ESERA 8 - Embimbiliya - Bíblia Sagrada em Umbundu

¹ Ava va tunda kumosi lame ko Bavulono vovava a Soma Aretasesete, okuti akulu vapata, epata epata, vava:

² Kepata lia Finehase, Gerisiomo. Kepata lia Itamare, Daniele. Kepata lia Daviti, Hatusi,

³ ukuepata lia Sekaniya. Kepata lia Parosi, Sakariya, kua sonehiwa oku enda laye alume ocita lakui atãlo.

⁴ Kepata lia Pahata Moavi, Eliyoenai, omõla a Serahiya. Ovita vivali vialume via enda laye.

⁵ Kepata lia Satu, Sekaniya, omõla a Yahasiele. Ovita vitatu vialume via enda laye.

⁶ Kepata lia Adini, Evede, omõla a Yonatão. Akui atãlo kalume va enda laye.

⁷ Kepata lia Elami, Yesiaya, omõla a Ataliya. Akui epanduvali kalume va enda laye.

⁸ Kepata lia Sefatiya, Sevadiya, omõla a Mingeli. Akui ecẽlãla kalume va enda laye.

⁹ Kepata lia Yoava, Ovadiya, omõla a Yehiyele. Ovita vivali kalume kalume ekui lecelala va enda laye.

¹⁰ Kepata lia Bani, Selomiti, omõla a Yosifeya. Alume ocita lakui epandu va enda laye.

¹¹ Kepata lia Bebai, Sakariya, omõla a Bebai, alume akui avali lecelala va enda laye.

¹² Kepata lia Asegade, Yohanana, omõla a Hakatana. Alume ocita lekuĩ va enda laye.

¹³ Kepata lia Adonikana, ava veya noke olonduko viavo vievi: Elifelete, Yeuele, kuenda Semaya. Kumosi lavo kua enda alume akui epandu.

¹⁴ Kepata lia Bigwai, Utai kuenda Sakuri. Kumosi lavo kua enda alume akui epanduvali.

¹⁵ Nda vongoluila kekulo liolui lu pita vo Anava kuenje haiko tua kala oloneke vitatu. Eci nda kũlĩhisa omanu veya kuenda ovitunda sia sangele omãla vamue va Lewi.

¹⁶ Oco nda tumila Eliesere la Ariyele kuenda Semaya la Elinatana la Yarivi la Elinatana kuenda Natana la Sakariya la Mesiulama, ovo akulu. Nda tumilavo Yoyariva kuenda Elinatana, ovo olonganji.

¹⁷ Nda va tuma ku Ido, eye ukulu wimbo lia Kasifeya. Nda va lomboluila ndeci va popia la Ido lava va kala laye vupange woku vumba onembele eci va lisanga lavo ko Kasifeya. Nda va tuma okuti va pinga ava va tu kuatisa kupange wonjo ya Suku yetu.

¹⁸ Kuenje lohenda ya Suku va tu nenela umue omunu wocili. Onduko yaye Sereviya, eye ukuepata lia Mahili, omõla a Lewi, omõla a Isareli. Omãla vaye la vakuepata, ava va enda laye, va kala ekui lecelala.

¹⁹ Kueyavo Hasiaviya kuenda Yesiaya, ukuepata lia Merari. Omãla va Yesiaya la vakuepata vakuavo va enda laye va tẽla omanu akui avali.

²⁰ Kua kalavo ovita vivali kakui avali kava va vumba vumba vonembele, vana Daviti lolosungu viaye va tepisila oku vumba va Lewi. Vosi yavo va tukuiwa kolonduko.

²¹ Oco kekulo liolui Ahava oko nda handelekela oku likandangiya okulia okuti tu liketisa kovaso a Suku yetu loku likutilila okuti o tu ilikila onjila yocili omu tu endela, etu lomãla vetu lovikuata vietu.

²² Momo ca ndinga osõi oku pinga ku Soma okuti o tu ĩha asualali la vakuakuendela kotuvalu oku tu vindikiya kovanyãli vovonjila. Omo tua sapuilile ale Soma tuti, Eka lia Suku yetu li taiyilili oku kuatisa vosi vo sandiliya, longusu yonyeño yaye yi wengukila vosi vo yanduluka.

²³ Oco tua likandangiya okulia loku ci likutilila ku Suku yetu kuenje Suku wa yeva ohutililo yetu.

²⁴ Nda tepa ovitunda ekui lavivali okuti Sereviya la Hasiaviya la vamue vakuepata liavo ekui.

²⁵ Nda va pesalela opalata lulu lovikuata vina Soma lakulu vaye la vakesongo vaye kumosi la va Isareli vosi va kalako va lumbila onjo ya Suku yetu.

²⁶ Nda va pesalela ovita epandu kakui atãlo kolotalendo viopalata, lovikuata viopalata via soka locita colotalendo, lovikuata viulu via soka locita colotalendo,

²⁷ lakui avali kolombasiya viulu via soka lovita vitãlo violosiekele, kuenda ovikuata vivali viutale wosipi u nina wa lisoka lulu koku tĩla.

²⁸ Nda popia lavo siti, Ene vu kola ku Suku. Ovikuata laviovo vi kola. Opalata lulu ovio ovilumba viocisola via lumbiwa ku Yehova, Suku yolosekulu viene.

²⁹ Vi lavululi. Vi seleki toke vu vi pesalela kovaso yovitunda vinene la va Lewi lakulu vapata a va Isareli vonjo ya Suku vo Yerusalãi.

³⁰ Oco ovitunda la va Lewi va tambula opalata lulu lovikuata hã ha va vi tuala ko Yerusalãi, konjo ya Suku yetu.

³¹ Oco keteke liekui lavali kosãi yatete tua tunda kolui Ahava ha tu endi ko Yerusalãi. Kuenje Suku wa kala letu. Wa tu popela kovanyãli la vosi va tu lavekela vonjila.

³² Tua pitila ko Yerusalãi, oko tua kala oloneke vitatu.

³³ Keteke liakuãla oco va pesalisila opalata lulu lovikuata vonjo ya Suku yetu. Va vi pesala loku vi eca kocitunda Merimote, omõla a Uriya. Eleasara, omõla a Finehase, wa kala laye. Kua kalavo va Lewi vavali okuti Yosavada, omõla a Yesiua, kuenda Noadiya, omõla a Binuhi.

³⁴ Cosi ca tendiwa cimosi cimosi loku pesaliwa. Kuenda okulema kuaco cimosi cimosi kua sonehiwa.

³⁵ Kotembo yaco ava vosi va tiuka kumandekua va lumbila Suku ya va Isareli ovilumba vioku pia elisi. Va Isareli vosi va lumba olonale violongombe ekui la vivali, lolomanga violomeme akuĩ ecea lepandu, lomãla volomeme akuĩ epanduvali lepanduvali. Ovitupi ekui la vivali va vi lumbila ocilumba cakandu. Cosi eci ocilumba coku pia elisi va ci lumbila Yehova.

³⁶ Va ecavo ukanda wovihandeleko via Soma ku vakesongo va Soma lokolonguluvulu viofeka yokesinya. Kuenje ovo va kuatisa omanu kuenda onjo ya Suku.