ESINUMUĨLO 10 - Embimbiliya - Bíblia Sagrada em Umbundu

¹ Kotembo yaco Yehova wa popia lame, hati, Songa ovitale vivali viovawe via setahãla vina viatete. Tungavo ocikasia cuti, noke pitila kokuange kulo komunda.

² Lame sonẽha kovitale viaco olondaka via kaile kovitale viatete, vina wa teya, love o vi kapa vocikasia.

³ Oco nda tunga ocikasia cositimi, kuenje nda songa ovitale vivali via setahãla vina viatete, yu nda lamanẽla komunda lovitale viaco vivali povaka.

⁴ Yehova wa sonẽha kovitale, ndeci a sonehele ale kovitale viatete, ovihandeleko ekuĩ, vina Yehova a popele lene komunda eteke liohongele eci ondaka yaye ya tunda vokati kondalu. Kuenje Yehova wa vi nyĩha.

⁵ Lame nda ñualãpo, nda loka komunda. Nda kapa ovitale vocikasia nda tunga, kuenje omo vi kasi, ndeci Yehova a sapuila.

⁶ Va Isareli va tunda ko Berote Bene Yakana, va enda toke ko Mosera. Oko Arone a fila, haiko vo kenda. Omõlaye Eleasa wa linga upange wutunda komangu yaye.

⁷ Oku tunda oko va enda ungende toke ko Gudigoda; oku tunda ko Gudigoda va amako toke ko Yotivata, ofeka yolondui viovava.

⁸ Kotembo yaco Yehova wa tepelako epata lia Lewi oku ambayata ocikasia covisila via Yehova, loku kala kovaso a Yehova oku u vumba, loku sumũluisa omanu londuko yaye, toke ketaili lilo.

⁹ Oco Lewi ka kuata onepa ndaño ocipiñalo ndeci vamanjaye. Yehova eye ocipiñalo caye, ndeci Yehova, Suku yene, a popia laye.

¹⁰ Onjanja yilo nda kala komunda, ndeci nda kaile ale onjanja yatete okuti akuĩ akuãla kovotanya lakuĩ akuãla kovoteke. Onjanja yaco layovo Yehova wa njevelela vali, kuenje Yehova ka tavele oku u nyõli.

¹¹ Yehova wa popia lame hati, Votoka, wila vonjila, pita kovaso omanu, oco va iñile, va kuate ofeka nda likuminya lolosekulu viavo oku va yĩha.

¹² Kaliye, a Isareli, Yehova, Suku yove, o yongola nye kokuove ha teko oku sumbila Yehova Suku yove, loku endela volonjila viaye viosi, loku u sola, kuenda oku vumba Yehova, Suku yove, lutima wove wosi lomuenyo wove wosi,

¹³ loku lava ovihandeleko via Yehova, lovisila viaye, evi nda ku handeleka etaili okuti viu ku sumuluĩsa?

¹⁴ Ota, ku Yehova, Suku yove, ku tiama ilu, lilu liovailu kuenda oluali la cosi ci kasimo.

¹⁵ Haimo lumue eye Yehova wa tekela kolosekulu viene loku va sola, yu pokati kapata osi wa nolapo ombuto yavo yi va kuãi, okuti ene muẽle, ndeci ci kasi etaili lilo.

¹⁶ Oco lisevisi evamba liutima wene, ko ka tĩlisi vali ovitima viene.

¹⁷ Momo Yehova, Suku yene, eye Suku yolosuku, haeye Ñala yoloñala, eye Suku Tõlo, haeye ukuonene o lingisa cimue usumba, ka amẽla omunu, ka tambula ovitukiko.

¹⁸ O muĩsa esunga osiwe locimbumba, o sola ocingendeleyi loku wĩha okulia luwalo.

¹⁹ Oco ene, soli ocingendeleyi, momo lene le wa kaili ovingendeleyi vofeka ye Egito.

²⁰ Sumbila Yehova, Suku yove, loku u vumba, eye u kakatela, loku lisila londuko yaye.

²¹ Eye wa sesamela esivayo liove, haeye Suku yove, u wa ku lingila ovina evi vinene haivio vi lingisa usumba, kuenje ovaso ove a vi mõla.

²² Olosekulu viene via lokile ke Egito lakuĩ epanduvali komanu. Kaliye puãi Yehova, Suku yene, wa luisa owiñi wene, toke wa soka ndowu wolombungululu viokilu.