ESERA 7 - Embimbiliya - Bíblia Sagrada em Umbundu

¹ Noke, kovava a Aretasesete, osoma yoko Persia, Esera, omõla a Seraya, omõla a Asariya, omõla a Hilikiya,

² omõla a Sialume, omõla a Sadoke, omõla a Ahituva,

³ omõla a Amariya, omõla a Asariya, omõla a Merayote,

⁴ omõla a Serahiya, omõla a Usi, omõla a Buki,

⁵ omõla a Avisiwa, omõla a Finehase, omõla a Eleasara, omõla a Arone ocitunda cinene,—

⁶ undeti Esera wa tunda ko Bavulono. Eye ukuavisonehua, haeye wa piãla oku kũlĩha ovihandeleko via Mose, vina via eciwa la Yehova, Suku ya va Isareli. Omo Yehova, Suku yaye, a kala laye oco Soma wa tava kovina viosi o pinga.

⁷ Kulima wepanduvali wokovava a Soma Aretasesete, ko Yerusalãi kua endavo vamue va Isareli lovitunda vimue, kuenda vamue va Lewi, lolonjimbi, lolondavululi violombundi la vamue vakuakuvumba vonembele.

⁸ Eye Esera wa pitila ko Yerusalãi kosãi yatãlo yulima wepanduvali wokovava a Soma.

⁹ Wa katuka ko Bavulono keteke liatete liosãi yatete, kuenje, lohenda ya Suku, wa pitila ko Yerusalãi keteke liatete liosãi yatãlo.

¹⁰ Esera wa litumbika ocili oku lilongisa ondaka ya Suku loku yi pokola loku longisa va Isareli ovihandeleko viayo lovisila viayo.

¹¹ Soma Aretasesete wa soneha ukanda kocitunda Esera haeye ukuavisonehua, haeye wa piãla oku kũlĩha ovihandeleko via Yehova lovisila viaye vioku va Isareli. Ukanda waco wowu:

¹² Ame Aretasesete, Soma yolosoma, sonehela Esera ocitunda haeye ulombololi wovihandeleko via Suku yovailu. Epasu liombembua.

¹³ Ame muẽle njimba oluiya okuti nda vofeka yange muli vamue va Isareli, pamue ovitunda viavo, pamue vamue va Lewi, va yongola oku enda love ko Yerusalãi, ci tava, va ende.

¹⁴ Momo ove wa tumiwa la Soma lakulu vaye epanduvali oku kũlĩhisa vo Yuda kuenda vo Yerusalãi ndomo va kasi kovina viovihandeleko via Suku vina o kasi lavio.

¹⁵ Wa tumiwavo oku tuala opalata lulu vina via eca Soma lakulu vaye ku Suku ya va Isareli, una onjo yaye yi kasi vo Yerusalãi.

¹⁶ O tualavo opalata yosi lulu wosi o sanga vofeka yosi ya Bavulono, kumosi lolombanjaile omanu lovitunda va eca locisola oku kuatisa onjo ya Suku yavo yi kasi vo Yerusalãi.

¹⁷ Lolombongo viaco o ka landa lavio olonale violongombe lolomanga violomeme lomãla volomeme kuenda osema lovinyua vi lumbiwila kumosi lavio. O vi lumba kutala wonjo ya Suku yove yi kasi vo Yerusalãi.

¹⁸ Evi vi supapo viopalata lulu, ove la vakuẽle vu linga lavio ndeci wa simi okuti ca soka locipango ca Suku yove.

¹⁹ Lovikuata va kuiha vioku kuatisa efendelo lia Suku yove vonjo yaye, o vi tumbika ku Suku ya Yerusalãi.

²⁰ Kuenda vali cosi cikuavo ci sukiliwa oku kuatisa onjo ya Suku yene ci tava oku ci upa kombango ya Soma.

²¹ Ame, Soma Aretasesete, ame njimbila vakalei vange vosi vofeka yokesinya oluiya lulo siti, Cosi ci sukila ocitunda Esera, haeye ukuavisonehua via Suku yovailu, ci eciwe kokuaye lonjanga.

²² Toke ci pitila kocita colotalendo viopalata, lolohũlũkãi akuĩ akuãla kolokilu viotiliku, lolohũlũkãi vitatu kovita epandu kolo-litro viovinyu lolohũlũkãi vitatu kovita epandu kolo-litro viulela, lomongua wosi vu sukila, ka kuli oku pesalisa.

²³ Cosi ca popiwa la Suku yovailu ci lingiwile onjo ya Suku yovailu. Onyeño ya Suku yiyilila nye uviali wa Soma lomãla vaye?

²⁴ Ndu sapuilivo okuti ovitunda la va Lewi lolonjimbi lolondavululi la vosi vakuakuvumba vonjo yaco ya Suku ka ci tava oku va fetisa alisimu pamue ulambu pamue owombo.

²⁵ Love, a Esera, lolondunge Suku yove a kuiha, nola akulu lolonganji vi tetuluila omanu vosi vakuafeka yokesinya. Puãi nola ava va kũlĩha ovihandeleko via Suku yove, ava ka va vi kũlĩhile ove muẽle o va longisa.

²⁶ Kuenje wosi ka tava oku pokola kovihandeleko via Suku yove lovihandeleko via Soma va tete laye onimbu, pamue oku u wipaya, pamue oku u tundisa vofeka, pamue oku u nyeha ovikuata viaye, pamue oku u kapa vokayike.

²⁷ Yehova Suku yolosekulu vietu a sivayiwe. A sivayiwe, omo wa simisa Soma ocisimilo ca posoka coku posuisa onjo ya yehova yi kasi vo Yerusalãi.

²⁸ Haeye wa ñuatela ohenda kovaso a Soma lakulu vaye kuenda kovaso a vakesongo vaye. Nda kolisua omo nda limbuka okuti Yehova Suku yange wa kala lame, kuenje ndongolola akulu va va Isareli oku enda lame.