ESINUMUĨLO 23 - Embimbiliya - Bíblia Sagrada em Umbundu

¹ U wa valuiwa kondalu pamue wa kapaliwa, ka ka iñile kohongele ya Yehova.

² Ka ci tava okuti omõla wa lumbulua iñila vohongele ya Yehova, ndaño toke kocitumbulukila cekuĩ lomue kombuto yaye iñila kohongele ya Yehova.

³ U Amoni pamue u Moavi ka ka iñile vohongele ya Yehova, ndaño toke kocitumbulukila cekuĩ lomue kombuto yavo iñila kohongele ya Yehova, otembo ka yi pui.

⁴ Momo eci wa tundi ke Egito, ka va tundile lombolo lovava oku vu lama vonjila, kuenda vali omo va fetela Baliame, omõla a Beore, u Petore ko Mesopotamia, okuti o ku siñala.

⁵ Haimo lumue Yehova, Suku yove, ka yevele Baliame. Puãi Yehova, Suku yove, wa pongolola esiñalo ha li ku lingila esumũlũho, momo Yehova, Suku yove, wa ku sola.

⁶ Ku ka va sandele ombembua pamue esumũlũho oloneke viove viosi ka vi pui.

⁷ U Edome ka ci tava oku u suvuka, momo eye manjove. Ndaño oku suvuka u Egito, lacovo ka ci tava momo wa kaile ocingendeleyi vofeka yavo.

⁸ Omãla va citiwa kokuavo kocitumbulukila catatu va tẽla oku iñila kohongele ya Yehova.

⁹ Eci wa katukila ovanyãli vove kuenda o kasi ale vocilombo oco lisuluvika kovina viosi via vĩha.

¹⁰ Nda pokati kene pali ulume ka yelele omo vuteke wa liliñisa oco ulume waco a tundile kofeka, ka ka iñile vocilombo.

¹¹ Puãi kekumbi a yue vovava, leci ekumbi lia enda oco ci tava, a iñile noke vocilombo.

¹² Konẽle yocilombo sokiyilako apa o tundila.

¹³ Kala lepaso pokati kovimalẽho viove. Oco eci o tumãla konẽle o fẽla lalio, kuenje o ñualãpo hu lembika eci ca ku tunda.

¹⁴ Momo Yehova, Suku yove, o pita pita pokati kocilombo cove, oku ku popela loku ku avela ovanyãli vove. Oco ocilombo cove ci kole, okuti ka ku muĩla cimue cĩvi hã ha ku si.

¹⁵ Upika wa tila ku cime caye yu weya kokuove ka ci tava oku u tiula ku cime caye;

¹⁶ a kale love pokati kene, a kale vocitumãlo cimue a nola haimo a sola vovaimbo ene.

¹⁷ Pokati komãla vakãi va Isareli ka pa ka kale ocisoko coku fendela lupuepue. Ndaño pokati komãla valume ka pa ka kale ocisoko coku fendela luyevo.

¹⁸ Ka ci tava oku tuala ovilumbula viupuepue, pamue onganyu yi tunda kuyevo, vonjo ya Yehova, Suku yove, oku lemũlũla ohuminyo yimue; momo kavali kavio vi linga umbondo ku Yehova, Suku yove.

¹⁹ Ka ci tava oku levalisa ukuẽle losindike, ci kale osindike yolombongo, ci kale osindike yokulia, ndaño osindike yokocina cosi ca levaliwa.

²⁰ Kocingendeleyi ci tava oku levalisa losindike; kukuẽle puãi ka ci tava oku levalisa losindike, oco Yehova, Suku yove, a ku sumũluĩsa kueci cosi co linga ovaka ove vofeka wendela oku yi kuata.

²¹ Nda o likuminya ohuminyo la Yehova, Suku yove, ku ka lende oku ci linga, momo Yehova, Suku yove, o ku ci silĩhã muẽle; kuenje ci ku lingila ekandu.

²² Puãi nda kua likuminyĩle ka ci ku lingila ekandu.

²³ Cosi ca tunda vomẽla wove ci tẽlisa lutate. Momo eci wa likuminya lomẽla wove wa ci likuminya la Yehova, Suku yove, ocipango cove muẽle.

²⁴ Nda weya kocumbo cukuẽle cayuva ci tava oku lia kayuva aco ndeci wa panga, toke we kuta; puãi ka ci tava oku kapa amue vocikuata cove.

²⁵ Nda weya kepia liotiliku ya yelale liukuẽle, ci tava oku pueya apunga leka liove; puãi ka ci tava oku kapa omila kotiliku yukuẽle.