ESERA 5 - Embimbiliya - Bíblia Sagrada em Umbundu

¹ Oco ovaprofeto Hagai la Sakariya omõla a Ido, va imbila owanji va Yudea, vana va kala vo Yuda lo vo Yerusalãi. Va va imbila owanji vonduko ya Suku ya va Isareli una va imbila ovaso.

² Oco Seruvavele, omõla a Sialatiyele, kuenda Yesiua, omõla a Yocadake, va votoka. Va fetika oku tunga onjo ya Suku yi kasi vo Yerusalãi. Kumosi lavo kua kala ovaprofeto va Suku oku va kuatisa.

³ Otembo yaco haiyo Tatenai, onguluvulu yofeka yokesinya, kuenda Setare Bosinai la vakuavo, veya kokuavo, va va pula vati, Helie wo tumi oku tunga onjo yilo loku malusula upange u?

⁴ Va va pulavo vati, Ava va kasi loku tunga, olonduko viavo velie?

⁵ Puãi Suku wa kala lakulu va va Yudea. Oco ka va va talamisile toke ondaka ya yevala ku Dariu kuenje eye wa tiula ukanda wekumbululo.

⁶ Tatanai, onguluvulu yofeka yokesinya, kuenda Setare Bosinai lolombiali vikuavo viokesinya, va tuma ukanda ku Soma Dariu.

⁷ Vo sonehela oku u lomboluila. Va soneha ndomo, vati, Epasu liombembua kokuove, a Soma Dariu.

⁸ A Soma, tua tuma oku ku sapuila okuti etu tuaile kofeka ya Yuda, konjo ya Suku o kola. Onjo yaco yi kasi loku tungiwa lovawe anene. Lovinendele vi kasi loku kapiwa kovimano. Upange waco u kasi loku lingiwa lombili, u kasi loku amako muẽle povaka avo.

⁹ Tua pula akulu vaco tuti, Helie wo tumi oku tunga onjo yilo loku malusula upange owu?

¹⁰ Tua pulavo olonduko viavo okuti tu ku vi sapuila kuenje tu soneha olonduko viasongui vavo.

¹¹ Ovo va kumbulula vati, Etu tuakuenje va Suku yovailu losi. Tu kasi loku tumbulula onjo yilo ya tungiwile konyima yanyamo alua, ya tungiwile losoma yimue yinene ya va Isareli.

¹² Puãi, omo olosekulu vietu via temisa Suku yovailu, oco eye Suku wa va eca ku Nevukandesa u Kaldea, eye Soma yo ko Bavulono. Eye wa nyõla onjo yaco, kuenje wa tuala omanu vaco ko Bavulono.

¹³ Puãi kulima watete wokovava a Kuro, Soma yo ko Bavulono, Soma Kuro wa imba oluiya hati, Onjo ya Suku yi tumbuluiwe.

¹⁴ Kuenje ovikuata viulu levi viopalata, vina viopiwile vonjo ya Suku ko Yerusalãi la Nevukandesa ha vi tualiwa ko Bavulono, Soma Kuro wa vi upa vonembele yo ko Bavulono loku vi eca vali ku Sesebacare una a nola oku linga onguluvulu.

¹⁵ Wa popia laye hati, Tambula ovikuata evi. Ka vi tuale konjo ya Suku yi kasi vo Yerusalãi. Onjo yaco ya Suku yi tungiwile kocitumãlo cayo.

¹⁶ Oco Sesebacare weya, wa seveta ociseveto conjo ya Suku yi kasi vo Yerusalãi. Tunde kotembo yaco toke cilo yi kasi loku tungiwa puãi lopo ka ya puile.

¹⁷ Oco cilo, a Soma, nda ca ku sunguluka, va tume oku vanjiliya vociseleko covisonehua, cina ci kasi ko Bavulono, nda hẽ ocili Soma Kuro wa tuma oku tunga onjo ya Suku vo Yerusalãi nda ndati. Kovaso yaco Soma a tu sapuileko onjongole yaye kondaka yilo.