ESINUMUĨLO 15 - Embimbiliya - Bíblia Sagrada em Umbundu

¹ Kefulilo lianyamo epanduvali epanduvali vu linga ongecelo.

² Ongecelo yaco yi kala ndomo: Ondevalisi yosi yecele eci a levalisile ukuavo. Ka ka ci silĩhe kukuavo pamue kepalanga liaye, momo kua imbiwa oluiya luongecelo ya Yehova.

³ Kocingendeleyi ci tava oku ci silĩha, puãi cosi cove ci kasi lukuẽle ecela.

⁴ Puãi pokati kene ka pa kala vali osuke momo Yehova o vu sumũluĩsa ca lua vofeka Yehova, Suku yene, a wihi haiyo yi linga ocipiñalo.

⁵ Cinene oku yevelela lutate kondaka ya Yehova, Suku yene, loku pokola kovihandeleko ndu wĩhi etaili.

⁶ Momo Yehova, Suku yene, o vu sumũluĩsa ndeci a likuminya lene. Kuenje ene vu levalisa olofeka via lua, puãi ka vu vi levala, haene vu viala olofeka via lua, puãi ovo ka vo viali.

⁷ Nda vimbo limue liovofeka Yehova Suku o wĩhi, muli ukuẽle osuke ku ko tilĩsile utima wove pamue oku u kutikila eka,

⁸ puãi u ketuluila eka loku u levalisa eci a sukila.

⁹ Lunguka sanga vutima wove mu kala ocisimĩlo cĩvi, huti, Unyamo wepanduvali, una wongecelo, wo wiya,— liso liove li vanja lãvi ukuẽle osuke, kuenje ku wĩha cimue, leye o vilikiya ku Yehova oku ku lisiõsuĩla kuenje cu ku lingila ekandu.

¹⁰ O ci levalisa muẽle kokuaye lutima u yela. Vutima wove ka mu ka kale ocikukui eci u levalisa. Momo eci, Yehova, Suku yove, o ku ci sumũluĩsila kupange wove wosi, la cosi ci linga ovaka ove.

¹¹ Momo lalimue eteke olosuke vi pua vofeka. Oco ndi ku sapuila, siti, Ketuluila manjove eka liove, li ketuluilavo olosuke lolohukui vi kasi vofeka yene.

¹² Nda umue ukuẽle, okuti umue u Heveru ulume, pamue umue u Heveru ukãi, o landisiwa kokuove, eye o ku vumba anyamo epandu, kunyamo wepanduvali ove o wĩha eyovo.

¹³ Leci o wĩha eyovo ka ci tava oku u weca ño upolokoso.

¹⁴ Kocunda cove, lokocisaselo cove, kuenda kocikoselo cove, oku u wupilako oku u wavela ndeci Yehova, Suku yove, a ku sumũluĩsa.

¹⁵ Wivaluka okuti lovevo wa kaile upika vofeka ye Egito, kuenje Yehova, Suku yove, wa ku yovola. Oco nda ku handelekela ndoco etaili.

¹⁶ Puãi nda o popia love, hati, Siu ku tundi,— omo a ku sola kuenje wa solavo vakuanjo yove momo o kasi ciwa lene,—

¹⁷ oco nyañula ociketelo, u tombuila etuĩ liaye kepito, kuenje o linga upika wove oloneke viosi. Haico o lingavo lupika wove ukãi.

¹⁸ Ka ci ka ku tĩlĩle eci o wĩha eyovo; momo wa ku vumba anyamo epandu kuenje epese liaco lia soka ño lonepa yeci o peselela ondingupange ya fetiwa. Oco Yehova, Suku yove, o ku sumũluĩsa kovina viosi o linga.

¹⁹ Olonuñulu viosi vialume via citiwa vocunda cove colongombe locunda cove colomeme, o vi eca ku Yehova, Suku yove, ndocilumba. Oku linga upange lonuñulu yolongombe viove ka ci tava ndaño oku pemũla onuñulu yolomeme viove.

²⁰ Ulima kulima ove lonjo yove o yi lila kovaso a Yehova, Suku yove, kuosi Yehova a nola.

²¹ Nda yi kuete etondelo limue, okuti ocilema pamue omeke, pamue etondelo limue likuavo lĩvi, ka ci tava oku yi lumba ku Yehova, Suku yove.

²² Yi lila vimbo liene muẽle. U ka liyelisile lu wa liyelisa, vosi va tẽla oku lako ndeci va lialia ombambi pamue osonge.

²³ Cimosi lika okuti oku lia osonde oco ka ci tava, osonde o yi peselela posi ndovava.