ESINUMUĨLO 21 - Embimbiliya - Bíblia Sagrada em Umbundu

¹ Nda vusenge wovofeka Yehova, Suku yove, a ku iha oku yi kuata mu sangiwa umue wa ipaiwa kuenje u wo ponda ka kulĩhĩwile,

² oco akulu vove kuenda olonganji viove vi enda, vi seteka ovinala viokovaimbo a lisungue lomunu wa ipaiwa.

³ Kuenje akulu vovimbo li kasi ocipepi lu wa ipaiwa, va kuata onale kocunda, eyi ka ya la pokuisua ndaño oku nala kokanga.

⁴ Kuenje akulu vovimbo liaco va tuala onale yaco komaka yi kuete okalui, kuna ka kua limiwile pamue oku kũlĩwa. Omo, vomaka yaco, va tieñela osingo yonale yaco.

⁵ Kuenje ovitunda, omãla va Lewi, veyako, momo ovo Yehova, Suku yove, a nola oku u vumba, kuenda oku sumũluĩsila vonduko ya Yehova. Ondaka yosi yoku lihoya ndaño eyi yoku liyaka yi sokiyiwa lavo.

⁶ Kuenje akulu vosi vovimbo liaco li kasi ocipepi lu wa ipaiwa, va sukuila ovaka avo konale ya tieñiwa vomaka.

⁷ Kuenje va popia vati, Havaka etuko a pesela osonde yilo, ndaño ovaso etu ka a ci muĩle eci ya peseka.

⁸ A Yehova, ecela omanu vove va Isareli ava wa yovola. Omanu vove va Isareli ku ka va pisile eko liosonde ye lipua. Va eceliwe kosonde yaco.—

⁹ Oco, poku linga eci ca sunguluka ku Yehova o liyelisa keko lioku pesela osonde ye lipua.

¹⁰ Eci wenda oku liyaka lovanyãli vove, kuenje Yehova, Suku yove, o va eca povaka ove, love o va ambata olomandekua,

¹¹ kuenje pokati kolomandekua viaco wa muĩlapo onumbu yukãi, kuenje u yongola hu likapela;

¹² oco u tuala konjo yove; eye o lipemula kutue loku likondolola olonjala.

¹³ O lula uwalo waye wumandekua, kuenje o tumãla vonjo yove oku lila isiaye lainaye osãi yosi. Kovaso yaco ci tava ove oku enda kokuaye loku linga veyaye kuenje eye o linga ukãi wove.

¹⁴ Noke nda ku u sole vali, o weca okuti enda kuosi a panga. Puãi ka ci tava oku u landisa lolombongo, pamue oku u lingisa ndupika, momo wo sepula.

¹⁵ Nda ulume o kuela oluvale, ukuavo wa soliwa, lukuavo wa suvukiwa, kuenje u wa soliwa lu wa suvukiwa, kavali kavo, vo citila omãla, kuenje ukãi wa suvukiwa eye tete wa cita omõla ulume,

¹⁶ oco, eteke a tepisa ovipako viaye oku vi eca komãla ocipiñalo, ka ci tava okuti eca unuñulu komõla wu wa soliwa, oku u kapa kovaso omõla wu wa suvukiwa, haeye nuñulu.

¹⁷ Puãi omõla a yu wa suvukiwa o tukuiwa onuñulu, o wĩha olonepa vivali kovina viosi a kuete; momo eye tete wa tunda ketimba liaye. Esumũlũho liunuñulu olio liaye muẽle.

¹⁸ Nda omunu o kuete omõla wa sina, haeye ocisuanji, ka pokola kondaka ya isiaye, pamue kondaka ya inaye, kuenje ndaño vo longa haimo ka yevi;

¹⁹ oco isiaye la inaye vo kuata kuenje vo tuala kolosekulu vimbo liavo, kepandavelo liaco.

²⁰ Va popia lolosekulu vimbo vati, U omõlẽtu ulo wa sina, ocisuanji, ka yevi ondaka yetu, ocisapanu, haeye oholua.

²¹ Oco alume vosi vakuimbo liavo vo sosola lovawe toke o fa. Oco o yelisa evĩho pokati kene, kuenje va Isareli vosi va ci yeva loku ci kuatela usumba.

²² Nda omunu wa linga ekandu li sesamẽla okufa, kuenje ipaiwa loku nyoñamisiwa kuti,

²³ ocivimbi caco ka ci ka kale kuti uteke wosi, puãi ci kendiwe keteke liaco muẽle; momo u wa nyoñamisua kuti wa siñalĩwa la Suku. Oco ku vĩhĩsa ofeka yove ya ku ĩha Yehova, Suku yove, ha yi lingi ocipiñalo.