ESINUMUĨLO 31 - Embimbiliya - Bíblia Sagrada em Umbundu

¹ Oco Mose wamisako olondaka a kala loku popia la va Isareli vosi.

² Wa popia lavo hati, Etaili ndukuacita canyamo kanyamo akuĩ avali. Si tẽla vali oku ñuala ñuala. Yehova wa popia lame, hati, Ku yoka Yordão.

³ Yehova, Suku yove, eye muẽle o ku pitila kovaso, haeye o nyõla olofeka evi kovaso ove, okuti ove o vi kuata. Yehosua eye o linga usongui wove, ndeci Yehova a popia.

⁴ Kuenje Yehova o linga lavo ndeci a lingile la Sihoni kuenda Oge, olosoma via va Amori, kuenda ndeci a linga lofeka yavo eci a va nyõla.

⁵ Yehova o va eca kokuene kuenje ene oco vu linga lavo ndocikundi cosi ndo wihi.

⁶ Kolisiko. Kuati utõi, ko ka kuati usumba, ndaño oku va lulumĩla. Momo u endela kumue love eye Yehova Suku yove. Eye ka ku tokoka, ndaño oku ku yanduluka.

⁷ Oco Mose wa kovonga Yehosua kuenje wa popia laye kovaso a va Isareli vosi, hati, Kolisako, kuata utõi. Momo ove wiñila lomanu valo vofeka Yehova a likuminya lolosekulu viavo oku va yĩha; haive o va yi piñalĩsa.

⁸ Yehova eye o ku pitila kovaso, eye o kala love, ka ku tokoka, ndaño oku ku yanduluka. Ku ka kuate usumba, pamue oku konyoha.

⁹ Mose wa sonẽha ovihandeleko vilo kuenje wa vi eca kovitunda, va Lewi, ava vambayata ocikasia covisila via Yehova. Wa vi ecavo kovakulu vosi va Isareli.

¹⁰ Kuenje Mose wa va sapuila, hati, Kafulilo anyamo epanduvali epanduvali, kotembo ya tukuiwa yunyamo wongecelo, kofesta yolosinge,

¹¹ eci va Isareli vosi veya oku tukulukila ku Yehova, Suku yove, kocitumãlo a nola, oco kotembo yaco o tangela va Isareli vosi ovihandeleko evi.

¹² Ongolola omanu vosi, okuti alume lakãi lomãla, lovingendeleyi vi kasi vovaimbo ove, okuti va yevelela loku lilongisa oku sumbila Yehova, Suku yene, kuenje va panga oku tẽlisa lutate olondaka viosi viocihandeleko cilo.

¹³ Vongolola okuti omãla vavo, ava ka va ci kũlĩhĩle, va yevelela, loku lilongisa oku sumbila Yehova, Suku yene, oloneke viosi vu kala vofeka vu yokela Yordão oku yi kuata.

¹⁴ Yehova wa popia la Mose hati, Ota, oloneke viove via pitila okuti o fa. Pañinya Yehosua, kuenje kavali kene wiyi vombalaka yoku ñualehela la Yehova okuti ndu wiha ocikundi. Oco Mose la Yehosua va enda, va limolehisa vombalaka yoku ñualehela la Yehova.

¹⁵ Yehova wa tukuluka vombalaka, vongunji yelende; longunji yelende ya kala kilu liuvelo wombalaka.

¹⁶ Yehova wa popia la Mose hati, Tala, ndopo ove o pekela lolosekulu viove. Kovaso yaco omanu valo o fetika oku linga ukahonga lolosuku wiñi viofeka oko va enda oku kala. Ame va njanduluka. Va nyõla ocisila cange nda lisila lavo.

¹⁷ Oco onyeño yange yi va wengukila eteke liaco. Ndi va yanduluka, ndi va wundisila ocipala cange, kuenje va liwa. Ovina via lua vĩvi lohali vi va wila okuti eteke liaco va linga vati, Ovina viaco vĩvi hẽ ka via tu vetelele omo Suku yetu ka kasi pokatu ketu?

¹⁸ Eteke liaco omo evĩho va linga, poku tiamẽla kolosuku viñi, olio lialua, oco mbundisila ocipala cange.

¹⁹ Oco cilo ove, soneha ocisungo eci, loku ci longisa va Isareli. Va ci lilongise, okuti ocisungo eci ci linga ombangi yange yoku pisa va Isareli.

²⁰ Momo pana okuti nda va iñisa ale vofeka yi tumõha asenjele lowiki haiyo ofeka nda likuminya oku eca kolosekulu viavo kuenje va lia ve kuta, loku neta, oco va pongolokela kolosuku viñi loku vi vumba. Ame puãi va membula kuenje va nyõla ocisila cange.

²¹ Kuenje eci ovina via lua vĩvi lohali vi va wila, oco ocisungo eci ci linga ombangi yoku pisa, momo ka ci tundi vomẽla wombuto yavo. Momo osimbu sia va iñisile handi vofeka nda likuminya oku va ĩha nda kũlĩha ale ovisimilo vi kasi vovitima viavo.

²² Oco eteke liaco hailio Mose a soneha ocisungo eci kuenje wa ci longisa va Isareli.

²³ Oco Yehova wa eca ocikundi ku Yehosua, omõla a Nune. Wa popia laye hati, Kolisako, kuata utõi. Momo ove wiñisa va Isareli vofeka nda likuminya oku va ĩha. Lame ñala love.

²⁴ Eci Mose a mala oku sonẽha olondaka viosi viovihandeleko evi velivulu,

²⁵ oco Mose wa sapuila va Lewi, ava va ambayata ocikasia covisila via Yehova, hati,

²⁶ Nyañuli elivulu lilo liovihandeleko. Li kapa konẽle yocikasia covisila via Yehova, Suku yene, okuti li linga ombangi yoku vu pisa.

²⁷ Momo nda kũlĩha umbinde wene loku siva kuovitima viene. Tala, etaili ñasi pokati kene lomuenyo kuenje umbinde wene woku lingila Yehova wowu. Eci hẽ fa ka ci piala vali enene?

²⁸ Ngongoluili akulu vosi vapata ene, lasongui vene, okuti mopia lavo olondaka evi, kuenje mbilikiya ilu losi okuti vi linga olombangi vioku va pisa.

²⁹ Momo ñulĩha okuti kovaso yokufa kuange vu linga ovina vĩvi kuenje vu pambuka vonjila ndo lekisi oku endelamo. Koloneke viya cĩvi cu sangi omo vu lingainga eci cĩvi ku Yehova, kuenje vu wengula onyeño yaye lupange wovaka ene.

³⁰ Oco Mose wa tanga olondaka viosi viocisungo cilo kuenje va Isareli vosi va vi yeva.