vi ambatela koñoño yayo,

¹² haico Yehova wa va songuila. Ka va endele losuku yungendeleyi.

¹³ Wa va songuila toke kolonumbuko viofeka, kuenje va lia ovaima ovapia avo. Wa va sipisa owiki kesenje, kuenda ulela kesenje liewe.

¹⁴ Wa va tekula longundi yolonjindi lasenjele olomeme, kuenda lulela wolomeme lotumala tuavio. Wa va tekula lositu yolonupi viombuto ya Basiane, leyi yolohombo, kuenda losema ya velapo yotiliku. Wa va kamisa ayuva kuenje va nyuako ovinyu viaco.

¹⁵ Puãi Ukuesunga Isareli wa linetisa, wa tusula. Ove wa linetisa, wa sapa, wa kuta etimba lia salala. Oco wa yanduluka Suku, Usovoli waye. Yu wa pembula Handa yeyovo liaye.

¹⁶ Va wenguila Yehova esepa poku fendela olosuku viñi. Vo temisa lovombondo avo.

¹⁷ Va lumba lumba ovilumba kovilulu okuti havioko Suku. Va lumbaila kolosuku ka va kulĩhĩle, haivio olosuku viokaliye vieya ndopo, okuti ndaño olosekulu viene ka va vi kulĩhĩle.

¹⁸ Wa ivala Handa wa ku cita. Suku wa ku sovola wo wivala muẽle.

¹⁹ Yehova wa ci mõla, kuenje omo omãla vaye valume lomãla vaye vakãi vo temisa,

²⁰ oco wa va pañula hati, Ndi va wundisila ocipala cange, kuenje mbanja efulilo liavo nda li kala ndati. Momo ocitumbulukila cavo ocitumbulukila cumbinde. Omãla vaco vakualukonyo.

²¹ Va mbuenguila esepa leci ha sukuko. Va ndingisa onyeño lovina viavo viesanda. Oco ame ndi va muĩsa esepa liava hamanuko, ndi va lingisa onyeño lomanu vakuanumbi.

²² Momo ondalu ya wenguka lonyeño yange, kuenje yi taima toke kosi yonjembo. Yi nyõla oluali lovaima aluo. Yi timiha oviseveto violomunda.

²³ Ndi va lundikila avĩho. Ndi va asa lovisongo viange viosi.

²⁴ Va lambuka lonjala, va kakuiwa lowuya. Va fa lefengi. Ndi va tumisa ovinyama vi va takĩla, kuenda owule wolonyõha vioposi.

²⁵ Posamua osipata yi kundula. Vokati eci ci yokokisa oco ci lua. Vi nyõla vosi, locipombokuenje kuenda ufeko, loñaña yokavele kuenda osekulu yowele.

²⁶ Nda nda popele siti, Nda va sanduila kupãla. Ndinga okuti ka va ivalukiwa vali pokati komanu;—

²⁷ puãi nda kaile lohele sanga ovanyali vavo va ci yola epembe. Nda kaile lohele sanga ovanyãli vavo va sima eci hacociliko kuenje va popia vati, Tua yula lovaka etu, eci cosi ha Yehovako wa ci linga.

²⁸ Momo omanu vaco va kamba ukũlĩhĩso. Lolondunge ka va kuete.

²⁹ Nda va kaile lolondunge, eci cosi nda ca va lomboloka, nda va limbuka ocili efulilo liavo.

³⁰ Nda ci tava ndati okuti umosi o lundula ohulukãi, pamue vavali va lupuisa ekuĩ liolohũlũkãi, nda Handa yavo ka va landisile pamue Yehova ka va ecelele?

³¹ Momo ohanda yavo ka yi kasi nda Handa yetu. Ndaño ovanyãli vetu va cimbila uvangi.

³² Momo uyuva wavo uyuva woko Sodoma, pamue wokovapia a Gomora. Layuva avo ayuva owule. Ovisiakata viao vi lula pue.

