ESINUMUĨLO 18 - Embimbiliya - Bíblia Sagrada em Umbundu

¹ Ovitunda va Lewi, okuti epata liosi lia va Lewi, ka va kuete onepa pamue ocipiñalo ndeci va Isareli vakuavo. Va litekula lovilumba vioku yoka via lumbiwila Yehova, kuenda ovilumba vikuavo via va tukuiwila.

² Ka va kuete ocipiñalo kumue lavakuavo, Yehova eye o linga ocipiñalo cavo, ndeci a likuminya lavo.

³ Eci omanu va lumba ocilumba coku yoka, ci kale congombe, ci kale comeme, evi va tepako okuti vi linga viovitunda, vievi, okuokuo lolombanjo vivali kuenda efe.

⁴ U wihavo ovaima atete olomema viove, lovinyu viove, kuenda ulela wove, lovonya atete a pemuiwa kolomeme viove o wihavo.

⁵ Momo pokati kapata ene osi, eye muẽle Yehova a nolapo okuti, eye lomãla vaye va likalela kuenje va vumba vonduko ya Yehova oloneke ka vi pui.

⁶ Kuenje u Lewi oku tunda kimbo liavo loku enda kocitumãlo Yehova a nola, ci tava ca lua, posi ño a yongola. Oco eci u Lewi a tunda vimbo limue liofeka yosi ya Isareli kuenje enda kocitumãlo Yehova a nola,

⁷ oco o kuete omoko yoku vumba vonduko ya Yehova, Suku yaye, ndeci va Lewi vakuavo va lingainga, ava va kasilili ale oku vumba Yehova.

⁸ O lialia ndeci ci lialia vakuavo. Kilu liaco o kuetevo viaye muẽle.

⁹ Eci wiñila vofeka Yehova, Suku yove, a ku ihã ka ci tava oku lilongisa oku linga ovina viumbondo womanu vaco.

¹⁰ Pokati kene ka pa ka sangiwe umue o yoka vondalu ndocilumba omõlaye ulume pamue omõlaye ukãi. Ka pa ka sangiwevo ukuakutãha, ndaño ukuakusingila, ndaño ukuakulova, ndaño onganga,

¹¹ ndaño ukuakuyamba, ndaño ukuakawengo, ndaño ociliangu, ndaño ukuavinjualume.

¹² Momo wosi o linga ovina evi eye ocimbondo ku Yehova. Kuenje Yehova, Suku yove, o kasi loku tundisa omanu vaco kovaso yove, omo ovombondo avo alua.

¹³ Oco ove o linga omunu wa pua eko kovaso a Yehova, Suku yove.

¹⁴ Momo omanu wendela oku va tundisa, va yevelela ku vakuakusingila, lokuvakuakutãha. Ove puãi, Yehova, Suku yove, wa ku lemẽla ocitua caco.

¹⁵ Pokati kene, okuti pokati kavamanjene, Yehova, Suku yene, o katulapo uprofeto ndame, eye vu yevelela,

¹⁶ ndeci ca kaile vo Horeve keteke liohongele eci wa lekisa onjongole yutima wove ku Yehova, Suku yove, huti, Si ka yeve vali ondaka ya Yehova, Suku yange, ndaño oku mõla vali ondalu eyi yinene sanga fa.

¹⁷ Kuenje Yehova wa popia lame hati, Cosi va popia ca sunguluka.

¹⁸ Pokati kavo muẽle ñatulapo uprofeto ndove. Ñapa olondaka viange vomẽla waye, leye o va lomboluila cosi ndu sapuila.

¹⁹ Kuenje wosi ka yevi olondaka viange, evi uprofeto a popia vonduko yange, ame muẽle ndu pula eci ka vi yevela.

²⁰ Puãi uprofeto wosi o popia losiata vonduko yange ondaka yimue yokuti hameko ndo tuma oku yi popia, uprofeto waco o fa, ndaño uprofeto o popia vonduko yolosuku viñi layevo o fa.

²¹ Kuenje nda o likunda vutima wove huti, Tu limbuka ndati ondaka yimue okuti ha Yehovako wa yi popia?—

²² eci uprofeto o popia vonduko ya Yehova, londaka yaco ka yi lingiwa ndaño oku lemuluiwa, ondaka yaco oyo Yehova ka yi popele. Uprofeto waco wa yi popia losiata, ku ko yokokele.