ESINUMUĨLO 13 - Embimbiliya - Bíblia Sagrada em Umbundu

¹ Nda pokati kene pa votoka uprofeto, pamue ukuakulota olonjoi, kuenje o ku iha ondimbukiso pamue ocikomo,

² londimbukiso yaco yiya ocili, pamue ocikomo, ndeci a popia love, kuenje nda eye o linga hati, Tu kuami loku vumba olosuku viñi, vina kua vi kulĩhĩle,—

³ ku ka yevelele kolondaka viuprofeto waco, pamue viukuakulota olonjoi, momo Yehova, Suku yove, o kasi loku ku nyika, ha kulĩhisa nda hẽ o sola Yehova, Suku yove, lutima wove wosi, kuenda lomuenyo wove wosi.

⁴ Kuami Yehova, Suku yove, loku u sumbila. Pokola kovihandeleko viaye, loku sumbila ondaka yaye. Eve muẽle o vumba, loku kakatela kokuaye.

⁵ Puãi uprofeto waco, pamue ukuakulota olonjoi, ipaiwa, momo wa longisa oku ñualelapo Yehova, Suku yove, una wa kupa vofeka ye Egito, haeye wa ku yovola konjo yupika. Wa ku ci longisila oku ku pambuisa vonjila Yehova, Suku yove, a ku handeleka oku endelamo. Oco tundisa evĩho liaco pokati kene.

⁶ Nda manjove, wa tundi vimo limosi, pamue omõlove ulume, pamue omõlove ukãi, pamue ekamba liove lia soka ndomuenyo wove muẽle, pamue ukãi wove wa soliwa, o ku yonjela pulika, hati, Tu ende, tu vumbe olosuku viñi,— vina ku vi, ndaño ove ndaño olosekulu viove,—

⁷ olosuku viaco viñi via lomboloka olosuku viapata o ñuali, ci kale apata a kasi ocipepi lene, ci kale apata a kasi kupala lene, apata osi muẽle oluali, tunde kocivanja eci coluali toke kocivanja cikuavo,—

⁸ ku ka tave kokuaye, ndaño oku u yevelela. Ovaso ove ka ko fileko ocisõi, ndaño oku u popela, ndaño oku u limbukila,

⁹ puãi wipaya muẽle. Eka liove tete liu wolõhẽla oku u ponda, kuenje noke, kovaso yaco, ovaka owiñi.

¹⁰ U sosola lovawe toke o fa, momo wa sanda oku ku pambuisa ku Yehova, Suku yove, una wa ku upa vofeka ye Egito, vonjo yupika.

¹¹ Va Isareli vosi va ci yeve kuenje va kuate usumba. Ka va ka linge vali evĩho ndeli pokati kene.

¹² Nda vu yeva okuti vimbo limue pokati kovaimbo Yehova o wihi oku kalamo,

¹³ mua tunda omanu vamue vakuakumamayala, kuenje va yonja olonungi vimbo liaco, vati, Tu endi, tu vumbi olosuku viñi, vina ene ka wa kulĩhĩli,—

¹⁴ oco vu pula ciwa, loku kulĩhĩsa, loku sinda. Kuenje tala, ondaka yaco, nda yi kasi ocili, hayovetiko, okuti pali umbondo waco pokati kene,

¹⁵ oco vu nyõla lomẽla wosipata olonungi vimbo liaco, oku li kundula liosi lomẽla wosipata, la cosi ci kasimo, ndaño ovinyama.

¹⁶ Lovikuata viaco viosi vu vi konguila vocila, kuenje imbo liosi lovikuata viaco viosi vu vi yoka ndocilumba ku Yehova, Suku yene. Imbo liaco li linga elunda, ka li tungiwa vali.

¹⁷ Lacimue covina via tukuiwila oku nyoliwa cupiwamo lene, okuti onyeño yalua ya Yehova yi tula, o vu linga ohenda, loku vu sola, loku vu luisa. O linga ndeci a lisila lolosekulu viene,

¹⁸ nda vu yeva ondaka ya Yehova, Suku yene, loku pokola kovihandeleko viaye, evi ñasi loku u wihi etaili, loku linga eci ca sunguluka ke Yehova, Suku yene.