ESINUMUĨLO 20 - Embimbiliya - Bíblia Sagrada em Umbundu

¹ Eci wenda kovita oku yaka lovanyãli vove, kuenje o mõla otuvalu, lakãlu, lowiñi wasualali wa ku velapo, ku ka va yokokele. Momo Yehova, Suku yove, una wa ku upa vofeka ye Egito, eye o kasi love.

² Eci wa lunga oku yaka oco ocitunda ci kokela, kuenje ci popia lomanu.

³ Ci popia lavo, citi, Yeveleli, a Isareli. Etaili wa pitili kovita oku yaka lovanyãli vene. Ovitima viene ka vi ka ambuke. Ko ka kuati usumba, ndaño oku luluma, ndaño oku va yokokela.

⁴ Momo Yehova, Suku yene, eye enda lene oku vu yakela lovanyãli vene, loku vu yulisa.

⁵ Vakesongo va popia lomanu, vati, Ulume upi wa tunga onjo yokaliye, kuenje ka yi tumbikile? A ende, a tiukile konjo yaye, sanga o fila kovita kuenje umue wiñi o yi tumbika.

⁶ Ulume upi wa kũla ocumbo cayuva kuenje ka lile kepako liaco? A ende, a tiukile konjo yaye, sanga o fila kovita, lukuavo o lia epako liaco.

⁷ Ulume upi wa kuela ukãi kuenje handi ka upisile uvala? A ende, a tiukile konjo yaye, sanga o fila kovita, kuenje ulume wiñi u kuela.

⁸ Vakesongo va popia vali lomanu, vati, Ulume upi esumba pamue ukuacinjoko? A ende, a tiukile konjo yaye, sanga itima viavakuavo vi yokoka ndutima waye.

⁹ Eci vakesongo va mãla oku popia lomanu oco va tepisa asualali kovisoko loku tukula asongui vaco.

¹⁰ Eci o pitila ocipepi limbo limue oku yaka lalio, tete tete kũlihĩsa nda va tava oku lieca ño ombembua.

¹¹ Nda va ku tambulula vati, Tua tava, kuenje va ku yikuluila, oco omanu vosi o sangamo va linga upange wutolongo oku ku vumba.

¹² Puãi nda ka va tava oku lieca ño lombembua kokuove, puãi va ku katuila ovita, oco o li ñuala ocingonja.

¹³ Leci Yehova, Suku yove, o li eca peka liove, alume vosi va kasimo o va ipa losipata.

¹⁴ Puãi te lika akãi, lotumãla, lovinyama, kuenda cosi ci kasi vimbo, okuti ovikuata viaco viosi, o vi kuata, kuenje vi linga olohute viove. O sanjukila evi via pundiwa kovanyãli vove, evi Yehova, Suku yove, a ku ĩha.

¹⁵ Eci oco o linga lovaimbo osi a kasi kupãla muẽle love, ana ka a tiamẽla kovaimbo apata alo.

¹⁶ Puãi vovaimbo omanu ava, ana a ku ĩha Yehova, Suku yove, ha a lingi ocipiñalo, lacimue ci fuima o ci sia lomuenyo.

¹⁷ Puãi o va nyõla vosi pe; va Hiti, la va Amori, la va Kanana, la va Perisi, va Hiwi, la va Yevusi; ndeci Yehova, Suku yove, a ku handeleka.

¹⁸ O va nyola okuti ka va ku longisa oku linga ovombondo avo osi, ana va lingainga oku fendela olosuku viavo. Momo oco nda ca linga ekandu ku Yehova, Suku yene.

¹⁹ Eci o ñuala imbo ocingonja osimbu oku yaka lalio loku li kuata, ka ci tava oku nyõla oviti vialio oku vi timbula londiaviti. Momo kokuavio o liako, oco ku ka vi timbule. Oviti viovusenge hẽ, omanu okuti o vi ñuala ocingonja?

²⁰ Oviti wa kulĩha okuti haviokuliako, ovio lika ci tava oku vi nyõla loku vi timbula okuti o tungilapo imbo liaco li ku yakisa olumbo lua pama toke li nyõlẽha.