ESINUMUĨLO 19 - Embimbiliya - Bíblia Sagrada em Umbundu

¹ Eci Yehova, Suku yove, a lundula omanu vakuafeka eyi yi ku ihã Yehova, vovaimbo avo lovolonjo viavo,

² oco vofeka Yehova Suku a ku iha oku kuata o tepamo ovaimbo atatu.

³ O pela olonjila viaco, kuenje ofeka yove, yina ya ku iha Yehova Suku yove ha yi lingi ocipiñalo, o yi tepisa olonepa vitatu okuti omondi yosi yi kuete oku yi tẽla oku tilila.

⁴ Ondaka yomondi yi tililako ha popela omuenyo waye yi kala ndomo: Wosi wa ipa ukuavo ocingunguluhutu okuti ka kaile ale laye lesuvu,—

⁵ ndeci umue nda wa enda vusenge kumue lukuavo oku ka timbula oviti, kuenje poku timbula uti, wa nyuña ondiaviti londiaviti yi sokoka, yi veta ukuavo okuti o fa,— oco omunu waco o tẽla oku tilila kimbo limue pokati kovaimbo aco oku popela omuenyo waye,

⁶ sanga ufetuluinyi wosonde o landula omondi osimbu utima waye wa tokotelua, kuenje o yi kuata momo ungende wa lepa, kuenje o yi ponda ndaño omondi ka ya sesamẽlẽle okufa, momo ka suvukile ale ukuavo.

⁷ Oco nda ku sapuila, siti, Tepamo ovaimbo atatu.

⁸ Kuenje noke nda Yehova, Suku yove, o yanjisa ovililo viove, ndeci a lisinga lolosekulu viove, yu o ku ihã ofeka yosi a likuminya oku eca kolosekulu viove,

⁹ kuenje nda ove o lava loku tẽlisa ocikundi eci ñasi oku ku ĩha etaili okuti o sola Yehova, Suku yove, loku endaela volonjila viaye oloneke viosi, oco o vokinyako ovaimbo atatu akuavo kovaimbo ana atatu wa tepamo ale.

¹⁰ O ci linga okuti eko lioku pesela osonde ka li ku wila kuenje osonde yu we lipua ka yi pesekela vofeka yove eyi Yehova, Suku yove, a ku iha ha yi lingi ocipiñalo.

¹¹ Puãi nda umue wa suvuka ukuavo, kuenje u lavekela loku u katukila, noke u veta okuti o fa, kuenje nda omunu waco o tilila kimbo limue pokati kovaimbo aco,

¹² oco akulu vovimbo liavo va tuma oku wupako, vo weca peka liufetuluinyi wosonde okuti layevo o fa.

¹³ Ovaso ove ka ko file ocisõi, puãi o yelisa Isareli keko liosonde ye lipua okuti ci kala ciwa laye.

¹⁴ Ka ci tava oku sondolola onetelo yukuẽle, yina olosekulu via tetelele kocipiñalo cove o tambula vofeka yi ku ĩha Yehova, Suku yove, oku tungamo.

¹⁵ Nda omunu umue wa lueya cimue pamue wa linga ekandu limue, pamue o kasi longole yimue, ka ci tava oku u pisa londaka yombangi yimosi lika. Te londaka yolombangi vivali pamue vitatu oco ci tava oku pisa omunu.

¹⁶ Nda ombangi yuhembi yi katukila umue oku u lundila cimue ka lingile,

¹⁷ oco omanu vaco vavali va likuetele ondaka veya ku Yehova okuti kovitunda lolonganji violoneke viaco.

¹⁸ Olonganji vi pula lutate, kuenje nda ombangi yaco ombangi yuhembi, okuti wa imbila ukuavo uvangi wuhembi,

¹⁹ oco o linga laye ndeci eye a sokele oku linga lukuavo. Oco o yelisa evĩho pokati kene.

²⁰ Vakuavo va siala va ci yeva, kuenje va kuata usumba. Ka va lingi vali evĩho ndeli pokati kene.

²¹ Ovaso ove ka ko file ocisõi. Ci kala muẽle omuenyo lomuenyo, iso liso, eyo leyo, eka leka, omãi lomãi.