ESINUMUĨLO 26 - Embimbiliya - Bíblia Sagrada em Umbundu

¹ Eci weñilale vofeka yi ku ihã Yehova, Suku yove, ha yi lingi ocipiñalo, okuti wa yi kuata ale kuenda wa tungamo ale,

² oco o nyañula amue pokati kovaima osi atete a tunda vepia liove lovofeka ya ku ĩha Yehova, Suku yove. O a kapa vohumba, kuenje wenda layo kocitumãlo Yehova, Suku yove, a nola ha tungisilako onduko yaye onjo yoku kala.

³ Wenda kocitunda coloneke viaco, o popia laye, huti, Etaili ndi sapula ku Yehova, Suku yove, okuti nda iñila ale vofeka eyi Yehova a likuminya lolosekulu vietu oku tu ĩha.

⁴ Kuenje ocitunda ci tambula ohumba peka liove, ci yi tumbika kovaso yutala wa Yehova, Suku yove.

⁵ Kuenje ove o sinumuĩla Yehova, Suku yove, huti, Tate u Arama, haeye ukuakuñualañuala. Wa lokila ke Egito kuenje haiko a kala ocingendeleyi, eye lomanu vaye vañamiñami. Puãi wa luilako toke wa linga epata linene, hailio lia pama, kuenda lia lova.

⁶ Va Egito va tu linga lãvi, va tu talisa ohali, kuenje va tu kapa kupange wa kãla.

⁷ Oco tua vilikiya ku Yehova, Suku yolosekulu vietu, leye Yehova wa yeva ondaka yetu, wa mõla ohali yetu, lupange wetu, lotokua yetu.

⁸ Kuenje Yehova wa tu upa ke Egito leka lia pama lokuokuo kuolõha, levi vi lingisa cimue usumba, kuenda olondimbukiso lovikomo.

⁹ Wa tu nena kulo, yu wa tu ĩha ofeka yilo yi tumõha asenjele lowiki.

¹⁰ Kuenje tala, cilo nda nena ovaima atete a tunda posi yina ove, a Yehova, wa nyĩha.— Kuenje o ci tumbika kovaso a Yehova Suku yove, loku fendela Yehova, Suku yove.

¹¹ O sanjukila muẽle cosi ciwa Yehova, Suku yove, a eca kokuove lokonjo yove, kuenda ku Lewi lokocingendeleyi ci kasi pokati kene.

¹² Eci wa mãla oku eca olonepa viekui viosi viociluli cove cunyamo watatu, omo owo unyamo wolonepa viekui, okuti wa vi ecale ku u Lewi lokocingendeleyi, kuenda kosiwe, lokocimbumba, okuti vovaimbo ene va lia ve kuta,

¹³ oco o sapula ku Yehova, Suku yove, huti, Vonjo yange ndopamo ale onepa yi kola. Nda yeca ku u Lewi, lo kocingendeleyi, kosiwe lokocimbumba. Nda tẽlisa ocikundi cosi wa nyiha. Kovihandeleko viove sia lueyeleko cimue ndaño oku vivala.

¹⁴ Osimbu nda kala loku lila, konepa yekui sia lileko. Eci sia yelele siopileko, ndaño oku eca konambi sia ecele. Nda pokola kondaka Ya Yehova, Suku yange. Nda telisa ovihandeleko viove viosi.

¹⁵ Ove o kasi kilu vonjo yove yi kola. Vanja posi loku sumũluisa omanu vove va Isareli. Sumũluisavo osi wa tu ĩha ndeci wa likuminya lolosekulu vietu. Ocili wa tu ĩha ofeka yi tumõha asenjele lowiki.

¹⁶ Etaili Yehova, Suku yove, o ku ĩha ovisila evi loviholo evi. Oco ove o vi suisapo lutate loku vi tẽlisa lutima wove wosi lomuenyo wove wosi.

¹⁷ Etaili ove wa tukula Yehova huti, Eye Suku yange. Wa likuminyavo oku endela volonjila viaye, loku lava ovisila viaye lovihandeleko viaye lovihõlo viaye, loku pokola kondaka yaye.

¹⁸ Leye Yehova, etaili wa linga ndeci a likuminya love omo, oku ku tukula, wa popia hati, Ovo omanu vange muẽle. Wa ku iha ocikundi coku lava ovihandeleko viaye viosi.

¹⁹ Nda o ci linga eye o ku kemainyaisa ca velapo, okuti apata osi akuavo a lulika, ci sule. O sivayiwa ca velapo. O kuata oluhimo lua piãla kuenje o sumbiliwa ca velapo. O linga muẽle epata li kola ku Yehova, Suku yove, ndeci a likuminya.