ESINUMUĨLO 1 - Embimbiliya - Bíblia Sagrada em Umbundu

¹ Elivulu eli li kuete olondaka Mose a popia la va Isareli vosi va kala kesinya lia Yordão kekalasoko, vanyãla a suñama la Sufi, pokati ka Parane la Tofele la Lavane la Haceroti la Disahava.

² Tunde ko Horeve, toke ko Kadesi Barnea, oku pita onjila yokomunda Seire, ungende waco u tambula oloneke ekui la mosi.

³ Kunyamo wakuĩ akuãla, kosãi yekuĩ lamosi, keteke liatete liosãi, oco Mose wa sapuila va Isareli cosi Yehova o tuma oku va ci sapuila.

⁴ Kotembo yaco Mose wa yula ale Sihoni, osoma ya va Amori ya tungile vo Hesibone, kuenda Oge, osoma ya Basiane, ya tungile ko Asitarote vo Edirei.

⁵ Kesinya lia Yordão, vofeka va Moavi, oko Mose a fetikila oku lombolola ovihandeleko viaco, hati,

⁶ Yehova Suku yetu wa popia letu vo Horeve, hati, Wa kaili komunda yilo okasimbu, ci tẽla yapa.

⁷ Ñualĩpo, wili vonjila. Kuendi kofeka yolomunda ya va Amori, lokolofeka viosi vi lisungueko. Kuendi kanyãla kuenda kolomunda, kombuelo loko Sul, kuenda konẽle yokalunga, kofeka ya va Kanana, kuenda ko Levanone, toke kolui lunene Ferati.

⁸ Tala, ofeka yeyi, ndi yeca kokuene. Iñili, kuati ofeka Yehova a lisila lolosekulu viene, Avirahama la Isake kuenda Yakoba, oku yeca kokuavo lokombuto yavo yi va kuãi.

⁹ Kotembo yaco nda popele lene siti, Oku u veleki lika wange si ci tẽla.

¹⁰ Yehova, Suku yene, wo luisi, kuenje tala, kowiñi wene etaili vu kasi ndolombungululu viokilu.

¹¹ Yehova, Suku yolosekulu viene, o luisi vali ohulũkãi yolonjanja, loku u sumũluisi ndeci a likuminya lene!

¹² Ndi ci tẽla ndati lika wange oku lemiwa laleñoleño ene lovilemo viene lovoyaki ene?

¹³ Linõlẽli pokati kapata ene olombanga haivo vakualondunge kuenda vakuokũlĩhiso, lame ndi va kapa ndovasongui pokati kene.

¹⁴ Kuenje lene wa ñumbuluili hoti, Ciwa oku linga ndeci wa popia.

¹⁵ Oco nda tumbika ovasongui vapata ene, ovo olombanga kuenda haivo vakuokũlĩhĩso, nda va kapa ndasongui pokati kene, vakesongo kolohũlũkai, la vakesongo kovita, la vakesongo kakuĩ atãlo, la vakesongo kakuĩ, la vakuamangu, ca soka apata ene.

¹⁶ Kuenje kotembo yaco nda kundika olonganji viene siti, Yevi olondaka vi kala pokati ka vakuẽle, tetuluili lesunga omunu lokuavo, pamue ocingendeleyi ci kasi kumue laye.

¹⁷ Vekanga ko ka amẽli omunu; utito u yevi ndu onene; ko ka yokokeli ocipala comunu; momo etetuluko liaco lia Suku. Ondaka yo tĩlĩli wiyi layo kokuange ndi yi yeve.

¹⁸ Kuenje kotembo yaco ndo sapuili ovina viosi vio sesamẽli oku linga.

¹⁹ Oco tua katuka ko Horeve yu tua ñuala muosi vekalasoko liaco linene hailio li kokisa ocinjoko. Ene wa li kũlihi. Tua pita vonjila yokofeka yolomunda ya va Amori, ndeci Yehova Suku yetu a tu sapuila, kuenje tueya ko Kadesi Barnea.

²⁰ Nda popia lene siti, Wa pitili kofeka yolomunda ya va Amori haiyo Yehova Suku yetu a tu ĩha.

²¹ Tala, Yehova, Suku yene, wa kapa ofeka kovaso yene. Lamani, kuati, ndeci Yehova, Suku yolosekulu viene, o sapuili. Ko ka yokoki, ko ka lulumi.

