ESINUMUĨLO 28 - Embimbiliya - Bíblia Sagrada em Umbundu

¹ Nda o pokola kondaka ya Yehova, Suku yove, okuti o tẽlisa lutate ovihandeleko viaye viosi evi ñasi loku ku ĩha etaili, oco Yehova, Suku yove, o ku tulamisa kapata osi okilu lieve.

² Asumũlũho alo osi a ku wila kuenje a ku sanga, nda o yevelela kondaka ya yehova, Suku yove.

³ Vimbo o sumũlũha, lo vepia le o sumũlũha.

⁴ Ombuto yoviongo viove yi sumũlũha, lovaima ovapia ove, lombuto yovinyama viove, ndaño olonale violongombe viove, kuenda omãla volomeme viove.

⁵ Ohumba yove yi sumũlũha, kuenda ocitengelo cove combolo.

⁶ Love, poku iñila o sumũlũha, poku tunda o sumũlũhavo.

⁷ Ovanyãli vove va ku katukila, Yehova o va lunduisa. Poku ku katukila va endela vonjila yimosi. Poku ku tila va endela volonjila epanduvali.

⁸ Yehova o ku sumũlũisa lolosila vieyuka, o sumũlũisa muẽle upange wosi wovaka ove; o ku sumũlũisa vofeka yi ku ĩha Yehova, Suku yove,

⁹ nda o lava ovihandeleko via Yehova, Suku yove, loku endela volonjila viaye, oco Yehova o ku pamisa okuti o linga epata li kola kokuaye, ndeci a likuminya love.

¹⁰ Lapata osi o kilu lieve va limbuka okuti wa lukiwa londuko ya Yehova, kuenje va ku kuatela usumba.

¹¹ Kuenje Yehova o ku salalisa. Vofeka Yehova a likuminya lolosekulu viove oku ku yĩha omo o luisila ombuto yoviongo viove leyi yovinyama viove, kuenda eyi yovaima ovapia ove.

¹² Yehova o ku yuluila ociseleko caye cesumũluho, okuti ilu, kuenje o lokisila ombela kofeka yove kuvo wayo, loku sumũlũisa upange wosi wovaka ove. Ove o levalisa olofeka via lua, puãi ku levala.

¹³ Kuenje nda o pokola kovihandeleko via Yehova, Suku yove, evi ñasi loku ku ĩha etaili, okuti o vi tẽlisa lutate, oco Yehova o ku lingisa utue, ucĩla hawoko; o kala lika kilu, kombuelo hakoko.

¹⁴ Nda ku pambuka ndaño kondaka yimosi nda ku handeleka etaili, okuti oku pambukila kondio pamue kepĩli, loku kuama olosuku viñi loku vi vumba, Yehova o ku lingisa muẽle utue.

¹⁵ Puãi nda ku pokola kondaka ya Yehova, Suku yove, loku tẽlisa lutate ovihandeleko viaye viosi lovisila viaye, evi ñasi loku ku ĩha, oco asiñalo alo osi a ku wila loku ku sanga.

¹⁶ O siñalĩwa vimbo, lo vepia le o siñalĩwa.

¹⁷ Ohumba yove yi siñalĩwa, kuenda ocitengelo combolo.

¹⁸ Ombuto yoviongo viove yi siñalĩwa, lovaima ovapia ove, kuenda olonale violongombe viove, lomãla volomeme viove.

¹⁹ O siñalĩwa poku iñila, o siñalĩwa poku tunda.

²⁰ Omo ovilinga viove via vĩha lomo wa njivala oco kovopange osi ovaka ove Yehova o vetisako esiñalo lesakalalo leseku toke o nyolẽha kuenje o taka lonjanga.

²¹ Yehova o ku lamẽlẽlĩsa efengi, toke vofeka wendela oku ka yi kuata o puamo.

²² Yehova o ku velisa onulo, lombambi, locongua loku ku nenela ocitenya losipata, kuenda enyenye, lohume kuenje vi ku landula toke wa nyõleha.

²³ Ilu li kasi kilu liove li linga osipi, losi yi kasi vemẽhi liove yi linga utale.

²⁴ Ombela yofeka yove Yehova o yi lingisa onukuvila loneketela; kilu vi ku tundila toke wa nyõleha.

