ESINUMUĨLO 11 - Embimbiliya - Bíblia Sagrada em Umbundu

¹ Oco sola Yehova Suku yove, loku lava ocikundi covisila viaye, lovihõlo viaye, lovihandeleko viaye, oloneke viosi.

² Sokololi etaili ndomo Yehova, Suku yene, o longisi, momo si kasi loku vangula lomãla vene, ava ka va ci kulĩhĩle ndaño oku ci mõla. Oco sokololi okupindisa kua Yehova, Suku yene. Sokololivo unene waye, leka liaye lia pama, lokuokuo kuaye kuolõha,

³ lolondimbukiso viaye, lovilinga viaye vina a lingila ve Egito, oku lingila Fareo, osoma ye Egito, kuenda ofeka yaye yose,

⁴ Ivaluki eci a linga lolohoka via va Egito, lotuvalu tuavo, lakãlu avo. Ivaluki ndomo a pitisa kilu liavo ovava o Kalunga Kakusuka eci vo landuli, lomo Yehova wa va nyõla toke ketaili lilo.

⁵ Sokololi eci o lingili vekalasoko toke wa pitili palo;

⁶ leci a linga la Datana kuenda Avirama, omãla va Eliyava, omõla a Ruvene; ndomo osi yasama, kuenje ya va ina kumosi lapata avo, lolombalaka viavo, loviendalomuenyo viavo viosi. Eci ca lingiwa va Isareli vosi va ci mõla.

⁷ Momo ovaso ene a mõla ovopange osi anene a lingiwa la Yehova.

⁸ Oco, tẽlisi ocikundi eci cosi ñasi loku vu ci kundiki etaili. Ci tẽlisi okuti wu pama kuenje wiñili vofeka wu yokila oku kuata kuenje vu yi kuata.

⁹ Ci tẽlisi okuti vu luisa oloneke viene vofeka yi tumõha asenjele lowiki, yina Yehova a likuminya oku eca kolosekulu viene, kuenda kombuto yavo.

¹⁰ Momo ofeka wa loñi okuti vu yi kuata ka ya sokele lofeka ye Egito kuna wa tundi. Momo ve Egito wa wayeli ombuto yene kuenje wa yi tapeli lolomãi ndokocumbo.

¹¹ Puãi ofeka vu yokila oku yi kuata oyo ofeka yolomunda lovimbota, haiyo yi nyua nyua ovava ombela yokilu.

¹² Kuenje ofeka yaco Yehova, Suku yene, eye o yi tata tata. Ovaso a Yehova, Suku yene, a kasi kokuayo oloneke viosi, tunde kefetikilo liulima toke kefulilo liulima.

¹³ Kuenje nda vu pokola kovihandeleko viange, evi ndu handeleki etaili, vioku sola Yehova, Suku yene, loku u vumba lutima wene wosi, lomuenyo wene wosi,

¹⁴ oco eye o lokisa ombela kofeka yene kuvo waye, o lokisa ombela yomandavela leyi yokupepuko, okuti wunguli olomema viene, lovinyu viene, lulela wene.

¹⁵ O yundisa owangu wovinyama viene vovisenge viene, kuenje vu lia, vu kuta.

¹⁶ Lunguki sanga ovitima viene vi kembisua kuenje vu pambuka loku vumba olosuku viñi, loku vi fendela,

¹⁷ kuenje onyeño ya yehova yu wengukili kuenje eye o yika ovailu okuti ka ku tundi ombela, losi ka yeci ovaima ayo, kuenje ndopo vu taka vofeka yiwa yu wĩhi Yehova.

¹⁸ Oco olondaka evi viange o vi seleka vutima wove kuenda vomuenyo wove. O vi kuta ndondimbukiso povaka ove, vi linga ndulame kocipala cove.

¹⁹ O vi longisa komãla vove, loku vi vangula eci o tumãla vonjo yove, leci wenda vonjila, lo poku pekela, lo poku pasuka.

²⁰ O vi sonẽha kovikuli vionjo yove, kuenda kolombundi viove,

²¹ okuti oloneke viove loloneke viomãla vove, vi lua vofeka Yehova a likuminya lolosekulu viove oku va yiha okuti yi linga yavo osimbu yosi ovailu a kasi kilu liongongo.

²² Momo, nda vu telisa ocili ocikundi cilo cosi ndo ci kundiki, okuti vu sola Yehova, Suku yene, kuenje wendeli volonjila viaye viosi, loku likakatela laye,

²³ oco Yehova o tundisa apata andeti osi kovaso yene, kuenje ene vu kuata olofeka vio velipo kunene lokongusu.

²⁴ Kuosi ku liatela olomãi viene ku linga kuene. Ofeka yene yi fetikila kekalasoko kuenje yenda toke ko Levanone, yi fetikila kolui Ferati, kuenje yenda toke kokalunga kutakelo.

²⁵ Lomue omunu o tẽla oku tamalala lene. Yehova, Suku yene, o lingisa usumba kuenje o yokokisa ofeka yosi vu liatelako ndeci a likuminya lene.

²⁶ Ota, etaili nda kapa kovaso ene esumũlũhõ leyambulo.

²⁷ Nda vu pokola kovihandeleko via Yehova Suku yene evi ndu handeleki etaili, vu mõla esumũlũho.

²⁸ Nda ko pokoli kovihandeleko via Yehova, Suku yene, puãi vu pambuka vonjila ndu yi sapuili etaili loku kuama olosuku viñi evi ka wa kulĩhĩli, vu sanga eyambulo.

²⁹ Leci Yehova, Suku yene, o wiñisi vofeka wendeli oku ka yi kuata, oco vu tukula omunda Gerisimi okuti yesumũlũho, lomunda Evale okuti yesiñalo.

³⁰ Siti, vi kasi kesinya lia Yordão, kuna konjila yutakelo wekumbi, vofeka ya va Kanana, ava va tunga vetapi ocipepi loko Giligali, konẽle yolo-carvalho via More?

³¹ Momo vu yoka Yordão oku iñila loku kuata ofeka Yehova Suku yene a wihi. Leci vu yi kuata kuenje vu tungamo,

³² oco vu ci kapa vutima oku tẽlisa ovisila viosi lovihõlo viosi, evindeti ndu wihi etaili.