ESINUMUĨLO 30 - Embimbiliya - Bíblia Sagrada em Umbundu

¹ Eci ovina viosi viesumũlũho lesiñalo, evi ñasi oku ku sapuila, vi ku wila, leci ove o vivaluka volofeka viosi muna Yehova, Suku yove, a ku sanduila,

² kuenje o tiuka ku Yehova, Suku yove, ove lomãla vove, o pokola kondaka yaye, eyi yi yevala pokati kovihandeleko ñasi loku kuiha etaili, okuti o pokola muẽle lutima wove wosi kuenda omuenyo wove wosi,

³ oco Yehova, Suku yove, o tumbulula esumũlũho liove, loku ku kuatela ohenda. O ku ongolola kolofeka viosi kuna Yehova, Suku yove, a ku sanduila.

⁴ Ndaño omanu vove va sanduiwa va kasi kupãlapãla kovivanja violuali, haimo ndaño oko, Yehova, Suku yove, o ku ongolola loku ku upako.

⁵ Kuenje Yehova, Suku yove, o ku nena kofeka ya kuatele olosekulu viove okuti ove o yi kuata. O ku salalisa, loku ku luisa ca piãla, ndeci a linga lolosekulu viove ci sule.

⁶ Kuenje Yehova, Suku yove, o seva utima wove, lutima wombuto yove, okuti o sola Yehova, Suku yove, lutima wove wosi lomuenyo wove wosi okuti o kala lomuenyo.

⁷ Kuenje Yehova, Suku yove, o wilisa asiñalo alo osi kovanyãli vove, kuenda kuava va ku suvuka, lava va ku kangisa.

⁸ Love o fetika vali oku pokola kondaka ya Yehova, loku tẽlisa ovihandeleko viaye viosi, evi ñasi loku ku ĩha etaili.

⁹ Yehova, Suku yove, o ku salalisa calua kupange wosi wovaka ove. O luisa ombuto yoviongo viove, lombuto yovinyama viove, kuenda ovaima ovapia ove. Momo Yehova o sanjukila vali oku ku salalisa ndeci a sanjukilile olosekulu viove.

¹⁰ O ci linga nda ove o yevelela kondaka ya Yehova, Suku yove, kuenje o lava ovihandeleko viaye, lovisila viaye, evi via sonehĩwa velivulu eli liovihandeleko. O ci linga muẽle nda o tiuka ku Yehova, Suku yove, lutima wove wosi lomuenyo wove wosi.

¹¹ Momo ocihandeleko cilo ñasi loku ku ĩha etaili ka ca ku kãlẽlẽle, ka ci kasi kupãla.

¹² Ka ci kasi kilu, okuti o linga huti, Helie o tu londela kilu, oku tu ci nenẽla, loku tu ci yevisa, okuti tu ci linga?

¹³ Ndaño kesinya liokalunga hakoko, okuti o linga huti, Helie o tu yokila okalunga, ha tu ci nenẽla, loku tu ci yevisa, okuti tu ci linga?

¹⁴ Momo ondaka yi kasi ocipepi love muẽle. Yi kasi vomẽla wove kuenda vutima wove, okuti o tẽle oku yi linga.

¹⁵ Tala, etaili nda ku kapela omuenyo luwa, kuenda okufa lũvi.

¹⁶ Nda o pokola kovihandeleko via Yehova, Suku yove, evi ñasi loku ku ĩha etaili, okuti o sola Yehova, Suku yove, kuenje wendela volonjila viaye, loku lava ovihandeleko viaye lovisila viaye lovihõlo viaye, oco o kala lomuenyo kuenda o lua. Kuenje Yehova, Suku yove, o ku sumũlũĩsila vofeka wendela oku ka yi kuata.

¹⁷ Puãi nda utima wove u tinduka, kuenje ku tava oku yevelela, puãi o yonjiwa oku fendela olosuku viñi, loku vi vumba;

¹⁸ oco, hu sapuila etaili okuti o nyõleha. Ku kala osimbu vofeka o yokela Yordão oku iñilamo loku yi kuata.

¹⁹ Etaili mbilikiya ilu losi okuti vi linga olombangi vioku ku pisa omo nda ku kapela omuenyo lokufa kuenda esumũlũho lesiñalo. Oco, nõla omuenyo, okuti ove lombuto yove vu kala lomuenyo,

²⁰ kuenje vu sola Yehova, Suku yove, loku pokola kondaka yaye loku likakatela laye. Momo nda oco o linga o kala lomuenyo kuenje oloneke viove vi lua. O kala vofeka Yehova a likuminya lolosekulu viove, Avirahama, la Isake, kuenda Yakoba, oku va yĩha.