ESERA 6 - Embimbiliya - Bíblia Sagrada em Umbundu

¹ Oco Soma Dariu wa imba oluiya kuenje vo Bavulono va vanjiliya vonjo yoku seleka ovisonehua.

² Kuenje vo Akimeta, ombala yofeka ya Media, va sanga ociña cimue. Vociña caco mua sonehiwa ndomo: Esapulo.

³ Vulima watete wokovava a Soma Kuro wa imba oluiya hati, Ondaka yonjo ya Suku yi kasi vo Yerusalãi. Onjo yaco, omo va lumbalaile Suku ovilumba vioku yoka levi vioku pia elisi, yi tungiwe. Ociseveto caco ci sevetiwe ciwa. Okulepa kuaco kilu ku soke lakui atatu kovikeya, lupati waco u soke lakui atatu kovikeya.

⁴ Ku kale ovilala vitatu viovawe lulala umosi wovinendele. Epese liaco li tunde kombango yofeka.

⁵ Kuenda vali ovikuata viulu levi viopalata vionjo ya Suku, vina Soma Nevukandesa opile konjo yi kasi vo Yerusalãi oku vi tuala ko Bavulono, vi tiuwiwe vali konjo ya Suku ko Yerusalãi, vi kapiwe vali, ocikuata kocitumãlo caco, ocikuata kocitumãlo caco, vonjo ya Suku.

⁶ Oco, ove a Tatenai, ove vunguluvulu yofeka yokesinya, love a Setare Bosenai la vakuẽle olombiali viofeka yokesinya, vosi yene, liwekipo.

⁷ Ko ka tateki upange wonjo yaco ya Suku. Onguluvulu ya va Yudea kumosi lasongui va va Yudea va tunge muẽle onjo ya Suku kocitumãlo cayo.

⁸ Kuenda vali ndu sapuili eci ene vu linga oku kuatisa asongui va va Yudea oku tunga onjo ya Suku. Olondingupange viaco vi fetaiwe lombili. Epese liaco li tunda kombango yulambu wofeka yokesinya.

⁹ Kuenda vali cosi va sukila coku lumbila Suku yovailu ovilumba vioku pia elisi, ndeci olonale violongombe, pamue olomanga violomeme, pamue omãla volomeme, ci kale otiliku, pamue omongua, pamue ovinyu, pamue ulela, cosi ovitunda vio ko Yerusalãi vi sapula oku lumba, ceciwe kokuavo eteke keteke,

¹⁰ okuti oco va lumbila Suku yovailu ovilumba viu sanjuisa kuenje va likutilila omuenyo wa Soma lomãla vaye. Ko ka ci kambisi.

¹¹ Nda handelekavo okuti nda umue o pongolola ocihandeleko eci, vope yimue ohangalo konjo yaye, vo someheko, kuenje o tulikiwa. Kuenda vali onjo yaye yi linga ondunda yombolela.

¹² Oco Suku una wa kemalisa onduko yaye vofeka yaco a nyõle osoma yosi pamue ofeka yosi yi seteka oku pongolola ocihandeleko eci, pamue oku nyõla onjo ya Suku yi kasi vo Yerusalãi. Ame, Soma Dariu, ame nda imba oluiya luaco. Cosi ci lingiwe muẽle.

¹³ Oco Tatenai, onguluvulu yofeka yokesinya, kuenda Setare Bosenai, la vakuavo, va linga lombili cosi ca popia Soma Dariu.

¹⁴ Asongui va va Yudea va likapelako oku tunga, kuenje omo ovaprofeto Hagai la Sakariya, omõla a Ido, va va kolisa oco va mala. Locihandeleko ca Suku ya va Isareli leci ca Kuro la Dariu kuenda Aretasesete, osoma yo ko Persia, va mala muẽle upange wavo woku tunga.

¹⁵ Kuenje onjo ya pua oku tungiwa keteke liatatu kosãi ya Adara kulima wepandu wokovava a Soma Dariu.

¹⁶ Oco va Isareli, lovitunda, la va Lewi, lolomandekua via tiuka, va tumbika onjo ya Suku lonjolela ya lua.

¹⁷ Kotembo yoku tumbika onjo ya Suku va lumba ocita colonale violongombe, lolomanga violomeme ovita vivali, kuenda omãla volomeme ovita vikuãla. Va lumbavo ovitupi ekui lavivali. Ovitupi viaco via linga ocilumba cakandu apata osi a va Isareli, okuti epata ocitupi, epata ocitupi.

¹⁸ Va sokiyavo ovitunda vovisoko viavio, la va Lewi vovisoko viavo, ha va lingi efendelo lia Suku ko Yerusalãi, ndeci ca sonehiwa velivulu lia Mose.

¹⁹ Keteke liekui lakuãla liosãi yatete ava va tiuka kumandekua va lia o Pascoa.

²⁰ Momo ovitunda kuenda va Lewi vosi va liyelisa. Vosi yavo va yelisua. Oco va ipaya okameme ko Pascoa. Va ka ipalela olomandekua viosi lovitunda kuenda ovo muẽle.

²¹ Okameme kaco ka liwa la va Isareli ava va tiuka kumandekua. Ka liwavo la vosi va litokeka lavo, okuti vava va litepa lovihõlo via vakualofeka ha va fendela Yehova, Suku ya va Isareli.

²² Oloneke epanduvali va lia lonjolela ofesta yombolo ka yi kuete etumbisa. Momo Yehova wa va sanjuisa, wa pongolola utima wa Soma yo ko Asuria okuti wa va kuatisa kupange wavo wonjo ya Suku, Suku ya va Isareli.