²⁵ Yehova o ku kunduila kovaso anyali vove. Oku va katukila wendela vonjila yimosi, oku va tila wendela volonjila epanduvali. Oluhimo luove luvi lu yokokisa ovosoma osi okilu lieve.

²⁶ Ocivimbi cove ci liwa lolonjila viosi viusenge, kuenda lovinyama viokilu lieve; lomue o ku vi vingila.

²⁷ Yehova o ku yambula lovipumbu vi Egito, lolombumbu, locimumusu, lolohãla, evi ka vi tava oku sakuiwa.

²⁸ Yehova o ku veta lutende, kuenda upeke luyui.

²⁹ Kuenje ekumbi pongunji o puputa ndomeke yi puputa vowelema, kuenje ku sumũlũha volonjila viove. O tala ohali lika loku pundiwa oloneke viosi, lu o ku popela ka ku kala.

³⁰ O kuela ukãi, puãi ulume wiñi o pekela laye. O tunga onjo, puãi ku kalamo. O kũla ocumbo cayuva, puãi ku li epako liaco.

³¹ Ongombe yove yipaiwa kovaso ove, puãi ku yi takĩla. Ocimbulu cove ci pundiwila kovaso ove, kuenje ka ci ku tiukila. Olomeme viove vi eciwa kovanyãli vove, kuenje ku kala lu o ku kuatisa.

³² Omãla vove valume lomãla vove vakãi va eciwa ku vakualofeka. Ovaso ove a ci vanja kuenje a vuvala longeva lavo eteke liosi. Povaka ove ka pa kala olohõlo vioku ci tateka.

³³ Ovaima ovapia ove lupange wove wosi vi liwa lomanu kua kũlĩhĩle. Ohali lika o tala loku keleketiwa ño-o oloneke viosi.

³⁴ O linga ocitende omo o lete ovina viaco lovaso ove.

³⁵ Yehova o ku veta lovipumbu kolongolo lokovolu tunde pomãi toke ponumbutue. Ovipumbu viaco vi sanyanya haivio ka vi sakuiwa.

³⁶ Love, losoma yove wa vialeka, Yehova o vu tuala kofeka ka wa kulĩhĩli, ndaño ove ndaño olosekulu viove; haiko o vumba olosuku viñi vioviti lovawe.

³⁷ Oluhimo luove luvi lu yokokisa vosi. Pokati kapata osi oko Yehova a ku tuala o linga ndolusapo kuenda ndongombe yomãla.

³⁸ O waya ombuto ya lua vepia, puãi wungula citito, momo olohuma vi yi lia.

³⁹ O kũla oviumba viayuva loku vi lima, puãi ovinyu viaco ku vi nyui, ndaño oku yunga ayuva momo a liwa lapuka.

⁴⁰ Kofeka yove yosi ku kala oviti violiveira, ove puãi ku lisieketa lulela waco, momo epako liove lioliveira li loluka.

⁴¹ O cita omãla valume lomãla vakãi puãi ka va lingi vove momo va enda umandekua.

⁴² Oviti viove viosi lovaima osi ovapia ove vi liwa lolohuma.

⁴³ Ocingendeleyi ci kasi pokati kene camamako oku ku piãla, love o tepuluka tepuluke-e.

⁴⁴ Eye o ku levalisa, puãi ove ku u levalisa. Eye o linga utue, ove o linga ucĩla.

⁴⁵ Asiñalo alo osi a ku wila, a ku landula, loku ku sanga, toke wa nyolẽha. Momo kua pokuile kondaka ya Yehova, Suku yove, loku lava ovihandeleko viaye kuenda ovisila viaye evi a ku ĩha.

⁴⁶ Asiñalo alo a ku wila, ove lombuto yove, ndombimbukiso locikomo oloneke ka vi pui.

⁴⁷ Omo kua vumbila Yehova, Suku yove, lonjolela lesanju liutima, oku panduila okusalala kuove kualua,

⁴⁸ oco o vumbila ovanyãli vove, ava Yehova, Suku yove, a ku tumisa. O va vumba lonjala, lenyona, lepẽle, lusuke wovina viosi. Yehova o ku kapa okanga yutale kosingo, toke wa ku nyõla.

⁴⁹ Yehova o ku katuila ofeka yi tunda kupãla, kovivanja violuali. Yiya ndokupãlãla kuongonga yulombo. Elimi liaco ku li yevi.

⁵⁰ Omanu vaco vakuavipala via fela. Ka va sumbi u wa kuka, ndaño omõla ka vo sipo.

