ESINUMUĨLO 2 - Embimbiliya - Bíblia Sagrada em Umbundu

¹ Oco tua ñualãpo, tua enda lonjila yenda kekalasoko kuenje tua imba ovaso ko Kalunga Kakusuka ndeci Yehova o sapuila. Oloneke via lua tua ñuala ñuala omunda Seire.

² Kuenje Yehova wa popia lame hati,

³ Oku ñuala ñuala omunda yilo ci tẽla yapa; ñualipo, suñami ko Norte.

⁴ Sapuila omanu, huti, Vu laika oku pita kulilo wa vamanjene va Esau, va tunga ko Seire; lovo vo kuateli usumba. Oco lilavi, ciwa,

⁵ ko ka lisanumũli lavo. Momo vofeka yavo siu wihi ndaño omãi yimosi, momo omunda Seire nda yeca ku Esau ndocipiñalo.

⁶ Okulia vu landa kokuavo lolombongo, ndaño ovava oku nyua vu landavo lolombongo.

⁷ Momo Yehova Suku yene wo sumũluĩsa kupange wosi wovaka ene; wa kulĩhi ndomo wa endeli vekalasoko eli linene. Alima akuĩ akuãla Yehova Suku yene a kala lene, lacimue wa suki.

⁸ Oco tua pitahãla vamanjetu va Esau va tunga ko Seire, tua sia onjila yovenyala yenda ke Elati loke Eciongevere. Yu tua ñualãpo tua pita vonjila yenda kekalasoko lia Moavi.

⁹ Yehova wa popia lame hati, Ku ka sakalaise va Moavi, pamue oku yaka lavo ovita, momo siu wihi ofeka yavo ha yi lingi yene, momo Are nda yeca ale ku va Lote ha yi lingi yavo.

¹⁰ Kosiahũlu ava va tungileko va Emi. Va Emi omanu vanene haivo va lua, kokulepa va lisoka la va Anaki.

¹¹ Kuenje ndeci va Anaki va tukuiwa va Refaimi, ca lomboloka ovindululu, haico va Emi lavovo va tukuiwa va Refaimi. Va Moavi puãi va va tukula va Emi.

¹² Kosiahũlu va Hori lavovo va tungile ko Seire, puãi va Esau va va tundisa kuenje va va nyõla. Va kuata ofeka yavo ndeci Isareli a linga lofeka Yehova a va iha ha yi lingi yavo.

¹³ Kaliye votoki, yoki ocitovotovo Cereda. Oco tua yoka ocitovotovo Cereda.

¹⁴ Oloneke tua ñuala ñuala tunde koku tunda ko Kadesi Barnea toke tua yoka olui Cereda via linga akuĩ atatu kanyamo kanyamo ecẽlãla. Oloneke viaco ocitumbulukila cosi casualali va kala vocilombo ca pua. Va kundukila vovita ndomo Yehova a lisinga lavo.

¹⁵ Momo eka lia Yehova lia va veta kuenje lia va nyõla toke vocilombo mua pua asualali.

¹⁶ Eci asualali vosi va kunduka yu va fila pokati komanu,

¹⁷ oco Yehova a popia lame hati,

¹⁸ Etaili o somboka ulilo wa Moavi, wiñila vo Are.

¹⁹ Eci o pitila ocipepi lofeka ya va Amoni ku ka va sakalaise, pamue oku yaka lavo ovita momo siu wihi ofeka yavo ha yi lingi yene; nda yeca ale ku va Lote ha yi lingi yavo.

²⁰ Ofeka yaco ya tukuiwavo ofeka ya va Refaimi omo va Refaimi ovo ovindululu va tungileko. Va Amoni puãi va va tukola va Samisumi.

²¹ Va Samisumi omanu vanene, haivo va lua, kokulepa va lisoka la va Anaki. Puãi Yehova wa nyõlela va Samisumi kovaso a va Amoni kuenje va Amoni va tundisa va Samisumi yu va kuata ofeka yavo.

²² Yehova wa ci linga ndeci a lingila va Esau va tunga ko Seire. Momo Yehova wa nyolela va Hori kovaso a va Esau, oco va Esau va tundisa va Hori, kuenje va kuata ofeka yavo. Toke etaili va Esau haiko va kasi.

²³ Ndaño va Awimi haico ca pita lavo. Va Awimi va tungile vovaimbo ofeka yaco toke ko Gasa. Puãi va Kafitore va va katukila kuenje va va nyõla. Oco va Kafitore va tundisa va Awimi kuenje va tunga vofeka yavo.

²⁴ Oco Yehova wamisako vali ondaka a kala loku vangula lame hati, Votoki. Wili vonjila. Yoki olui Arinone. Kũlĩhi okuti ñasi loku eca peka liene Sihoni u Amori, eye Soma ya Hesibone. Ñasi loku wecela kumue lofeka yaye. Fetiki oku yaka laye loku kuata ofeka yaye.

²⁵ Etaili muẽle fetika oku kapa onguele lusumba vovitima viomanu vosi va kasi vemẽhi lilu. Vo kuateli ene usumba. Eci va yeva oluhimo luene vo yokokeli loku u lulumili.

²⁶ Oco nda katula olomunga vekalasoko lia Kedemoti kuenje nda vi tuma ku Sihoni, Soma ya Hesibone. Nda vi tuma lolondaka viombembua, siti,

²⁷ Va mitise vofeka yove. Ngendela velila lika, si pambukila kondio ndaño kepĩli.

²⁸ Okulia ndia o ndandisa lolombongo, lovava nyua o ndandisavo lolombongo. Ngendela posi oco tava ño okuti mita toke njoka Yordão loku iñila vofeka Yehova Suku yetu a tu ĩha.

²⁹ Va Esau va tunga ko Seire la va Moavi va tunga ko Are oco va ndinga.

³⁰ Puãi Sihoni, Soma ya Hesibone, ka tavele oku tu pitisa vofeka yaye momo Yehova Suku yene wo tĩlĩsa kuenje wa sivisa utima waye okuti u weca peka liene, ndeci ci kasi etaili.

³¹ Kuenje Yehova wa popia lame hati, Ota, nda fetika ale oku eca Sihona lofeka yaye kokuene. Fetika oku iñila loku kuata ofeka yaye.

³² Oco Sihoni lomanu vaye vosi va tu tundila kuenje va liyaka letu ko Yahaca.

³³ Kuenje Yehova, Suku yetu, wo weca peka lietu. Tua va yula vosi, eye lomãla vaye kuenda omanu vaye vosi.

³⁴ Kotembo yaco tua kuata ovaimbo aye osi kuenje tua a nyõla. Tua nyõlavo alume lakãi lotumãla, ka tua silemo ndaño umosi.

³⁵ Ovinyama lovikuata viovovaimbo tua kuata ovio lika tuopamo.

³⁶ Tunde ko Aroere imbo li kasi kesukiyo liomuva ya Arinone kuenda tunda kimbo li kasi vomuva, toke ko Gileada, ka kua kaile imbo ka tua tẽlẽle. Yehova, Suku yetu, wa eca cosi povaka etu.

³⁷ Kofeka ya va Amoni okuti kovaimbo a kasi konele yolui Yaboke, kuenda kovaimbo a kasi vofeka yolomunda kuenda kuosi Yehova, Suku yetu, a tu lemela oko lika ka wa pitilili.