ESINUMUĨLO 14 - Embimbiliya - Bíblia Sagrada em Umbundu

¹ Ene vumãla va Yehova, Suku yene, ko ka litandi, pamue oku lipemuĩla asenya kovipolo u wa fa.

² Momo wupata li kola ku Yehova, Suku yene, kuenje pokati kapata osi okilu lieve, Yehova wo nolipo ene oku linga epata liaye muẽle.

³ Ka ci tava oku lia ovina viumbondo.

⁴ Ovinyama vu lia vievi: ongombe, omeme, ohombo,

⁵ osonge, ombambi, onusi ohoha, omunya, omalanga, lokasenda.

⁶ Pokati kovinyama, ocinyama cosi ca toka ekonjo okuti ci kasi lakonjo a litepa, haico ci lukola, oco ci tava oku liwa lene.

⁷ Haimo lumue pokati kevi vi lukola pamue vi kasi lakonjo a litepa, evi ka vi tava oku liwa, vievi: ongamelo, ondimba, ohuita, momo vi lukola puãi ka via tokele ekonjo, kokuene ovio muẽle via vĩha.

⁸ Ongulu, omo ya toka ekonjo puãi ka yi lukola, kokuene ya vĩha. Ka ci tava oku lia ositu yaco ndaño oku lamba kocife caco.

⁹ Pokati kevi viosi vi kasi vovava, vi tava oku liwa lene vievi: cosi ci kasi lovilele lakaka oco ci tava oku lia.

¹⁰ Cosi ka ci kasi lovilele lakaka oco ka ci tava oku ci lia, kokuene ca vĩha.

¹¹ Onjila yosi yi yela ci tava ene oku yi lia.

¹² Puãi evi ka vi tava oku liwa lene vievi: ongonga yulombo, ohokohoko, omungu,

¹³ okapamba, okaliama, lolombuto viosi viociselẽle,

¹⁴ olombuto viosi viocikuamanga,

¹⁵ ombo, ocimbamba, olombonda, lolombuto viosi violongonga,

¹⁶ okalumba, ocihukulu, lokacukucuku,

¹⁷ ohombo yenyãla, ohumbihumbi, lombundambunda,

¹⁸ la cilumewapunda, lolombuto viosi viapanda, la muipui lelima.

¹⁹ Lotuvipuka tuosi tu kasi lavava kokuene tua vĩha, ka tu liwa.

²⁰ Onjila yosi ye yela yi tava oku liwa lene.

²¹ Ka ci tava ene oku lia cimue ca lifila. Ci tava oku ceca kocingendeleyi ci kasi vimbo liene, okuti ci ci lia, pamue oku ci landisa komitambamba. Ene puãi wupata li kola ku Yehova, Suku yene. Ka ci tava oku teleka okahombo vasenjele a inaco.

²² Weci muẽle olonepa viekuĩ viociluli ci tunda kombuto yene, eci ci tunda kovapia unyamo kunyamo.

²³ Eci vu lia onepa yekuĩ yolomema viene, leyi yovinyu viene, leyi yulela wene, lolonuñulu viokoviunda viene, levi violongombe viokoviunda viene violomeme, vu vi lila kovaso a Yehova, Suku yene, kocitumãlo a nõla oku tungisilako onduko yaye onjo yoku kala, okuti wu lilongisa oku sumbila Yehova, Suku yene, oloneke viosi.

²⁴ Nda ungende waco wa lepa enene okuti ka vu tẽla oku tuala onepa yekui yeci Yehova, Suku yene, o sumuluĩsi laco, omo kocitumãlo Yehova, Suku yene, a nola oku tungisilako onduko yaye onjo yoku kala, kupãla,

²⁵ oco vu landisa cosi lolombongo, kuenje olombongo viaco vu vi kuta loku vi ambata peka kuenje wendi kuosi Yehova Suku yene a nola.

²⁶ Oko vu landa cosi ño vu yongola, ci kale olongombe pamue olomeme, ci kale ovinyu pamue evi vi koluisa, vu landa muẽle cosi vu yongola, kuenje ene la vakualonjo viene haiko vu lila lesanju kovaso a Yehova, Suku yene.

²⁷ Ka ci tava oku pukula u Lewi o kasi vovaimbo ene, momo ka kuete onepa pamue ocipiñalo vofeka yene.

²⁸ Kefulilo lianyamo atatu atatu vu likapela onepa yekui yovaima ene unyamo waco, vu vi soleka vovaimbo ene.

²⁹ Kuenje va Lewi, omo ka va kuete onepa pamue ocipiñalo vofeka yene, lovingendeleyi lolosiwe lovimbumba vi kasi vovaimbo ene, veya, va liako te ve kuta, okuti Yehova, Suku yene, u sumũluĩsili upange wosi wa linga ovaka ene.