ESINUMUĨLO 3 - Embimbiliya - Bíblia Sagrada em Umbundu

¹ Oco tua ñualãpo, tua lamana lonjila yoko Basiane kuenje Oge, soma ya Basiane, lomanu vaye vosi va tu tundila, va yaka letu ko Edirei.

² Puãi Yehova wa popia lame, hati, Ku ko yokokele momo eye lomanu vaye vosi kuenda ofeka yaye, cosi nda ceca peka liene. Vu linga laye ndeci wa lingi la Sihoni, Soma ya va Amori, wa tungile vo Hesibone.

³ Oco Yehova, Suku yetu, wa ecavo povaka etu Oge, Soma ya Basiane, lomanu vaye vosi. Layevo tuo kundula toke lomue wo sialelapo.

⁴ Kotembo yaco tua kuata ovaimbo aye osi. Vuvanda wosi wa Aregove wa tiama kusoma wa Oge vo Basiane mua kala ovaimbo akuĩ epandu. Kuenje ka kua kaile ndaño imbo limosi ka tua kuatele.

⁵ Ovaimbo aco osi a pamisua lovimbaka via lepa lolombundi kuenda ovikundiko viutale. Kua kalavo ovaimbo a lua ka a kaile lovimbaka.

⁶ Tua a nyõla pe, osi, ndeci tua linga la Sihoni, Soma ya Hesibone, okuti tua nyõla ovaimbo osi lalume lakãi lotumãla.

⁷ Puãi ovinyama viosi lovikuata viovovaimbo ovio tua vi upamo ndolohute vietu.

⁸ Oco kotembo yaco tua kuata olofeka violosoma vivali via va Amori. Olofeka viaco via kala kesinya lia Yordão, pokati kolui Arinone kuenda omunda Herimone.

⁹ Va Sidono va tukola Herimone, vati, Siriyono, va Amori puãi vati, Senire.

¹⁰ Tua kuata ovaimbo osi a kasi vofeka yanyãla, kuenda Gileada yosi, la Basiane yosi, toke ko Saleka la Edirei, ovaimbo usoma wa Oge vo Basiane.

¹¹ Momo Oge, Soma ya Basiane, eye lika wa sialapo kocisupe covindululu va Refaimi. Tala, ula waye wa kala ula wutale. Siti, lopo u kasi vo Raba, vombala ya va Amoni. Usovi wayo olometro vikuãla locinimbu, lupati wawo olometro vivali.

¹² Kotembo yaco eci tua kuata olofeka viaco oco nda eca ku va Ruvene kuenda va Gadi onepa yi fetikila ko Aroere, li kasi konele yomuva ya Arinone, kuenda onepa yofeka yolomunda ya Gileada kumosi lovaimbo ayo.

¹³ Onepa yikuavo ya Gileada, la Basiane yosi okuti usoma wa Oge, ca lomboloka ofeka yosi ya Argove nda vi eca konepa yepata lia Manase. Ofeka yosi ya Basiane ya tukuiwa ofeka yovindululu, va Refaimi.

¹⁴ Yairi, u Manase, wa tambula uvanda wosi wa Aregove, okuti Basiane, toke kovililo via va Gesiuri la va Maakati. Loku liluka wa luka Basiane, hati, Hawote Yairi, londuko yaco yi kasi toke etaili.

¹⁵ Nda eca Gileada ku Makiri.

¹⁶ Ku va Ruvene kuenda va Gadi nda eca ofeka yi fetikila ko Gileada kuenje yenda toke komuva ya Arinone. Pokati komuva opo pa linga ulilo. Onepa yavo ya enda toke kolui Yaboke, kulilo wa va Amoni.

¹⁷ Nda va ihavo anyãla aco, tunde ko Kinirote toke ko Kalunga Komongua ka kasi venyala kepato lia Pisiga konele yokutundilo. Olui Yordão oluo lua linga ongave yavo.

¹⁸ Kotembo yaco ndo sapuili siti, Yehova Suku yene wo wĩhi ofeka yilo okuti yi linga yene. Alume vene vosi va malehisua va pita kovaso, vakuẽle va Isareli vo kuami konyima.

¹⁹ Puãi akãi vene lomãla vene, lovinyama viene, momo ndi ci okuti vu kuete ovinyama vi alua, cosi ci siala vovaimbo ene ndo wĩhi,

²⁰ toke Yehova a muisa vakuẽle epuyuko ndene muẽle, okuti lavovo va kuate ofeka Yehova Suku yene a va ĩha kesinya lia Yordão. Noke vu tiuka, omunu kocipiñalo caye, omunu kocipiñalo caye, eci ndo cĩhi.

²¹ Kotembo yaco nda sapuilavo Yehosua, siti, Ovaso ove a mõlale cosi Yehova Suku yene a linga kolosoma evi vivali, haico Yehova a ka linga lovosoma osi oko o pita.

²² Ku ka va yokokele momo Yehova Suku yove eye o ku yakela.

²³ Kuenje kotembo yaco nda likutilila ku Yehova, siti,

²⁴ A Ñala Yehova wa fetika ño oku lekisa kukuenje wove unene wove leka liove lia pama. Momo suku yipi kilu lo posi o tẽla oku linga upange wa soka lovopange ove, lovilinga viove viunene?

²⁵ Ndi likutilila okuti o njokisa oco mbanje ofeka yiwa yi kasi kesinya lia Yordão, haiyo ofeka ya posoka yolomunda, kuenje mbanjavo Levanone.

²⁶ Puãi omo ene wa huki calua oco Yehova wa funguila, kuenje ka njevele. Yu Yehova wa popia lame hati, Ci tẽla yapa, liwekapo. Ku ka popie vali lame ondaka yilo.

²⁷ Londa kilu liomunda Pisiga, imba ovaso ove kutakelo, loko Norte, ko Sul kuenda kutundilo. Vanja lovaso ove momo ku yoka Yordão.

²⁸ Puãi eca ocikundi caco ku yehosua kuenje u halisa loku u pamisa; momo eye o songuila omanu valo oku va yokisa, haeye o va tungisa vofeka eyi ove o vanja.

²⁹ Oco tua kala vocimbota ca suñama la Bete Peore.