⁵¹ Va lia ovinyama viocunda cove, lovaima ovapia ove, toke wa nyõleha. Ka va ku sila olomema, ndaño ovinyu, ndaño ulela, ndaño olonale violongombe viove pamue omãla volomeme viove, toke va ku nyõla pe.

⁵² Va ñuala ovaimbo ove osi ocingonja, toke ovimbaka viove via lepa haivio via pama, vina wa kolela, viulumuha vofeka yove yosi. Vovaimbo ove osi, vofeka yove yosi ya ku ĩha Yehova, Suku yove, va ku ñuala ocingonja.

⁵³ Votembo yocingonja lelamba ovanyãli vove va ku sipata lavio, ove o lia ombuto yoviongo viove, okuti ositu yatimba yomãla vove valume lava vakãi, ava va ku ĩha Yehova, Suku yove.

⁵⁴ Pokati kene ulume wa velapo ketepo, haeye ukuokasa wa lua, o limila okulia manjaye ndaño ukãi waye wa soliwa, pamue omãla vaye vo sialelapo.

⁵⁵ Kositu yatimba yomãla vaye a kasi loku takĩla, ka tava oku upako yimue loku yeca kokuavo. Momo vocingonja lelamba ovanyãli vove va ku sipata lavio vovaimbo ove osi lacimue co sialelapo.

⁵⁶ Pokati kene, ukãi wa velapo ketepo, haeye ukuokasa walua, okuti omo ukasa walua letepo lialua, omãi yaye ka ya la lamba posi, ukãi waco muẽle o limila veyaye wa soliwa lomõlaye ulume, kuenda omõlaye ukãi,

⁵⁷ ula waye u pita pokati kolomãi viaye. O va limilavo omãla vaye a cita kuenje o va takĩla uyombeki. Momo vocingonja lelamba ovanyãli vove va ku sipata lavio vovaimbo ove osi lacimue co sialelapo.

⁵⁸ Nda ku likapela oku tẽlisa olondaka viosi viovihandeleko vilo via sonehĩwa velivulu lilo, okuti o sumbila onduko yilo yulamba kuenda yi kola, YEHOVA SUKU YOVE,

⁵⁹ oco, Yehova o ku nenela ove lombuto yove afengi a kãla, ha-o a lua kuenje a kala osimbu. O ku nenelavo ovovei a enda ño-o hũ.

⁶⁰ O ku velisavo ovoveyi osi oke Egito, ana wa yokokeli kuenje a ku lamẽlẽla.

⁶¹ Yehova o ku velisavo ovovei osi lafengi osi andeti ka a sonẽhĩwile velivulu liovihandeleko vilo, toke wa nyõleha.

⁶² Ndaño wa luili ndolombungululu viokilu haimo vu siala vañamiñami like momo ka wa pokuili kondaka ya Yehova, Suku yene.

⁶³ Kuenje ciya okuti, ndeci Yehova o sanjukilili oku vu linga ciwa loku vu luisa, haico Yehova u sanjukili oku vu kundula loku vu nyõla. Lene vu taka vofeka wendeli oku ka yi kuata.

⁶⁴ Kuenje Yehova o sanduili pokati kolofeka viosi, tunde kocivanja eci coluali toke kocivanja cikuavo coluali. Haiko o vumba olosuku viñi vioviti lovawe, vina kua kulĩhĩle, ndaño ove ndaño olosekulu viove.

⁶⁵ Volofeka viaco ku lisanji. Omãi yove ka yi molimo epuyuko. Puãi volofeka viaco Yehova o ku ĩha utima we yuka ohele longeva, kuenda ovaso a vuvala.

⁶⁶ O kala ño-o lomuenyo we yuka ohele. Lutanya luteke onguele oyo yove, wenda muẽle lomuenyo wove peka.

⁶⁷ Omo usumba wovutima wove, leci ci mõla mõla ovaso ove, vi ku yokokisa, oco omẽle o linga huti, Nda ca kaili oñolosi! loñolosi o linga huti, Nda ca kaile omẽle!—

⁶⁸ Kuenje Yehova o ku tiula vali ke Egito lolonaviyu, haiwo ungende nda likuminyile love, siti, Ku u lingi vali. Oko vu seteka oku lilandisa kovanyãli vene ho lingi apika valume lapika vakãi, puãi lomue o vu landa.