ESINUMUĨLO 22 - Embimbiliya - Bíblia Sagrada em Umbundu

¹ Nda o mõla ongombe yukuẽle pamue omeme yaye ya nyelẽla, ka ci tava oku vi vanja ño, o vi tiula muẽle kukuẽle.

² Nda ukuẽle ka kasi ocipepi love, pamue ku wi, o yi nena konjo yove okuti yi kala love toke eteke ukuẽle o yi sanda, oco o yeca kokuaye.

³ Haico o linga locimbulu caye, haico o lingavo luwalo waye, haico o linga la cosi cukuẽle ca nyẽlela, cokuti cosi ukuẽle a nyẽlisa love wa ci sanga. Ka ci tava oku likala oku u kuatisa.

⁴ Nda wa mõla ocimbulu cukuẽle ca kupukila vonjila, pamue ongombe yaye, ka ci tava oku tila okuti ku kuatisa. U kuatisa muẽle oku ci votola.

⁵ Ukãi ka ka wale uwalo wulume, ndaño ulume ka ka wale uwalo wukãi. Wosi o ci linga eye ocimbondo ku Yehova, Suku yove.

⁶ Nda vonjila o sanga ocanju cokanjila vuti pamue posi, kuenje vocanju caco muli otumãla pamue asaila, pamue mulivo inaco wa vutamẽla otumãla pamue asaila, ka ci tava oku ambata inaco kuenda omãla.

⁷ Inaco weca, otumãla otuo wambata okuti o kala ciwa, loloneke viove vi lua.

⁸ Eci o tunga onjo yokaliye, kolusoka luaco o ñualisako okacimbaka, sanga o vetisa onjo yove eko liosonde nda umue o kupukako.

⁹ Ka ci tava oku kũla vocumbo cove cayuva olombuto vivali viocitengasola, sanga epako liosi li siñalĩwa, okuti olombuto viaco wa waya, kuenda ovaima a tunda kocumbo cayuva.

¹⁰ Ongombe locimbulu ka ci tava oku vi pandekela kokanga yimosi poku lima.

¹¹ Ka ci tava oku wala onanga ya tengiwa apumumu, okuti ya tutiwa lovonya omeme lolinyu pamosi.

¹² Konanga yove yoku livatula, kasũsu aco akuãla kapako olonjenje.

¹³ Nda ulume o kuela ukãi kuenje o litokeka laye, puãi noke u suvuka,

¹⁴ kuenje u kapa olondaka vĩvi, u lundila loku linga hati, Nda kuela ukãi ulo kuenje ndeya kokuaye, puãi sio sangele ciwa,—

¹⁵ oco isia yufeko la inaco va nyañula ufeko loku lekisa kakulu vovimbo kepandavelo olondimbukiso viomo ufeko a kasi ciwa.

¹⁶ Kuenje isia yufeko o popia lakulu, hati, Nda kuelisile omõlange kulume ulo ha lingi ukãi waye, puãi cilo eye wo suvuka;

¹⁷ kuenje wo vela ovina vĩvi hati, Omõlove sio sangele ciwa, puãi tala, olondimbukiso viomõlange viovio. Kuenje va nyanyumuĩla onanga kovaso akulu vovimbo.

¹⁸ Oco akulu vovimbo liaco va kuata ulume loku u tipula.

¹⁹ Kuenje vo lia ovimbu viocita colosiekele viopalata, va vi eca ku isia yufeko, momo wa lundila ufeko u Isareli. Oco eye o linga ukãi waye, kuenje ka ci tava okuti o litepa laye oloneke viaye viosi.

²⁰ Puãi nda ci kasi ocili okuti ko sangele ciwa, okuti olondimbukiso viufeko ka via sapuiwile;

²¹ oco va tundisile ufeko kepito lionjo ya isiaye, lalume vovimbo liavo vo sosola lovawe toke o fa, momo wa linga cĩvi ku Isareli, wa lingila ukahonga vonjo ya isiaye; oco o yelisa evĩho pokati kene.

²² Nda ulume o sangiwa okuti o pekela lukãi wa kueliwa ale lulume, kavali kavo va fa, ulume wa pekela lukãi, kuenda ukãi; oco o yelisa evĩho vo Isareli.

²³ Nda ku li ufeko wa lombiwa ale lulume, kuenje ulume umue ukuavo u sanga vimbo yu o pekela laye,

²⁴ oco kavali kavo vu va tundisila kepandavelo limbo liaco, kuenje vu va sosola lovawe toke va fa. Ufeko vu sosola momo ka litetelele vimbo. Vu sosola ulume momo wa sepula ukãi wukuavo; oco o yelisa evĩho pokati kene.

²⁵ Puãi nda ulume o sanga vusenge ufeko wa lombiwa ale lulume ukuavo kuenje u kuata loku pekela laye, oco ulume wa pekela laye eye lika o fa.

²⁶ Puãi ufeko ku u lingi cimue. Ufeko ka kuete ekandu li sesamẽla okufa; momo eci ca lisoka londaka vomunu wa katukila ukuavo kuenje wo wipa.

²⁷ Momo wa sanga ño vusenge, kuenje ndaño mbi ufeko waco wa lombiwa ale wa vilikiya oku u kuatisa haimo ka kua kaile u u popela.

²⁸ Nda ulume o sanga ufeko ka la kulĩha ulume, haeye ka lombiwile handi, kuenje u kuata loku pekela laye, kuenje va kuatiwa;

²⁹ oco ulume wa pekela laye eca ku isia yufeko akuĩ atãlo kolosiekele viopalata, kuenje ufeko o linga ukãi waye, momo wo sepula. Ka ci tava oku litepa laye oloneke viaye viosi.

³⁰ Ka ci tava ulume oku kuela ukãi waisiaye, ndaño oku sikũlũla u o tiama ku isiaye.