ESINUMUĨLO 16 - Embimbiliya - Bíblia Sagrada em Umbundu

¹ Ivaloka osãi ya Aviva loku lingila Yehova, Suku yove, o Pascoa. Momo vosãi ya Aviva omo Yehova, Suku yove, wa ku upa uteke ke Egito.

² Kuenje ocilumba coku yoka wupa kocunda colomeme pamue kocunda colongombe hu ci lumbila Yehova, Suku yove, ko Pascoa, o ci lumbila kocitumãlo Yehova a nola oku tungilako onduko yaye onjo yoku kala.

³ Ositu yaco ka ci tava oku yi lia kumue lombolo yi kuete etumbisa. Oloneke epanduvali vu yi lia kumue lombolo ka yi kuete etumbisa haiyo ombolo yohali, momo wa tundi ve Egito lonjanga. Oco vu yi lia kumue lombolo ka yi kuete etumbisa okuti oloneke viosi viomuenyo wove wivaloka eteke wa tunda vofeka ye Egito.

⁴ Oloneke epanduvali etumbisa ka li ka mõlẽhele kokuove kovikanjo viove viosi. Kuenje kositu o lumba oñolosi yeteke liatete ka ku ka siale yimue yi lala toke omele.

⁵ Vovaimbo Suku a ku iha ka ci tava oku lilamo o Pascoa.

⁶ Puãi vocitumãlo Yehova, Suku yove, a nola oku tungisilako onduko yaye onjo yoku kala, omo o lumbila ocilumba co Pascoa. O ci lumba koñolosi poku iñila kuekumbi, ca soka ndekumbi wa tunda ke Egito.

⁷ Kocitumãlo caco Yehova, Suku yove, a nola haiko o yi yokela loku yi lia. Noke omẽle o tunda loku enda kombalaka yove.

⁸ Oloneke epandu o lia olombolo ka vi kuete etumbisa. Keteke liepanduvali wongoloki oku fendela Yehova, Suku yove, Oku lingamo upange ka ci tava.

⁹ O tenda olosemana epanduvali. Eteke o fetika oku imba omĩla koku ungula olio o fetika oku tenda olosemana viaco epanduvali.

¹⁰ Eci olosemana viaco epanduvali via pita oco o lingila Yehova, Suku yove, ofesta yolosemana. Kofesta yaco o lumba ku Yehova, Suku yove, ocilumba cocipango oku lumba ndomo Yehova, Suku yove, a ku sumũluĩsa.

¹¹ Kuenje o kala lesanju kovaso a Yehova, Suku yove, ove, lomõlõve ulume, lomõlõve ukãi, lupika wove ulume, lupika wove ukãi, lu Lewi o kasi vimbo liove, locingendeleyi, losiwe, locimbumba, ava va kasi pokati kene. Vosi muẽle vu sanjukila pamosi vocitumãlo Yehova, Suku yove, a nola oku tungisilako onduko yaye onjo yoku kala.

¹² Wivaluka okuti wa kaile upika ve Egito, kuenje o tẽlisa lutate ovisila evi.

¹³ Eci wongulale evi viocisaselo cove levi viocikoselo cove oco o linga ofesta yolosinge oloneke epanduvali.

¹⁴ Ofesta yaco yove yi linga ofesta yesanju. Vu sanjuki pamosi, ove, lomõlõve ulume, lomõlõve ukãi, lupika wove ulume, lupika wove ukãi, lu Lewi, locingendeleyi, losiwe, locimbumba, okuti vosi va kasi vimbo liove.

¹⁵ Oloneke epanduvali o lingila Yehova, Suku yove, ofesta. O yi lingila vocitumãlo Yehova a nola, momo Yehova, Suku yove, o ku sumũluĩsa kovaima ove osi, lokupange wosi wovaka ove, kuenje o sanjuka ocili lutima wove wosi.

¹⁶ Olonjanja vitatu kunyamo alume vove vosi va tukulukila ku Yehova, Suku yove, kocitumãlo a nola; okuti kofesta yolombolo ka vi kuete etumbisa, kuenda kofesta yolosemana lokofesta yolosinge. Ka veya ovoko ku Yehova.

¹⁷ Omunu omunu eca ndeci a tẽla, oku ci sokisa lesumũlũho Yehova, Suku yove, a ku iha.

¹⁸ Vovaimbo osi Yehova, Suku yove, a ku iha o nolamo olonganji lakulu. O va nola epata epata. Va tetuluila omanu lesunga.

¹⁹ Ka ci tava oku pengisa esunga ndaño oku amẽla omunu. Ka ci tava oku tambula ovitukiko, momo ovitukiko vi sitika ovaso a vakualondunge, kuenje vi fisa olondaka via vakuesunga.

²⁰ Esunga, esunga lika, o kuama, hu kala lomuenyo loku piñala ofeka Yehova, Suku yove, a ku ĩha.

²¹ Ka ci tava oku peka uti ho lingi ongunji yi kola ocipepi lutala wa Yehova, Suku yove, una o tunga.

²² Ndaño oku litumbikila ongunji yi kola ka ci tava, momo Yehova, Suku yove, o ci suvuka.