ESINUMUĨLO 25 - Embimbiliya - Bíblia Sagrada em Umbundu

¹ Nda vamue va likuetele ondaka pokati, kuenje veya kekanga lolonganji vi va tetuluila oku yowisa ukuesunga loku pisa u wa pia,

² oco nda u wa pia o sesamẽla oku tipuiwa, onganji yu tuvikisa posi kuenje yu tipuisa okuti muẽle onganji o ci lete. Olohava viaco vi lisoke longole yaye.

³ Oku u tipula toke akui akuãla ka ci tava sanga nda olohava vi pitahãla akuĩ akuãla ukuẽle o sepuiwa enene kovaso ove.

⁴ Ka ci tava oku kuta komẽla wongombe eci yi kasi oku sasa olomema.

⁵ Nda omunu la manjaye va tunga pamosi, kuenje umue o fa, ka si omõla ulume, oco ukãi wu wa fa ka ka likuele lu hokuepatako. Nawa yaye u kapa vonjo yaye ha lingi ukãi waye, okuti o kala locikele cukãi wa manjaye.

⁶ Kuenje omõla watete ulume wa citiwa laye o kala londuko ya manjaco ukuakuenda, oco onduko yaye ka yi fi vo Isareli.

⁷ Puãi ulume, nda ka yongola oku kuela nawa yaye, oco nawa yaco enda konjango, kakulu, o va sapuila hati, Manja a veyange ka tava oku tumbulula onduko ya manjaye vo Isareli, ka yongola oku linga lame ndeci ca sesamela manja a veyange oku linga.

⁸ Oco akulu vo vimbo liavo vo pañinya oku vangula laye. Nda o tamãlala ño-o hati, Si yongola oku u tambula,

⁹ oco nawa yaco ukãi amẽla kokuaye kovaso akulu, u lula oluhaku komãi, loku u siyila kocipãla. O popia laye hati, Haico ci lingiwa lulume ka yongola oku tumbulula epata lia manjaye.

¹⁰ Oco vo Isareli va tukula epata liaye, vati, Epata liu wa luliwa oluhaku.

¹¹ Nda alume vavali va liyaka, lukãi wukuavo amẽla oku popela veyaye peka liu o kasi loku u tipula, kuenje olõla eka liaye, u kuatela oku ka ku kuatailua,

¹² oco eka liaye li tetiwa. Ovaso ove ka ko file ocisõi.

¹³ Vonjeke yove ka ci tava oku kala lolopesu vivali okuti eyi yinene leyi yitito.

¹⁴ Vonjo yove ka mu ka kale olonjongo vivali, eyi yinene leyi yitito.

¹⁵ Opesu yove yi kale muẽle opesu yocili kuenda yesunga. Onjongo yove layovo yi kale onjongo yocili kuenda yesunga, okuti oloneke viove vi lua vofeka ya ku ĩha Yehova, Suku yove.

¹⁶ Momo vosi va linga ovina evi, okuti vosi va linga eci hacesungako, ovo ovimbondo ku Yehova, Suku yove.

¹⁷ Ivaluka eci Amaleke a ku linga vonjila eci wa tundi ke Egito.

¹⁸ Ivaluka ndomo a liyaka lene vonjila, okuti ndaño ene wa kavi kuenje wa veli epuila haimo weya konyima yene kuenje wa kundula vosi va siala naito konyima. Ka sumbilile Suku.

¹⁹ Oco, eci Yehova, Suku yove, a ku puyuisa kovanyali vove vosi va ku ñuala, oco, vofeka yi ku ĩha Yehova, Suku yove, okuti o yi kuata kuenje yi linga ocipiñalo, o nyolãmo onjivaluko ya Amaleke vemẽhi lilu. Ka ci tava oku ivalako.