ESINUMUĨLO 12 - Embimbiliya - Bíblia Sagrada em Umbundu

¹ Ovina vu likundika oku vi linga vofeka Yehova, Suku yolosekulu viene, wo wihi oku kalamo oloneke viosi viomuenyo wene kilu lieve, vievi,

² Vu nyõla muẽle ovitungilo viosi apa omanu vaco va tundisua va vumbila olosuku viavo, ci kale kilu liolomunda via lepa, pamue kilu liawulu, ci kale vemẽhi lioviti viosi via pulika.

³ Vu nyõla ovotala avo, loku nyanyõla olongunji viavo, loku yoka londalu oviti viavo vi kola. Vu vumbula oviñumañuma violosuku viavo, loku nyõla onduko yavio kocitungilo caco.

⁴ Hacoko vu lingila Yehova Suku yene.

⁵ Puãi pokati kovitumãlo viosi viapata ene osi, vu vanjiliyapo ocitumãlo Yehova, Suku yene, a nola oku tungisilako onduko yaye onjo yoku kala.

⁶ Kocitumãlo caco oko wendaendi, haiko vu tuala ovilumba viene vioku pia elisi, levi vioku yoka kuenda olonepa viene viekuĩ lolombanjaile weci kupange wa Suku. Haiko vu tualavo evi vioku tẽlisa olohuminyo viene, kuenda ovilumba viene viocipango, lolonuñulu viokoviunda viene violongombe levi violomeme,

⁷ kuenje haiko vu lila kovaso a Yehova, Suku yene. Kuenje ene lolonjo viene vu sanjukila onima yupange wovaka ene yina Yehova Suku yene o sumũluĩsa layo.

⁸ Ko lingi vali ndeci etu vosi tu kasi loku linga kulo etaili, okuti omunu omunu o linga ndeci cu sunguluka eye muẽle;

⁹ momo ka wa iñilĩli handi vowusa lovocipiñalo cina cu wĩhi Yehova, Suku yene.

¹⁰ Puãi eci vu yoka Yordão loku tunga vofeka Yehova, Suku yene, o wĩhi ha ci lingi ocipiñalo, leci eye u puyuisi kovanyali vene vosi vo ñuali okuti wa tumãli loku koka,

¹¹ oco kocitumãlo Yehova, Suku yene, a nola ha tungisilako onduko yaye onjo yoku kala, oku vu tuala cosi ndu tukuili, okuti ovilumba viene vioku pia elisi levi vioku yoka lolonepa viene viekui, lolombanjaile weci kupange wa Suku, lovilumba vioku tẽlisa olohuminyo viene wa likuminyi ku Yehova.

¹² Kuenje ene lomãla vene valume, lomãla vene vakãi, lapika vene valume, lapika vene vakãi, ndaño va Lewi va kasi vovaimbo ene, momo ovo ka va kuete onepa pamue ocipiñalo kumue lene, vosi yene vu sanjukila kovaso a Yehova, Suku yene.

¹³ Lunguki sanga vu lumba ovilumba viene vioku pia elisi kocitumãlo cosi ño vu mõla.

¹⁴ Puãi kocitumãlo Yehova a nola kepata limue pokati kene, oko vu lumbila ovilumba viene vioku pia elisi, haiko vu lingila cosi ndu sapuili.

¹⁵ Haimo lumue, cosi ci sole utima wove ci tava oku cipa, loku lia ositu yaco vovaimbo ene osi, okuti cosi ca soka lesumũlũho Yehova, Suku yene o muĩsi. Lu ka liyelisile lu wa liyelisa, vosi muẽle ci tava oku liako, ndeci ci tava ale oku lia ositu yombambi leyi yosonge.

¹⁶ Cimosi lika okuti oku lia osonde oco ka ci tava. Osonde vu yi peselela posi ndovava.

¹⁷ Vovaimbo ene ka ci tava oku lilamo onepa yekui yolomema viene, ndaño eyi yovinyu viene pamue yulela wene; ka ci tava oku lilamo olonuñulu viokoviunda viene violongombe levi violomeme, ndaño evi vioku tẽlisa olohuminyo wa likuminyi, ndaño evi vioku tẽlisa olohuminyo wa likuminyi, ndaño ovilumba viene viocipango, ndaño olombanjaile weci kupange wa Suku.

¹⁸ Puãi ovio o vi lila kovaso a Yehova, Suku yove, vocitumãlo Yehova, Suku yove, a nola. O vi lila kumosi lomõlove ulume, lomõlove ukãi, lupika wove ulume, lupika wove ukãi, kuenda u Lewi o kasi vimbo liene. Kuenje vosi yene vu sanjukila onima yupange wovaka ene, yina Yehova, Suku yene, o sumuluĩsi layo.

¹⁹ Lunguki okuti ko wivala u Lewi oloneke viosi o kasi vofeka yene.

²⁰ Eci Yehova, Suku yove, a yanjisa ovililo viove, ndeci a likuminya love, love o linga huti, Ndia ositu, momo o kuete ohatu, ci tava muẽle oku lia ositu ndeci utima wove u sole.

²¹ Nda ocitumãlo Yehova, Suku yove, a nolela onduko yaye, ci kasi kupãla love, ci tava oku upa kovinyama Yehova a ku iha. Ndeci nda ku sapuila, ci tava oku ipaya kocunda cove colongombe pamue kocunda colomeme. Kuenje vovaimbo ene muẽle ci tava oku lia ositu ndeci utima wove u sole.

²² Ndeci va lialia ositu yombambi losonge haico ci tava oku lia ositu yovinyama viene. Lu ka liyelisile, lu wa liyelisa, vosi muẽle, ci tava oku liako.

²³ Cimosi lika okuti oku lia osonde oco ka ci tava, momo osonde oyo omuenyo; kuenje ka ci tava oku lila omuenyo kumue lositu.

²⁴ Ka ci tava muẽle oku yi lia. O yi pesela posi ndovava.

²⁵ Ku ka yi lie okuti ove lomãla vove va ku kuãi vosi vu kala ciwa eci vu linga eci ca sunguluka ku Yehova.

²⁶ Puãi ovilumba vi kola via ku tukuiwila, levi vioku tẽlisa olohuminyo viove, o vi nyañula kuenje wenda lavio kocitumãlo ci nola Yehova.

²⁷ Ositu losonde viocilumba cove coku pia elisi o vi lumbila kutala wa Yehova, Suku yove. Osonde yocilumba cove coku yoka yi pesililue kutala wa Yehova, Suku yove, ositu yaco puãi ci tava oku yi lia.

²⁸ Yevelela lutate kolondaka evi viosi ñasi oku ku sapuila, okuti ove muẽle lomãla vove va ku kuãi, vosi vu kala ño-o ciwa otembo yosi eci vu linga esunga locili kovaso a Yehova, Suku yene.

²⁹ Eci Yehova, Suku yove, a lundula kovaso yove apata wendela oku a tundisa, leci wa a tundisale kuenje ove wa tunga vofeka yavo,

³⁰ oco lunguka sanga eci va lunduiwa ale kovaso yove oco ove o tambiwa oku va setukula. Ku ka pule cimue colosuku viavo, huti, Apata aco a vumba ndati olosuku viavo oco hã ndi lingevo?

³¹ Hacoko o lingila Yehova, Suku yove. Momo ovombondo osi Yehova a suvuka ovo va a lingila olosuku viavo. Momo ndaño omãla vavo alume lomãla vavo akãi va va yokela olosuku viavo vondalu.

³² Cosi hu sapuila o ci linga lutate. Ku ka vokiyeko cimue, ndaño oku tepululako.