²² Yu wa kokeli ocipepi lame, vosi yene, kuenje wa popi hoti, Tu tumi alume vamue kovaso okuti va tu kulĩhĩsila ofeka, ha va tu sapuila onjila tu lamana layo lovaimbo tu ka iñila.

²³ Eci ca sunguluka muẽle kokuange, kuenje pokati kene ndopapo alume ekuĩ la vavali okuti kepata omunu, kepata omunu.

²⁴ Oco va wila vonjila kuenje va lamanẽla kofeka yolomunda, yu veya komuva ya Esikole kuenje va yi kulĩhĩsa.

²⁵ Noke va kotola epako liofeka lovaka avo, va tu li nenẽla, kuenje va tu sapuila vati, Ofeka eyi, ya tu ĩha Yehova Suku yetu, yiwa.

²⁶ Haimo ka wa taveli oku lamanẽlãko, puãi wa sinĩli ocihandeleko ca Yehova Suku yene.

²⁷ Wa lisiõsuĩli volombalaka viene, hoti, Momo Yehova a tu nyale, oco a tu upila kofeka ye Egito oku tu eca peka lia va Amori oku tu nyõla.

²⁸ Pi tu lamanẽla? Vakuetu va konyõla ovitima vietu, vati, Omanu vaco va tu velapo kunene lokutunga; ovaimbo aco anene anene, ovimbaka viao violiokolioko toke kilu. Tua mõlamovo omãla vovindululu.

²⁹ Oco nda popia lene siti, Ko ka yokoki, ko ka va kuateli usumba.

³⁰ Yehova Suku yene u pitili kovaso, eye o vu yakela ndeci o lingili kovaso ene ve Egito

³¹ kuenda vekalasoko muna wa moli ndomo Yehova Suku yene o wendisi, ndeci omunu a endisa omõlaye. Wo wendisi vonjila yene yosi toke wa pitili kulo.

³² Puãi, ndaño oco, ka wa koleleli Yehova Suku yene,

³³ u wo pitili kovaso ene vonjila oku u vanjeli apa wu tunga olombalaka viene. Oku u lekisi onjila wendi layo, kuteke wa endela vondalu, kutanya velende.

³⁴ Yehova wa yeva olondaka viene kuenje wa tema, oco wa lisinga, hati,

³⁵ Lomue ulume ukuacitumbulukila cilo ca vĩha o mõla ofeka yiwa nda lisila lolosekulu viene oku va yiha,

³⁶ te Kalembe, omõla a Yefune. Eye o yi mõla. Ofeka yaco a ka liatele ndi yeca kokuaye kuenda komãla vaye, momo wa kuama Yehova locili caye cosi.

³⁷ Oco, omo akandu ene alua oco Yehova wa nemelavo ame, hati, Ndaño ove ku iñilamo.

³⁸ Yehosua, omõla a Nune, o tãi kovaso ove, eye iñilamo. U kolisa momo eye o muĩsa va Isareli oku yi piñala.

³⁹ Lotumãla tuene, otundeti wa lingi hoti, Tu kuatiwa, kuenda omãla vene ava etaili ka va kulĩha uwa ndaño uvĩ, ovo va iñilamo, ndi yeca kokuavo, lovo va yi kuata.

⁴⁰ Ene puãi ñualĩpo, wili vonjila yenda kekalasoko ya loña ko Kalunga Kakusuka.

⁴¹ Oco wa ñumbululi, hoti, Tua lueya ku Yehova. Tu lamanẽlãko ha tu yaki, ndeci Yehova Suku yetu a tu sapuila. Kuenje wa limalẽhĩsi imãlẽho, omunu la viaye, omunu la viaye, wa lungili loku lamanẽla kofeka yolomunda.

⁴² Yehova wa sapuila hati, Popia lavo huti, Ko ka lamani, ndaño oku yaka, momo si kasi pokati kene, sanga wu yuliwa lovanyãli vene.

⁴³ Oco nda popia lene kuenje ka wa ci yeveli, puãi wa sinĩli ocihandeleko ca Yehova, yu wa lituni, wa lamanẽli kofeka yolomunda.

⁴⁴ Oco va Amori, ava va tunga vofeka yaco yolomunda, vo tundili, vo hangisi ndeci olonyihi vi linga, kuenje vo lunduli tunde ko Seire toke ko Horima.

⁴⁵ Oco wa tiukili, wa lilili kovaso a Yehova, puãi Yehova ka yevele kondaka yene, ndaño oku vu yevelela.

⁴⁶ Oco co neneli oku kala ko Kadesi oloneke vina via lua wa kaliko.