ESINUMUĨLO 17 - Embimbiliya - Bíblia Sagrada em Umbundu

¹ Ka ci tava oku lumbila Yehova, Suku yove, ongombe pamue omeme ya lemãla pamue ya seluka, momo oco umbondo ku Yehova, Suku yove.

² Nda pokati kene, vovaimbo ene, ana a ku ĩha Yehova, Suku yove, nda pa sangiwa ulume pamue ukãi o linga eci cĩvi ku Yehova, Suku yove, okuti wa nyõla ocisila caye,

³ omo wa enda oku vumba olosuku viñi loku vi fendela, pamue oku fendela ekumbi, losãi, kuenda olombungululu, evi nda handeleka siti, Ka ci tava oku vi fendela,

⁴ kuenje nda va ku ci sapuila okuti ove wa ci yeva, oco o pula lutate. Kuenje nda ondaka yaco yocili muẽle okuti hovetiko, puãi umbondo waco wa lingiwila ocili vo Isareli,

⁵ oco o tundisila kofeka ulume waco pamue ukãi waco wa linga evĩho liaco. Kuenje ulume waco pamue ukãi waco u sosola lovawe toke o fa.

⁶ Kuvangi womanu vavali pamue vatatu oko ku tavela oku ipãla u wa sesamẽla oku fa. Kuvangi womunu umosi ka ci tava oku tukuila omunu okufa.

⁷ Ovaka olombangi o-o tete a wolõhela oku wipaya, noke ovaka owiñi. Oco o tundisa evĩho pokati kene.

⁸ Nda vovaimbo ene muiya ondaka yimue okuti ove vekanga ku yi tẽla, ndeci ondaka yimue yoku ponda, nda hẽ okuponda, pamue ondaka yimue yoku tetulula pokati komanu vavali, pamue mbi ondaka yomunu wa valula ukuavo, pamue olondaka viñi viñi ku vi tẽla, oco ove o votoka, wenda kocitumãlo Yehova, Suku yove, a nola.

⁹ Wenda kovitunda va Lewi, konganji yi kasi locikele oloneke viaco kuenje o va pula, lovo va ku sapuila ndomo o tetulula ondaka yaco.

¹⁰ Eci o tundako o linga ndeci ava wa sanga vocitumãlo Yehova Suku a nola va ku sapuila, o linga muẽle lutate cosi va ku sapuila.

¹¹ O linga muẽle ndomo va ku lomboluila. Ndomo va ku imba onumbi yoku tetulula omo o linga. Vonjila yavo ndomo va ku lomboluila ku ka tundemo. Ku ka pambukile kondio ndaño kepĩli.

¹² Omunu ukuemande, okuti ka pokola kocitunda ci vumba Yehova, Suku yove, ndaño konganji, omunu waco o fa. Oco ove a tundisa evĩho vi Isareli.

¹³ Lomanu vosi va ci limbuke loku ci kuatela usumba okuti emande ndolio ka li lingiwa vali.

¹⁴ Eci wiñila vofeka Yehova, Suku yove, a ku iha, leci o yi kuata loku tungamo, kuenje o linga huti, Ndi linolela osoma, ndomo mu kasi apata osi a lisungue lame,

¹⁵ ci tava calua oku vialeka ha lingi Soma yove umue Yehova, Suku yove, a nola. U o vialeka ha lingi osoma yu o tunda kapata ene. Ka ci tava oku vialeka ukuafeka yiñi, umue haweneko.

¹⁶ Haimo ka ci tava osoma oku fuka otuvalu tualua, pamue oku tiuwiya omanu ke Egito okuti va fukilako otuvalu; momo Yehova wa popia lene hati, Vonjila yaco ka vu pitimo vali.

¹⁷ Ndaño osoma oku kala lakãi valua lacovo ka ci tava sanga utima waye u sakalala. Ndaño oku limuisa ulu walua enene pamue opalata lacovo ka ka ci linge.

¹⁸ Tuli a tumãla komangu yusoma waye, o sonẽha ovihandeleko evi velivulu liaye muẽle. O vi sonẽha ndomo vi kasi velivulu liovitunda va Lewi.

¹⁹ Noke o kala kala lelivulu liaco kuenje o tanga tangamo oloneke viosi viomuenyo waye. Poku tanga tangamo o lilongisa oku sumbila Yehova, Suku yaye, poku lava olondaka viosi viovihandeleko vilo lovisila evi, loku vi linga.

²⁰ O lilongisavo oku litata okuti ka livelisapo eye muẽle loku sepula omanu vaye, kuenda vali, ka tundi kovihandeleko oku pambukila kondio pamue kepĩli. O litata okuti oloneke viaye levi viomãla vaye vi lua vusoma waye vo Isareli.