ESINUMUĨLO 27 - Embimbiliya - Bíblia Sagrada em Umbundu

¹ Mose lakulu va Isareli va lungula omanu, vati, Lavi ocihandeleko eci cosi ndu wĩhi etaili.

² Eteke vu yoka Yordão oku pitila kofeka yu ku ĩha Yehova, Suku yove, oco o tumbika ovawe anene loku a sieketa lohela.

³ Pana okuti wa yokale kuenje wa iñila ale vofeka yi tumõha asenjele lowiki, haiyo ofeka ya ku ĩha Yehova, Suku yove, ndeci Yehova, Suku yolosekulu viove, a likuminya love, oco o soneha kovawe aco olondaka viosi viovihandeleko evi.

⁴ Eci wa yoki ale Yordão oco vu tumbika komunda Evale ovawe andeti ñasi oku vu lomboluila etaili kuenje vu a sieketa lohela.

⁵ Haiko o tungila Yehova, Suku yove, utala wovawe. Ka ci tava oku songa ovawe aco locivela cutale.

⁶ O tunga utala wa Yehova, Suku yove, lovawe ka a pasiwile. Kutala waco o lumbila Yehova, Suku yove, ovilumba vioku pia elisi.

⁷ O lumbilakovo ovilumba viombembua kuenje haiko o vi lila. O sanjukila kovaso a Yehova Suku yove.

⁸ Kuenje kovawe aco o sonehako olondaka viosi viovihandeleko evi okuti vi mõlẽha ciwa.

⁹ Mose lovitunda va Lewi va popia la va Isareli vosi vati, A Isareli, kulula etui, yevelela. Etaili wa linga epata lia Yehova, Suku yove.

¹⁰ Oco o pokola kondaka ya Yehova, Suku yove, o linga ovihandeleko viaye lovisila viaye, evi ñasi loku ku ĩha etaili.

¹¹ Kuenje keteke liaco hailio Mose wa kundika omanu, hati,

¹² Eci wa yoki ale Yordão, oco komunda Gerisimi apata ava ndeti va talama oku sumuluĩsa omanu: Simeone, Lewi, Yuda, Isakare, Yosefe, la Benjamini.

¹³ Kuenje komunda Evale apata ava ndeti va talama oku siñala omanu, Ruvene, Gadi, Asiere, Sevulono, Dani, la Nafitali.

¹⁴ Kuenje va Lewi va sapula londaka yinene kalume vosi va Isareli, vati,

¹⁵ Omunu omesele o tunga uyombeki lovaka aye ociteka cimue ca songiwa pamue cimue ca itilua, haico umbondo ku Yehova, omunu waco a siñaliwe. Lomanu vosi va kumbulula vati, Ci lingiwe.

¹⁶ Wosi a pembula isiaye pamue inaye a siñaliwe. Lomanu vosi va kumbulula vati, Ci lingiwe.

¹⁷ Wosi o sondolola ulilo wukuavo a siñaliwe. Lomanu vosi va kumbulula, vati, Ci lingiwe.

¹⁸ Wosi o pambuisa omeke vonjila a siñaliwe. Lomanu vosi va kumbulula vati, Ci lingiwe.

¹⁹ Wosi o pengisa esunga liondaka yocingendeleyi, yosiwe, pamue yocimbumba, a siñaliwe. Lomanu vosi va kumbulula vati, Ci lingiwe.

²⁰ Wosi o pekela lukãi wa isiaye, a siñaliwe omo wa sikũlula ukãi wa isiaye. Lomanu vosi va kumbulula vati, Ci lingiwe.

²¹ Wosi o pekela locinyama a siñaliwe. Lomanu vosi va kumbulula vati, Ci lingiwe.

²² Wosi o pekela la mukãi waye, ci kale omõla a isiaye, pamue omõla a inaye, a siñaliwe. Lomanu vosi va kumbulula vati, Ci lingiwe.

²³ Wosi o pekela la ndatembo yaye, ina yukãi waye, a siñaliwe. Lomanu vosi va kumbulula vati, Ci lingiwe.

²⁴ Wosi o ponda ukuavo uyombeki, a siñaliwe. Lomanu vosi va kumbulula vati, Ci lingiwe.

²⁵ Wosi o tambula ovitukiko vioku ipaya omunu we lipua, a siñaliwe. Lomanu vosi va kumbulula vati, Ci lingiwe.

²⁶ Wosi ka kolaisa olondaka viovihandeleko vilo oku vi linga a siñaliwe. Lomanu vosi va kumbulula vati, Ci lingiwe.