ESERA 9 - Embimbiliya - Bíblia Sagrada em Umbundu

¹ Eci ovina evi viosi via lingiwa oco asongui veya kokuange, vati, Va Isareli lovitunda la va Lewi ka va litepele lomanu vakualofeka kovombondo avo. Ka va litepele muẽle la va Kanana la va Hiti kuenda va Perisi la va Yevusi la va Amoni kuenda va Moavi la va Egito kuenda va Amori.

² Momo va tambula omãla vakãi va vakualofeka, ha va lingi akãi vavo muẽle pamue akãi vomãla vavo valume. Oco epata li kola lia litenga lapata a vakualofeka. Asongui lakulu ovo va piãla kovituwa viaco.

³ Eci nda ci yeva nda tola ombinja yange lonanga yange. Nda tukũla ocifuko cange lolonjele viange, kuenje nda tumãla loku saluka.

⁴ Oco vosi va lulumila olondaka via Suku ya va Isareli omo akandu a vana va tiuka kumandekua a lua. Va ngongolokela osimbu nda tumãla loku saluka toke kocilumba coñolosi.

⁵ Kotembo yocilumba coñolosi nda votoka tupu ombinja lonanga via toka ale, kuenje nda kekama kolongolo loku oluila ovaka ku Yehova Suku yange.

⁶ Nda popia siti, A Suku yange, ñasi losõi oku ku petuila ocipala cange, a Suku yange. Momo akandu etu a pitãhãla ovitue vietu, lolongole vietu via pitila kovailu.

⁷ Tunde koloneke violosekulu vietu toke etaili tuakuakandu a kãla. Omo akandu etu la-a olosoma vietu lovitunda vietu o-o a lua oco tua eciwa kolosoma via vakualofeka, kosipata, kumandekua, koku pundiwa, kuenda kosõi ya kãla, ndomo tu kasi layo etaili.

⁸ Cilo puãi okatembo kalo Yehova Suku yetu wa tu linga ohenda, wa tu supisilapo vamue, wa tu tungisa vali vocitumãlo caye ci kola, okuti Suku yetu o tu tuisila ovaso etu, loku tu iha okatumbuluko pokati kupika wetu.

⁹ Tuapika, puãi haimo Suku yetu ka tu yandulukile kupika wetu. Wa tu sola locisola ka ci pui kovaso olosoma via Persia Wa tu tumbulula ha tu tungi onjo ya Suku yetu loku tumbulula cosi ca nyõlẽhele, loku tu iha ocimbaka combindikiyo vo Yuda lovo Yerusalãi.

¹⁰ Kaliye, a Suku yetu, tu popia nye? Momo tua sia ovihandeleko viove,

¹¹ vina wa tuma lakuenje vove ovaprofeto, huti, Ofeka oko wendi oku ka yi kuata, ofeka ya vĩhĩsua levĩho lia vakualofeka, haiyo va yi yukisa lovina viumbondo kolonele viosi.

¹² Oco ene, ko ka eci omãla vene vakãi komãla vavo valume, ndaño oku tambuila omãla vavo vakãi omãla vene valume. Ko ka sandiliyi ombembua yavo pamue okusalala kuavo nda vu yongola oku kuata ongusu yocili loku sanga okusalala kuocili, loku ku sila omãla vene ndocipiñalo ka ci pui.

¹³ Kovaso yolohali evi viosi vina via tu sanga omo ahuku etu lakandu etu o-o a lua, oco ove a Suku yetu kua tu yambuile ndeci ca tu sesamẽla puãi wa tu popela locisupe cilo.

¹⁴ Etu hẽ, tu sinila vali ovihandeleko viove loku likuela vali lomanu vakuavituwa vievĩho? Nda oco hẽ, ove ku tu temela loku tu nyõla okuti lomue o puluka, locisupe comanu vove ka ku kala vali?

¹⁵ A Yehova, a Suku ya Isareli, ove ukuesunga. Etaili tucisupe ca sialapo. Etu tuakuakandu, tu tai kovaso ove. Ndomo tu kasi lakandu ka tua sesamelele oku talama kovaso ove.