ESERA 4 - Embimbiliya - Bíblia Sagrada em Umbundu

¹ Eci ovanyali vepata lia Yuda leli lia Benjamini va yeva okuti ava va tiuka kumandekua va kasi loku tunga onjo ya Yehova, Suku ya va Isareli,

² oco veya ku Seruvavele lakulu vapata vati, Tua pinga okuti tu u kuatisiko oku tunga momo letuvo tu fendela Suku yene ndene. Momo tunde koloneke via Esarihadono, Soma yo ko Asuria u wa tu nena kulo, tu u lumbaila ocilumba.

³ Puãi Seruvavele la Yesiua lakulu vakuavo vapata a va Isareli va va kumbulula vati, Ene ka vu kuete cimue letu kondaka yoku tungila Suku onjo. Etu muẽle lika wetu tu yi tunga. Tu yi tungila Yehova Suku ya va Isareli ndeci Kuro, Soma yo ko Persia, a tu sapuila.

⁴ Oco omanu vakuafeka va sakalaisa omanu va Yuda loku va talisa ohali osimbu va tunga.

⁵ Va feta omanu oku va tatamisa kupange wavo otembo yosi ya Kuro, Soma yo ko Persia, toke kovava a Dariu, Soma yo ko Persia.

⁶ Kuenje kefetikilo liovava a Soma Ahasuero va soneha oku pindika olonungi via Yuda levi via Yerusalãi.

⁷ Kuenda vali, kovava a Soma Aretasesete, oco Bisilama la Mitiredata la Tavele la vakuavo, va sonehela Aretasesete, Soma yo ko Persia, ukanda. Ukanda waco wa sonehiwa velimi lia va Suria, kuenje noke wa pitiyiwa.

⁸ Kesongo Rehumu lusonehi Simisiai va sonehela Soma Aretasesete ukanda woku pindika va Yerusalãi. Ukanda waco va soneha ndomo:

⁹ Ava vo soneha vava: Kesongo Rehumu, lusonehi Simisiai, la vakuavo va kasi lavo okuti olonganji, lolombiali, lasongui vofeka, kuenda va Persia la va Ereki la va Bavulono, kuenda va Siusana okuti va Elami,

¹⁰ la vakualofeka vikuavo vana Soma yinene Asinapore a tundisa kolofeka viavo loku va tungisa vovaimbo a Samaria lovaimbo akuavo a kasi kesinya.

¹¹ Oco ukanda va sonehela Soma Aritasesete wowu: Akuenje vove va tunga kesinya va tuma ovilamo.

¹² Tua tuma kokuove, a Soma, oku ku sapuila okuti va Yudea, vana va tunda kokuove ha va tungi letu, cilo va enda ko Yerusalãi. Va fetika oku tunga vali imbo liaco liusuanji hailio lia tatama ale. Va kasi loku mala ovimbaka vialio loku tumbulula ociseveto calio.

¹³ Oco a Soma, va kulihe okuti imbo liaco nda li tumbuluka, lovimbaka vialio nda vi tungiwa vali, kovaso, omanu vaco ka va tava vali oku feta elisimu pamue oku nena ulambu pamue oku feta owombo, kuenje ombango ya Soma yi tepuluka.

¹⁴ Cilo, omo etu tu lialia omongua wovelombe, kuenje ka ca tu sesamelele oku vanja So cimue ci tombisa Soma, oco a Soma, tua tuma oku ku sapuila,

¹⁵ okuti o kũlĩhisa ciwa velivulu liasapulo olosekulu viove. Velivulu liaco liasapulo o limbuka okuti imbo liaco imbo liusuanji, hailio lia kuatelele olosoma lolofeka olonamalala. Lomanu vaco tunde nunde vakuakuwengola ovaima. Omo ovituwa vialio vĩvi oco imbo liaco lia nyolehẽla.

¹⁶ Oco a Soma, tua ku sapuila okuti nda imbo liaco li tungiwa vali, lovimbaka viaco nda vi pua oku vi tunga, ove ku kuata vali ovikanjo vofeka yokesinya.

¹⁷ Oco Soma wa tuma ukanda woku kumbulula kesongo Rehumu kuenda usonehi Simisiai la vakuavo va tunga vo Samaria lava va kasi vofeka yokesinya. Wa soneha hati, Epasu liwa.

¹⁸ Ukanda wene wa tu tumisi wa pitila ciwa, wa nangiwila kuenje wa ndomboloka.

¹⁹ Nda tuma oku kũlĩhisa ciwa lutate, kuenje ocili, imbo liaco kosimbu lia katokailaile olosoma vikuavo. Kuenda vali pokati kalio muẽle pa kala kala oku liyaka loku likatukila vamuẽle.

²⁰ Kuenda imbo liaco lia Yerusalãi lia kala kala lolosoma vinene haivio via viala ofeka yosi yokesinya loku fetisa alisimu loku lambuisa ulambu loku fetisa owombo.

²¹ Cilo, imbi oluiya. Handeleki okuti vosi va liweka kupange waco. Imbo liaco ka li ka tumbuluke te njimba oluiya luaco ame muẽle.

²² Ko ka lendi locihandeleko eci. Uvi u vokinyiwila nye ho koki epese ku Soma?

²³ Eci ukanda wa Soma Aritasesete wa tangiwila Rehumu lusonehi Simisiai la vakuavo oco va enda lonjanga ku va Yudea ko Yerusalãi. Va talamisa upange waco longusu yalua.

²⁴ Oco upange wosi woku tunga onjo ya Suku vo Yerusalãi wa talama. Wa talama muẽle toke kulima wavali wovava a Dariu, Soma yo ko Persia.