ESINUMUĨLO 29 - Embimbiliya - Bíblia Sagrada em Umbundu

¹ Evi ovio olondaka viocisila Yehova a sapuila Mose oku lisila la va Isareli vofeka ya Moavi, oku vandeka kocisila a lisila ale lavo vo Horeve.

² Oco Mose wa kovonga va Isareli vosi, wa popia lavo hati, Wa mõli lovaso ene muẽle cosi Yehova a lingila Fareo lakuenje vaye vosi, kuenda ofeka yaye yosi ye Egito.

³ Wa mõli muẽle anyiko aco a kãla lolondimbukiso viaco lovikomo viaco vinene.

⁴ Haimo lopo, toke etaili, Yehova ko wĩhĩli utima woku limbuka, ndaño ovaso oku mõla, pamue ovatui oku yeva.

⁵ Akuĩ akuãla kanyamo nda wendisi vekalasoko. Uwalo ka wo puilili ketimba, ndaño olohaku kolomãi.

⁶ Ka wa lili ombolo, ka wa nyuili ovinyu levi vi koluisa okuti vu limbuka okuti ame Yehova, ame Suku yene.

⁷ Leci wa pitili kulo, Sihoni, osoma ya Hesibone, kuenda Oge, osoma ya Basiane, va tu tundila oku tu yakisa, puãi tua va yula.

⁸ Tua kuata ofeka yavo, tua yeca ku va Ruvene lo ku va Gadi, lokomeyu yepata lia va Manase ha yi lingi ocipiñalo.

⁹ Oco, lavi olondaka viocisila cilo loku vi linga, okuti vu sumũlũha kovina viosi vu linga.

¹⁰ Etaili ene vosi vu tai kovaso a Yehova Suku yene. Olosekulu viapata ene lakulu vene, lasongui vene, lalume vosi va va Isareli,

¹¹ kuenda omãla vene, lakãi vene, locingendeleyi ci kasi vocilombo cene, lu o tiaña olohui, lu o tapa ovava, vosi yene weyi

¹² oku lisila la Yehova, Suku yene, o lisila lene etaili.

¹³ Etaili Yehova o lisila lene okuti ene vu linga omanu vaye leye o linga Suku yene, ndeci a likuminya lene kuenda ndeci a likuminya lolosekulu viene, Avirahama, la Isake kuenda Yakoba.

¹⁴ Heneko lika ndi lisila lene ocisila cilo ci kola.

¹⁵ Ñasi loku ci lisilavo lu ka kasi letu kulo etaili kovaso a Yehova, Suku yetu, ndeci ñasi loku ci lisila lu o kasi.

¹⁶ Wa kũlĩhi ndomo tua kala vofeka ye Egito, lomo tua pita volofeka omo wa piti.

¹⁷ Wa mõli ovombondo avo, loviteka viavo vioviti levi viovawe kuenda viopalata levi viulu, evi va kala lavio.

¹⁸ Lunguki sanga pokati kene pa kala ulume pamue ukãi, pamue onjo, pamue epata, okuti utima waye u yanduluka etaili Yehova, Suku yetu, kuenje enda oku vumba olosuku violofeka viaco. Lunguki sanga pokati kene pa kala olumbombo lu ima ondulu locunguluila,

¹⁹ kuenje ciya okuti, eci o yeva olondaka viesiñalo eli, o lipanda vutima waye, hati, Ci kala ciwa lame, ndaño ngenda loku siva kutima wange. Momo utima ndowu nda wa koka okunyõleha kua vosi, lava va pama lava vakualukonyo.

²⁰ Yehova ko wecela, puãi onyeño ya Yehova kuenda esepa liaye vi wengukila omunu waco. Asiñalo a sonẽhĩwa velivulu lilo o vata, kuenje Yehova o nyõla onduko yaye vemẽhi lilu.

²¹ Kapata osi a Isareli, eye muẽle Yehova o nola ho talisa ohali ya kãla ya soka lasiñalo osi ocisila ca sonẽhĩwa velivulu lilo liovihandeleko.

²² Oco ocitumbulukila ci kuãi, okuti omãla vene vo kuami, lukuafeka yiñi o tunda kofeka kupãla, eci va mõla afengi eya kofeka yilo, lovovei Yehova a yi veta lao,

²³ leci va mõla ndomo ofeka yosi ya linga ofeka yofuofuo lomongua, haiyo ya linga epile ka li kũlĩwa, ka mu tundi cimue, ndaño oku yunda owangu ka mu yundi, okuti enyolẽho liayo li soka lenyõleho lia Sodoma la Gomora, kuenda Adima la Cevoyi, ovaimbo ana Yehova a nyõla lonyeño yaye lokutema kuaye,

²⁴ oco vakualofeka viosi va pula vati, Nye Yehova a lingila ndomo lofeka eyi? Onyeño eyi ya lua haiyo ya tokota ya lomboloka ndati?

²⁵ Oco omanu va kumbulula vati, Ceyilila omo va yanduluka ocisila ca Yehova, Suku yolosekulu viavo, cina a lisila lavo eci a vopa vofeka ye Egito.

²⁶ Ceyilila omo va enda oku vumba olosuku viñi loku vi fendela, olosuku viaco ka va vi kũlĩhĩle, kuenje Yehova ka va vĩhĩle.

²⁷ Oco onyeño ya Yehova ya wengukila ofeka yilo, oku yi nenela asiñalo osi a sonẽhĩwa velivulu lilo.

²⁸ Kuenje Yehova wa va veyula vofeka yavo lonyeño lekaka lokutema kua lua, wa va takumuĩla vofeka yiñi, ndoketaili lilo.

²⁹ Evi via sitikiwa ovio via Yehova, Suku yetu. Evi via situluiwa puãi vi tiamẽla kokuetu kuenda komãla vetu oloneke viosi, okuti tu linga olondaka viosi viovihandeleko vilo.