ESINUMUĨLO 24 - Embimbiliya - Bíblia Sagrada em Umbundu

¹ Nda ulume o tambula ukãi oku u kuela, kuenje noke ko sanjukila vali omo kokuaye wa sangako cimue ka ca sungulukile, kuenje u sonẽhela ukanda woku nyãla, loku u kapa peka liaye, loku u tundisa vonjo yaye, okuti o tunda muẽle vonjo yaye,

² noke nda ukãi enda ha likuela lulume wiñi,

³ kuenje ulume waco wavali leyevo u suvuka, kuenje u wihãvo ukanda woku nyãla, loku u kapa peka liaye, loku u tundisa vonjo yaye; pamue, nda ulume waco wavali wo kuela ha lingi ukãi waye, o fa,

⁴ oco veyaye watete, una wo tundisile, ka ci tava okuti u tambula vali ha lingi ukãi waye kovaso yoku vĩhĩsua, momo oco nda ca linga umbondo ku Yehova. Kuenje ka ci tava oku kokela ongole ofeka yina ya ku ĩha Yehova, Suku yove, ha yi lingi ocipiñalo.

⁵ Eci ulume a kuela tete ka ci tava oku u tuma kovita pamue oku u wĩha ocikele cimue ca kãla. Unyamo umosi a linge ndeci a panga vonjo yaye, okuti leye lukãi waye a kuela va lisanjukila.

⁶ Ka ci tava oku tambula onjeke yovawe oku sula ndaño ewe liokilu, momo nda oco wa linga nda ca soka ndoku yekela omuenyo womunu.

⁷ Omunu nda wa sangiwa loku iva umue u Isareli, loku u lingisa ndupika pamue oku u landisa, ocimunu caco ci fe; oco o yelisa evĩho pokati kene.

⁸ Lunguka luvei wilundu, okuti o ci kapela vutima lutate oku linga cosi ca ku longisa ovitunda va Lewi. Ndeci nda va handeleka haico vu linga lutate.

⁹ Ivaluka eci Yehova, Suku yove, a linga la Miriama vonjila, eci wa tundi ke Egito.

¹⁰ Nda o levalisa cimue kukuẽle, ka ci tava oku iñila vonjo yaye oku upamo onjeke.

¹¹ O kala posamua, lomunu ondevali o ku nenẽla posamua onjeke.

¹² Puãi nda omunu waco osuke, ka ci tava oku lala lonjeke yaye.

¹³ Eci ekumbi liñila u tiuwila muẽle onjeke yaye, okuti o pekela lonanga yaye, kuenje o ku sumũluĩsa. Eci ci ku lingila esunga kovaso a Yehova, Suku yove.

¹⁴ Ka ci tava oku kangisa ondingupange ohukui haeye osuke, ci kale umue ukuẽle, ci kale umue pokati kovingendeleyi vi kasi vimbo liove vofeka yove.

¹⁵ Veteke liaye u wĩha ofeto yaye. Ekumbi ka li ka iñile kofeto yaco, momo eye osuke kuenje oko a kapa utima waye, sanga o ku lisiõsuĩla ku Yehova, kuenje cu ku lingila ekandu.

¹⁶ Ka ci tava vaisia oku fila akandu omãla, ndaño omãla oku fila akandu a vaisia. Omunu omunu o fila ekandu liaye muẽle.

¹⁷ Ka ku pengise esunga lia sesamẽla ocingendeleyi pamue osiwe. Ka ci tava oku tambula onjeke yonanga yocimbumba,

¹⁸ puãi wivaluka okuti love wa kaile upika ke Egito, kuenje Yehova, Suku yove, wa ku yovolako. Oco ndi ku handelekela oku linga ocina eci.

¹⁹ Eci wungula vepia liove, kuenje wivala ocitungu kepia, ka ci tava oku tiukila oku cupilila, ci kale cocingendeleyi, kuenda cosiwe, kuenda cocimbumba, okuti Yehova, Suku yove, o ku sumũluĩsa kupange wosi wovaka ove.

²⁰ Eci o kanja oliveira liove, ku ka tiukile vali oku kanjululamo. Ci linga cocingendeleyi, pamue cosiwe, kuenda cocimbumba.

²¹ Eci o yunga kocumbo cove cayuva; ku ka tiukilemo vali oku yungululamo. Ci linge cocingendeleyi, cosiwe, kuenda cocimbumba.

²² Ivaluka okuti love wa kaile upika vofeka ye Egito. Oco ndi ku handelekela oku linga ocina eci.