³³ Ovinyu viavo via soka ndowule wolonyõha haiwo owule u kola wa nalili.

³⁴ Eci hẽ, ka ca solekiwile lame, ka ca solekiwile kumosi lovokuasi ange?

³⁵ Cange oku fetuluinya ndaño oku eca onima. Naiyilili ale eteke olomãi viavo vi sielũha. Momo eteke liokukunduiwa kuavo li kasi ocipepi. Okunyõlẽha kuavo kuiya lonjanga.

³⁶ Momo eci Yehova a mõla okuti unene wavo wa pua, leci a mõla okuti ka pa va supila ndaño umosi, ci kale upika, ci kale omamale, oco Yehova o tetuluila omanu vaye, kuenje o linga akuenje vaye ohenda.

³⁷ Keteke liaco o pula hati, Olosuku viavo hẽ vi kasi pi, vina via linga ewe liavo lioku salama?

³⁸ Vi kasi pi olosuku viavo vina via lialia alenda ovilumba viavo, haivio via nyuanyua ovinyu viovilumba viavo viokunyua? Vi pasuke! Vi ku kuatise! Vi linge ocikolo cove!

³⁹ Oco cilo limbuki okuti Ame, Ame muẽle, Suku yocili. Ka kuli Suku yikuavo te ame. Ame njipaya, haime ngeca omuenyo. Ame ndi tota, haime sakula. Lomue o tẽla oku popela omunu peka liange.

⁴⁰ Momo nulika eka liange vilu, kuenje, ndeci ñasi lomuenyo wenda ño hũ, ndi lisinga siti,

⁴¹ Nda ndepika osipata yange yi ñañala, kuenje eka liange li fetika oku yambula, oco fetuluinya ovanyãli vange, kuenje ngeca onima kuava va suvuka.

⁴² Ovisongo viange ndi vi koluisa losonde, haiyo osonde yava va ipaiwa kuenda yolomandekua. Osipata yange yi lia ositu yovanyãli, haivio vakuaciñonya ca lepa.

⁴³ Ene alofeka sivayi omanu vaye, momo o fetuluinya osonde yakuenje vaye. O yambula ovanyãli vaye, kuenje upa eko liofeka yomanu vaye.

⁴⁴ Oco Mose weya kuenje wa tangela omanu olondaka viosi viocisungo eci, eye la Yehosua, omõla a Nune.

⁴⁵ Eci Mose a mala oku tangela va Isareli vosi olondaka evi viosi,

⁴⁶ oco wa popia lavo hati, Kapi vovitima viene olondaka viosi ndo vi tangeli etaili, Vi kapa muẽle vovitima viene okuti vu vi lombolola komãla vene, kuenje omãla vene va pokola lutate kolondaka viosi viovihandeleko evi.

⁴⁷ Momo olondaka evi kokuene hacimueko citito puãi olondaka evi omuenyo wene. Momo nda vu pokola ocili kolondaka evi oco vu kala osimbu vofeka vu yakela Yordão oku yi kuata.

⁴⁸ Eteke liaco hailio Yehova a popia la Mose hati,

⁴⁹ Londa omunda yilo ya Avarime, haiyo omunda Nevo, yi kasi vofeka ya Moavi, ya imba ovaso ko Yeriko. Ka tale ofeka ya Kanana, yina ngeca ku va Isareli ha yi lingi ocipiñalo.

⁵⁰ Komunda yaco o londa haiko o fila. Wenda o vandekiwa kolosekulu viove, ndeci Arone huvove a fila komunda Horo kuenje wa vandekiwa kolosekulu viaye.

⁵¹ Ove o fila omo wa ndueyela pokati ka va Isareli kovava a Meriva Kadesi, kekalasoko lia Cina. Momo kua ndekisile esumbilo lia sesamẽla pokati ka va Isareli.

⁵² Ofeka yaco o yi muila kupãla, puãi oku iñila vofeka ngeca ku va Isareli, ku iñilamo.